ကာတာရဲ့အကြီးဆုံး ဓာတ်ငွေ့စက်ရုံ ပေါက်ကွဲပြီး အနည်းဆုံး ၁၃ ဦးသေဆုံး

.

၂၀၂၆ ခုနှစ်၊ ဇွန်လ ၂၃ ရက်

.

ကာတာနိုင်ငံရဲ့အကြီးမားဆုံး ဓာတ်ငွေ့ထုတ်လုပ်ရေးစက်ရုံမှာ ဇွန်လ ၂၁ ရက် ညပိုင်းက ပေါက်ကွဲမှု ဖြစ်ပွားခဲ့ပြီး အနည်းဆုံး လူ ၁၃ ဦး သေဆုံးကာ ၆၀ ကျော် ဒဏ်ရာရရှိသွားခဲ့ပါတယ်။

.

.

ပြည်ထဲရေးဝန်ကြီးဌာနရဲ့ ထုတ်ပြန်ချက်အရ ရက်စ်လက်ဖန် စက်မှုဇုန်အတွင်းမှာ ရှိတဲ့ သဘာဝ ဓာတ်ငွေ့ရည် ထုတ်လုပ်ရေး စက်ရုံကြီးမှာ နည်းပညာပိုင်းဆိုင်ရာ မတော်တဆမှု ဖြစ်ပွားခဲ့တာဖြစ်တယ်လို့ သိရတာပါ။ ပေါက်ကွဲမှုကြောင့် မြို့ရဲ့ကောင်းကင်ယံမှာ လိမ္မော်ရောင်သန်းနေခဲ့ပြီး မြို့ထဲက နေအိမ်တွေရဲ့ ပြတင်းပေါက်တွေတောင် တုန်ခါသွားခဲ့ရတဲ့အထိ ဖြစ်ခဲ့တာပါ။

.

ဒီပေါက်ကွဲမှုက ရက်စ်လက်ဖန်ကနေ ၄၃ မိုင်ဝေးတဲ့ ဒိုဟာမြို့အလယ်ပိုင်းအထိတောင် သက်ရောက်ခဲ့ပြီး ဒိုဟာမြို့ထဲမှာနေသူတွေတောင် ပေါက်ကွဲမှုကြောင့် ဖြစ်ပေါ်လာတဲ့ တုန်ခါမှုကို ခံစားခဲ့ရတာပါ။

.

ကာတာစွမ်းအင်ဝန်ကြီး အယ်လ်ခါဘီကတော့ ဒီပေါက်ကွဲမှုကြောင့် နိုင်ငံရဲ့စွမ်းအင်တင်ပို့မှုတွေ ရပ်တန့်မှာ မဟုတ်တဲ့အကြောင်းနဲ့ မတော်တဆ ဖြစ်ရပ်သာဖြစ်ပြီး တိုက်ခိုက်ခံရတာမျိုး မဟုတ်တဲ့အကြောင်း အတည်ပြု ထားပါတယ်။

.

ရက်စ်လက်ဖန် ဆိပ်ကမ်းက ကမ္ဘာ့အကြီးဆုံး ဆိပ်ကမ်းတစ်ခုဖြစ်ပြီး ကမ္ဘာ့အကြီးဆုံး သဘာဝဓာတ်ငွေ့ စက်ရုံ တည်ရှိရာ နေရာလည်း ဖြစ်တာပါ။ ဒီဆိပ်ကမ်းက ၂၀၂၆ အစောပိုင်းမှာ အီရန်ရဲ့ ဒုံးကျည်တိုက်ခိုက်မှု တွေကိုလည်း ခံခဲ့ရဖူးတဲ့နေရာပါ။

.

စွမ်းအင်ဝန်ကြီးက အစိုးရအနေနဲ့ စက်ရုံမှာဖြစ်ပွားခဲ့တဲ့ ပေါက်ကွဲမှုရဲ့အကြောင်းရင်းကို စုံစမ်းဖော်ထုတ် နေကြောင်း ပြောဆိုခဲ့ပြီး ဒီပေါက်ကွဲမှုကြောင့် ပတ်ဝန်းကျင်ထိခိုက်မှု အန္တရာယ်မရှိတဲ့အကြောင်း အတည်ပြု ပေးခဲ့ပါတယ်။ စက်ရုံလုပ်ငန်းတွေကိုတော့ ရပ်တန့်ထားရပြီး ပြန်လည်စတင်မယ့်အချိန်ကို တွက်ဆလို့ မရသေးတဲ့အကြောင်း ဝန်ကြီးက ထပ်ပြောခဲ့ပါသေးတယ်။

.

ပေါက်ကွဲမှုကြောင့် သေဆုံးသူတွေအားလုံးက အိန္ဒိယနဲ့ ပါကစ္စတန်နိုင်ငံသားတွေဖြစ်ကြပြီး ဒိုဟာမှာရှိတဲ့ အိန္ဒိယသံရုံးနဲ့ ဆက်သွယ်ဆောင်ရွက်နေတဲ့ အကြောင်းနဲ့ သေဆုံးသူတွေနဲ့ ဒဏ်ရာရသူတွေရဲ့မိသားစုတွေကို ပံ့ပိုးမှုတွေ လုပ်ပေးသွားမယ့်အကြောင်း အာဏာပိုင်တွေက အသိပေးထားပါတယ်။

.

Source – BBC

.