ဟေတီကို တစ်ဂိုးနဲ့ ကပ်နိုင်ပြီး အုပ်စု C ကို ဦးဆောင်သွားပြီဖြစ်တဲ့ စကော့တလန်

.

၂၀၂၆ ခုနှစ်၊ ဇွန်လ ၁၄ ရက်

.

ဒီနေ့မနက်ပိုင်း ကစားခဲ့တဲ့ ကမ္ဘာ့ဖလား အုပ်စု C ၊ ဟေတီနဲ့ စကော့တလန်အသင်းတို့ပွဲစဉ်မှာတော့ စကော့တလန်က ကွင်းလယ်လူ မက်ဂင်းရဲ့ သွင်းဂိုး တစ်ဂိုးတည်းနဲ့ ကပ်နိုင်ပြီး အုပ်စုပထမနေရာကို သိမ်းပိုက်သွားခဲ့ပါတယ်။

.

.

တိုမီနေး၊ မက်ဂင်းတို့လို နာမည်ကျော်တွေနဲ့အတူ ကွင်းလယ်ကို အားပြုကစားသွားတဲ့ စကော့တလန်ကြောင့် ဒီပွဲရဲ့ပထမပိုင်းက ပျင်းစရာကြီးဖြစ်နေပြီး ဟေတီအပေါ် သိသိသာသာ အသာစီးရအောင် ကစားနိုင်ခြင်း မရှိခဲ့တာကိုလည်း တွေ့ခဲ့ရပါတယ်။

.

ပွဲချိန် ပထမပိုင်းမှာ ဘယ်ဖက်ကမှ ထောင့်ကန်ဘော မရခဲ့တဲ့အထိ တောင်ပံတိုက်စစ်တွေက ခြောက်ကပ် နေကြပြီး ဂိုးသွင်းခွင့်တွေလည်း မယ်မယ်ရရ မရှိခဲ့ကြပါဘူး။ ဟေတီဖက်က ဂိုးပေါက်တည့်မှု တစ်ကြိမ်သာ ရှိခဲ့ပြီး စကော့တလန်ဖက်က ဂိုးပေါက်တည့်မှု ၂ ကြိမ်နဲ့ ပထမပိုင်းကို အဆုံးသတ်ခဲ့ကြရတာပါ။

.

ဒုတိယပိုင်းမှာတော့ ပွဲက ပိုသွက်လာခဲ့ပြီး ဟေတီက တိုက်စစ်ကစားလာတာမို့ စကော့တလန်က ခံစစ်ကို ပိုပြီး အားပြုခဲ့ရပါတယ်။ ကမ္ဘာ့ဖလားနဲ့ နှစ်ပေါင်း ၅၀ ကျော်လောက် ဝေးကွာနေတဲ့အသင်းလေးက စကော့တလန်အပေါ် ဘောလုံးပိုင်ဆိုင်မှုအသာ၊ ဂိုးကန်သွင်းခွင့် အသာနဲ့ ဒုတိယပိုင်းမှာ ကစားသွားတာကို မြင်ခဲ့ရပြီး ပွဲက ကြည့်ကောင်းလာခဲ့တာပါ။

.

ဟေတီက တိုက်စစ်ဆင်ကစားနေပေမဲ့လည်း သိပ်ပြီးအလုပ်မဖြစ်တာမို့ စကော့တလန်ဂိုးသမား အန်ဂက်စ် ဂန်းက တစ်ပွဲလုံးမှာ ၂ ကြိမ်ပဲ ကာကွယ်ခဲ့ရပြီး ဟေတီအသင်းရခဲ့တဲ့ ဂိုးကန်သွင်းခွင့် ၁၅ ကြိမ်မှာ ၂ ကြိမ်ပဲ ဂိုးပေါက်တည့်ခဲ့ရတာပါ။

.

ဟေတီရဲ့အဓိက တိုက်စစ်မှူးဖြစ်တဲ့ ဆန်းဒါးလန်းတိုက်စစ်မှုး အီဆီဒေါ တစ်ယောက် ဘယ်လိုမှ အလုပ်မဖြစ် တော့လို့ လူစားလဲလိုက်ရတဲ့အထိကို ဟေတီရဲ့ တိုက်စစ်စွမ်းဆောင်ရည် ဆိုးရွားနေတာကိုလည်း တွေ့ခဲ့ရ ပါတယ်။

.

စကော့တလန်ကလည်း ပွဲချိန် ၇၅ မိနစ်ကစလို့ တိုက်စစ်၊ကွင်းလယ်နေရာတွေ လူစားလဲပြီး ဟေတီကို ပြန်ဖိအားပေးဖို့ ကြိုးစားခဲ့ပေမဲ့ ဂိုးကန်သွင်းခွင့်တွေ မယ်မယ်ရရ မရှိခဲ့သလို၊ ဘောလုံးအပျက် များနေတာ ကြောင့် ပထမပိုင်းတုန်းက ရထားတဲ့ တစ်ဂိုးနဲ့ပဲ နိုင်သွားခဲ့ရတာပါ။

.

ဒီခြေစွမ်းအတိုင်းဆိုရင်တော့ စကော့တလန်က လာမယ့်ပွဲတွေမှာ ဘရာဇီး၊ မော်ရိုကို တို့ကို ယှဉ်နိုင်ဖို့ ခက်မှာဖြစ်ပြီး လက်ရှိအချိန်မှာတော့ ရမှတ် ၃ မှတ်နဲ့ အုပ်စုကို ဦးဆောင်ထားပါပြီ။

.