အီဘိုလာ ထိန်းချုပ်ဖို့ ကန်ဒေါ်လာ ၅၁၈ သန်းတန် စီမံကိန်းကို WHO စတင်

ကမ္ဘာ့ကျန်းမာရေးအဖွဲ့ (WHO) အကြီးအကဲ က အီဘိုလာရောဂါကို အီဘိုလာရောဂါကို ထိန်းချုပ်ဖို့ အမေရိကန် ဒေါ်လာ ၅၁၈ သန်း ကုန်ကျမယ့် စီမံကိန်းကို စတင်လိုက်ပြီလို့ မနေ့ ဇွန်လ ၅ ရက် (သောကြာနေ့) က ကြေညာလိုက်ပါတယ်။
.
မှတ်တမ်းတွေအရ စတုတ္ထမြောက် အကြီးမားဆုံး ကူးစက်ရောဂါဖြစ်ပွားမှုဖြစ်တဲ့ အီဘိုလာ ပျံ့နှံ့မှုကို ကာကွယ်ဖို့အတွက် ရန်ပုံငွေနဲ့ နိုင်ငံရေးအရ ပူးပေါင်းဆောင်ရွက်ဖို့ သူက တောင်းဆိုလိုက်တာပါ။
.
ဒီ စီမံကိန်းဟာ ကွန်ဂိုနဲ့ အိမ်နီးချင်း ယူဂန္ဓာနိုင်ငံတွေမှာ ဖြစ်ပွားနေတဲ့ အီဘိုလာရောဂါ ထိန်းချုပ်ဖို့အတွက် အကူအညီ‌ ပေးနိုင်ရေးကို အဓိက ရည်ရွယ်ပြီး တစ်ချိန်ထဲမှာပဲ တခြား နိုင်ငံတွေမှာလည်း နယ်စပ်စစ်ဆေးမှု တိုးမြှင့်တာတွေ အပါအဝင် ကြိုတင်ပြင်ဆင်ဖို့အတွက် ကူညီပေးသွားမှာဖြစ်တယ်လို့ WHO နဲ့ အာဖရိက ရောဂါထိန်းချုပ်ရေးနဲ့ ကုသရေးစင်တာတို့က ပြောဆိုလိုက်ပါတယ်။
.
“ရောဂါ ပျံ့နှံ့မှုက သိပ်ကို မြန်နေပြီး ထိန်းချုပ်နိုင်ဖို့ ကြိုးစားနေဆဲ ဖြစ်တယ်” လို့ WHO အကြီးအကဲ တက်ဒ်ရို့စ် က ပြောပါတယ်။
.
“အီဘိုလာကို ထိန်းချုပ်ဖို့အတွက် နိုင်ငံရေးအရ ကတိကဝတ်၊ ရေရှည်တည်တံ့တဲ့ ဘဏ္ဍာရေးနဲ့ လူမှုအသိုင်း အဝိုင်းတွေနဲ့ ပူးပေါင်းဆောင်ရွက်ရာမှာ ယုံကြည်မှုတွေ လိုအပ်ပါတယ်” လို့လည်း သူက ဆက်ပြောပါတယ်။
.
ကွန်ဂိုမှာ အခုဆိုရင် အီဘိုလာ အတည်ပြုလူနာ ၃၈၁ ဦး အထိ ရှိလာနေပြီး သေဆုံးသူကတော့ ၆၂ ဦး ရှိပြီ လို့ အာဖရိက CDC က ပြောပါတယ်။ ဒါ့အပြင် ကွန်ဂိုရဲ့ အိမ်နီးချင်း ယူဂန္ဓာမှာလည်း အတည်ပြုလူနာ ၁၉ ဦးနဲ့ သေဆုံးသူ ၂ ဦး ရှိနေတာပါ။
.
အခု ပျံ့နှံ့နေတဲ့ အီဘိုလာရောဂါဟာ ဘွန်ဒီဘူဂိုဗိုင်းရပ်စ် ကြောင့်ဖြစ်ပြီး ဒါကို ကုသနိုင်တဲ့နည်းလမ်း၊ ဒါမှမဟုတ် ဆေးဝါး မရှိသေးဘူးလို့ ဆိုပါတယ်။
.
“အရင် ဘွန်ဒီဘူဂို ပျံ့နှံမှုနဲ့ယှဉ်ရင် အခုက ပျံ့နှ့မှု သိပ်ကို ပြင်းထန်နေပါတယ်။ ဒါဟာ ဘွန်ဒီဘူဂို ပျံ့နှံ့မှုတွေ ထဲမှာ အပြင်းထန်ဆုံးပါပဲ” လို့ အာဖရိက CDC ရဲ့ ညွှန်ကြားရေးမှူးချုပ် Jean Kaseya က ပြောပါတယ်။
.
အလှူရှင် တချို့က သူတို့ မူလက ကတိပြုထားတဲ့ ဒေါ်လာ ၄၉၈ အစား ဒေါ်လာ ၃၁၅ ဒသမ ၈ သန်းသာ လှူဒါန်းမယ်လို့ လျှော့ချလိုက်ကြတယ်လို့ သူက ပြောပါတယ်။
.
ပြီးခဲ့တဲ့ မေလ ၁၅ ရက်က ကွန်ဂိုမှာ ၁၇ ဦးမြောက် အီဘိုလာ အတည်ပြုလူနာ တွေ့ရှိပြီးနောက် WHO က နိုင်ငံတကာနဲ့ ဆိုင်တဲ့ ကျန်းမာရေးဆိုင်ရာ အရေးပေါ်အခြေအနေအဖြစ် ကြေညာခဲ့ပါတယ်။
.
သာမန် အီဘိုလာ စစ်ဆေးမှုတွေကနေ ဘွန်ဒီဘူဂို ကို မစမ်းသပ်နိုင်ခဲ့တဲ့အတွက် နှောင့်နှေးမှုတွေ ရှိနေခဲ့ပြီး စိန်ခေါ်မှု တစ်ရပ် ဖြစ်နေတာပါ။
.
“စမ်းသပ်ဖို့ အတွက် ရက်ပိုင်းကနေ ရက်သတ္တပတ်အထိ ကြာမြင့်ပါတယ်။ ဒါက စိတ်ပျက်စရာပါပဲ” လို့ ကွန်ဂို နိုင်ငံ၊ အီတူရီပြည်နယ်က ခရစ်ယာန် အကူအညီပေးရေးအဖွဲ့တစ်ခုရဲ့ ဥက္ကဋ္ဌ Franklin Graham က ပြောပါတယ်။
.
ဒေသခံတွေရဲ့ မယုံကြည်မှုနဲ့ ခုခံမှုတွေကလည်း ရောဂါ တုံ့ပြန်ရေးမှာ အဟန့်အတား ဖြစ်နေပြီးတော့ အတည်ပြုလူနာ ရုပ်အလောင်းတွေကို သင်္ဂြိုဟ်ဖို့ ကိစ္စမှာ ကုသရေးဌာနတွေ တိုက်ခိုက်ခံရတာတွေလည်း ဖြစ်ခဲ့ပါသေးတယ်။
.
လုံခြုံရေးအန္တရာယ်တွေကို မီးမောင်းထိုးပြတဲ့အနေနဲ့ WHO က သောကြာနေမှာ ကွန်ဂိုမှာရှိတဲ့ ကုလသမဂ္ဂ ငြိမ်းချမ်းရေးထိန်းသိမ်းရေး မစ်ရှင် ဆီကနေ သံချပ်ကာယာဉ်သုံးစီး လက်ခံရရှိခဲ့တယ်လို့ ဆိုပါတယ်။
.
Source – Reuters
.
#KBZTai #International #Ebola