တောင်ကြီး-ဟိုပုံးသွား ကားလမ်းတွင် စိတ်ကြွရူးသွပ်ဆေးပြား ၂၅၀၀၀ ဖမ်းမိ

.

၂၀၂၆ ခုနှစ်၊ ဇူလိုင်လ ၃ ရက်

.

ရှမ်းပြည်နယ်တောင်ပိုင်း၊ တောင်ကြီးမြို့နယ်၊ တောင်ကြီး-ဟိုပုံးသွား ကားလမ်း တွင် ယမန်နေ့ ဇူလိုင်လ ၂ ရက်၊ နေ့လယ်ပိုင်းက စိတ်ကြွရူးသွပ်ဆေးပြား ၂၅၀၀၀ ကို သယ်ဆောင်လာသူ ၂ ဦးနှင့်အတူ ဖမ်းဆီးရမိ ခဲ့ကြောင်း သိရသည်။

.

.

တောင်ကြီးမြို့မရဲစခန်းမှ ရဲအုပ် ဇော်လှိုင်မြင့် ဦးစီး တပ်ဖွဲ့ဝင်များ ပါဝင်သော ပူးပေါင်းအဖွဲ့သည် ယမန်နေ့ ဇူလိုင်လ ၂ ရက်၊ နေ့လယ် ၂ နာရီ ၄၅ မိနစ်ခန့်က တောင်ကြီးမြို့နယ်၊ နောင်လေကျေးရွာအုပ်စု၊ နောင်လေ ကျေးရွာအနီး၊ တောင်ကြီး-ဟိုပုံးသွား ကားလမ်းမပေါ်တွင် မူးယစ်ဆေးဝါး ရောင်းချနေကြောင်း သတင်းအရ ပိတ်ဆို့စစ်ဆေး ရှာဖွေနေစဉ် ဟိုပုံးမြို့ဘက်မှ တောင်ကြီးမြို့ဘက်သို့ မောင်းနှင်လာသည့် Honda Dream 125 အမျိုးအစား မော်တော်ဆိုင်ကယ် တစ်စီးအား ရပ်တန့်စစ်ဆေးရှာဖွေခဲ့ခြင်း ဖြစ်ကြောင်း သိရသည်။

.

ထိုသို့ စစ်ဆေးရှာဖွေရာတွင် ဆိုင်ကယ်နောက်မှ လိုက်ပါစီးနင်းလာသူ စိုင်းလင်း (ခ) ကိုစိုင်း ကိုင်ဆောင်ထား သည့် အနီရောင် အိတ်အတွင်းမှ စိတ်ကြွရူးသွပ်ဆေးပြားဟုယူဆရသော WY စာတမ်းပါ ပန်းရောင် ဆေးပြား ၂၀၀၀၀ ပြား၊ အလေးချိန် ၁ ဒသမ ၈ ကီလိုဂရမ်ခန့် နှင့် ဆိုင်ကယ်မောင်းနှင်သူ ခွန်ဗိုလ်ကျော် လွယ်ထား သည့် ဝါးပလိုင်းတောင်းအတွင်းမှ အပြာရောင် ပလပ်စတစ် ကပ်ခွာအိတ်ဖြင့် ထည့်ထားသည့် စိတ်ကြွရူးသွပ် ဆေးပြားဟု ယူဆရသော WY စာတမ်းပါ ပန်းရောင် စိတ်ကြွရူးသွပ်ဆေးပြား ၅၀၀၀ ပြား၊ အလေးချိန် ၄၅၀ ဂရမ်ခန့်၊ စုစုပေါင်း ဆေးပြား ၂၅၀၀၀ ပြား၊ အလေးချိန် ၂ ဒသမ ၂၅ ကီလိုဂရမ်ခန့်၊ တန်ဖိုးငွေကျပ် သိန်း ၇၅ သိန်းခန့်အား ဖမ်းဆီးရမိခဲ့ခြင်းဖြစ်ကြောင်း သိရသည်။

.

ဆက်လက်ပြီး ဖမ်းဆီးရမိသူများ၏ စစ်ဆေးထွက်ဆိုချက်အရ အဆိုပါ မူးယစ်ဆေးဝါးများအား တောင်ကြီး မြို့နယ်၊ နောင်လေကျေးရွာအုပ်စု၊ ငေါက်ဝါးကျေးရွာအထွက် တောစပ်တွင် အမည်မသိ အမျိုးသား တစ်ဦး ထံမှ ဝယ်ယူပြီး တစ်ဆင့်ပြန်လည်ရောင်းချရန် သယ်ယူခဲ့ခြင်းဖြစ်ကြောင်း သိရသည်။

.

အဆိုပါ စိတ်ကြွရူးသွပ်ဆေးပြားများနှင့်အတူ ဖမ်းဆီးရမိသူ စိုင်းလင်း (ခ) ကိုစိုင်းနှင့် ခွန်ဗိုလ်ကျော် တို့ ၂ ဦး အား တောင်ကြီးမြို့မရဲစခန်းတွင် မူးယစ်ဆေးဝါးနှင့် စိတ်ကိုပြောင်းလဲစေသောဆေးဝါးများ ဆိုင်ရာ ဥပဒေ ပုဒ်မ ၁၉(က)/၂၁ အမှုဖွင့်အရေးယူထားကြောင်း သိရသည်။

.