ထစ်ခနဲရှိ ဒေါသထွက်တတ်သူတွေအတွက် ဒေါသထိန်းချုပ်နည်း ၇ ချက်

.

၂၀၂၆ ခုနှစ်၊ ဇူလိုင် ၁၇ ရက်

.

သင်က တစ်ခုခုဆိုတာနဲ့ ဒေါသထွက်တတ်တဲ့သူလား။ ကိုယ့်ကားရှေ့ကို တခြားကားက ဖြတ်ဝင်လာရင် စိတ်တိုတတ်တာ၊ ကိုယ့်ကလေးက စကားနားမထောင်တဲ့အချိန် ဒေါသထွက်တာ၊ အလုပ်ထဲမှာ တစ်ခုခု အဆင်မပြေတာနဲ့ စိတ်တိုလာတာ၊ မိန်းမနဲ့ ညှိနှိုင်းဖို့မကြိုးစားဘဲ တစ်ခုခုဆိုရင် အော်မိတာ အဲဒီလိုတွေ ဒေါသထွက်တတ်တဲ့သူလား။

.

.

လူဆိုတာကတော့ ဒေါသဆိုတာ ဖြစ်တတ်တာပါပဲ။ ဒေါသထွက်တဲ့သူတွေက ကျန်းမာရေးကောင်းတယ် လို့တောင် တချို့က ပြောတတ်ပါသေးတယ်။ ဒါပေမဲ့ ထစ်ကနဲရှိ ဒေါသထွက်နေ စိတ်တိုနေတာမျိုး ကျပြန်တော့ ကျန်းမာရေးအတွက်ရော လူမှုဆက်ဆံရေးအတွက်ကိုပါ ထိခိုက်လာစေတာပါ။

.

ဒီတော့ ဒေါသကို ဘယ်လိုထိန်းမလဲ။ အောက်မှာပါတဲ့ ဒေါသထိန်းချုပ်နည်း ၇ ချက်ကို ဖတ်ကြည့်လိုက်ပါ။

.

■ စကားမပြောခင်အရင် စဉ်းစားပါ

ကိုယ်က ဒေါသထွက်လာပြီဆိုရင် ပြောချလိုက်တာပဲ၊ ဒါပေမဲ့ ကိုယ်ပြောလိုက်တဲ့စကားတွေက တစ်ဖက်လူ ကို ထိခိုက်စေတယ်၊ စိတ်မကောင်းဖြစ်သွားစေနိုင်တယ်ဆိုတာကို သိထားဖို့လိုပါတယ်။ ဒီတော့ စကားမပြော ခင် ကိုယ့်အတွေးကို ခဏလောက် စုစည်းပါ။ ဘာပြောသင့်လဲဆိုတာ သေချာစဉ်းစားပြီးမှ အေးအေးဆေးဆေး ပြောပါ။

.

■ ကိုယ်လက်လှုပ်ရှားမှုလုပ်ပါ

လေ့ကျင့်ခန်းလုပ်ခြင်းက ဒေါသဖြစ်စေတဲ့ စိတ်ဖိစီးမှုတွေကို လျှော့ချပေးနိုင်ပါတယ်။ ကိုယ်က တစ်ခုခု အပေါ် စိတ်တိုနေပြီလို့ ခံစားရရင် ပြေးတာ။ လမ်းလျှောက်တာ ၊ ဒါမှမဟုတ် ကိုယ်နှစ်သက်တဲ့ အားကစားတစ်ခုခုကို လုပ်ကြည့်နေလိုက်ပါ။

.

■ ခဏနားပါ

လူက စိတ်ဖိစီးနေပြီ၊ စိတ်တိုနေပြီ၊ တစ်ခုခုကို မကျေမနပ်ဖြစ်လာပြီဆိုရင် ကိုယ့်ကိုယ်ကိုခဏ အနားပေး လိုက်ပါ။ တိတ်ဆိတ်ငြိမ်သက်တဲ့ အချိန်လေးတစ်ခုက နောက်ထပ် ရောက်လာမယ့်အခြေအနေတွေကို ဒေါသမထွက်ဘဲ ရင်ဆိုင်ဖို့ ကူညီပေးနိုင်ပါလိမ့်မယ်။

.

■ ဖြေရှင်းနည်းကိုရှာပါ

ကိုယ်နဲ့ပတ်သက်တဲ့သူတစ်ယောက် အလုပ်လုပ်တာကို မကျေနပ်ဘဲ ဒေါသထွက်နေမယ့်အစား သူပိုကောင်း လာအောင် ကိုယ်ဘယ်လို ပါဝင်ပေးလို့ရသလဲဆိုတဲ့ အကြောင်းရင်းကို စဉ်းစားပါ။ တချို့အရာတွေက ကိုယ်ဒေါသထွက်ရင်လည်း ထူးမလာတဲ့အရာတွေဆိုတာကို လက်ခံထားနိုင်ဖို့လည်း လိုပါတယ်။ ဒေါသထွက်တာက ပြသနာကို မဖြေရှင်းနိုင်သလို ပိုပြီးဆိုးသွားစေနိုင်တယ်ဆိုတာကိုလည်း သတိထားပါ။

.

■ အငြိုးမထားပါနဲ့

လူက ဒေါသဖြစ်လွယ်၊ စိတ်ကြီးလွယ်ရတဲ့အထဲ အဲဒီလူကို မကျေနပ်တဲ့စိတ်နဲ့ အငြိုးထားနေရင် ၂ ဆ ၃ ဆ ပိုပြီး ပင်ပန်းရတာပါ။ ကိုယ်က ဒေါသထွက်လွယ်တဲ့သူ ဆိုရင်တောင် အငြိုးထားတဲ့စိတ်မျိုး မရှိပါစေနဲ့။ ခဏလေး စိတ်တိုပြီး ပြန်ခွင့်လွှတ်နိုင်တယ်ဆိုရင် နှစ်ဖက်စလုံး သင်ခန်းစာယူနိုင်သလို ဆက်ဆံရေးလည်း ပိုကောင်းလာနိုင်ပါတယ်။

.

■ ဟာသကို အသုံးချပါ

တစ်ခါတလေကျရင် ဟာသလေးတွေ မကြာခဏနားထောင်တာ၊ ဟာသပြောတာတွေကလည်း ကိုယ့်ရဲ့ ဒေါသကို လျော့ကျဖို့ အထောက်အကူဖြစ်စေပါတယ်။ လူတွေက ဟာသကို ခံစားတတ်လာပြီဆိုရင် တချို့အဆင်မပြေတာတွေကိုတောင် ဟာသအမြင်နဲ့ ကြည့်မိသွားတတ်ပြီး ခွင့်လွှတ်လာနိုင်ကြပါတယ်။

.

■ စိတ်ပိုင်းဆိုင်ရာ‌ လေ့ကျင့်ခန်းတွေလုပ်ပါ

ဒေါသထွက်လာတဲ့အခါ အသက်ပြင်းပြင်းရှူတာမျိုး၊ စိတ်အေးချမ်းတဲ့ နေရာတစ်ခုကို စိတ်ကူးယဉ်လိုက် တာမျိုး၊ ဒါမှမဟုတ် ကိုယ့်ကိုယ်ကို စိတ်အေးအေးထားဖို့ ပြန်ပြီး ဖျောင်းဖျကြည့်တာမျိုး လုပ်နိုင်ပါတယ်။ ဒါ့အပြင် သီချင်းနားထောင်တာ၊ တရားထိုင်တာနဲ့ အခြားကိုယ်ဝါသနာပါတဲ့အလုပ်လေးတွေ လုပ်နေရင်း စိတ်အေးချမ်းမှုကို ရှာဖွေကြည့်လို့ရပါတယ်။

.

Source – mayo clinic

.