ဧရာဝတီကို ဂိုးပြတ်အရှုံးပေးလိုက်ရတဲ့ ရှမ်းယူနိုက်တက် အမျိုးသမီးအသင်း

.

၂၀၂၆ ခုနှစ်၊ ဩဂုတ်လ ၉ ရက်

.

ဒီနေ့ညနေပိုင်းမှာ ယှဉ်ပြိုင်ကစားခဲ့ကြတဲ့ ဧရာဝတီအမျိုးသမီးနဲ့ ရှမ်းယူနိုက်တက်အမျိုးသမီးအသင်းတို့ရဲ့ ပွဲစဉ်မှာတော့ ဧရာဝတီက ၃-၀ ဆိုတဲ့ရလာဒ်နဲ့ ဂိုးပြတ်အနိုင်ယူပြီး အမှတ်ပေးဇယား ထိပ်ဆုံးက ISPE ကို ဆက်လက် ဖိအားပေးသွားနိုင်ခဲ့ပါတယ်။

.

.

ဒီပွဲက အမှတ်ပေးဇယားရဲ့ အဆင့် ၂ နဲ့ အဆင့် ၃ နေရာက အသင်းတွေရဲ့ပွဲမို့ အကြိတ်အနယ်ရှိခဲ့ပြီး လက်ရွေးစင်ကစားသမား အများစုရဲ့ အားနဲ့ ကစားပုံကောင်းနေတဲ့ ဧရာဝတီက အသာစီးရခဲ့တာပါ။

.

ရှမ်းယူနိုက်တက်က ဒဏ်ရာရှိနေသေးတဲ့ အဘီဂေးလ်ကို အရန်ခုံမှာထားခဲ့ပြီး ပိစ်အိုလ်ဂါ၊ ဒါကို တို့ရဲ့ ကွင်းလယ်နဲ့ ပွဲထွက်ခဲ့သလို ရူပါခိုင်ရဲ့ အားနဲ့ တိုက်စစ်ကို ပုံဖော်ဖို့ ကြိုးစားခဲ့တာပါ။

.

ဧရာဝတီကလည်း မေထက်လူ ကို တိုက်စစ်မှာထားခဲ့ပြီး အလစ်ဆာ၊ ရီတူပေါ်နာ တို့ရဲ့ ကွင်းလယ်အားနဲ့ တိုက်စစ်ဆင်ဖို့ ကြိုးစားခဲ့တာပါ။

.

တကယ်တမ်း ကစားကြချိန်မှာတော့ ဧရာဝတီရဲ့ ကွင်းလယ်က ရှမ်းယူနိုက်တက်ထက် ပိုကောင်းခဲ့ပြီး ဘယ်ခြမ်းက ရီတူပေါ်နာ ကို ရှမ်းနောက်ခံလူတွေ မထိန်းနိုင်ဘဲ ဖြစ်ခဲ့ကြတာပါ။

.

ပွဲချိန် မိနစ် ၃၀ မှာတော့ ဧရာဝတီတို့ အဖွင့်ဂိုးရသွားခဲ့ပြီး ကွင်းလယ်ကနေ ထိုးပေးလိုက်တဲ့ဘောလုံးကို မေထက်လူ က အကောင်းဆုံး အဆုံးသတ်သွားတာပါ။

.

အဲဒီနောက် ၃ မိနစ်အကြာမှာပဲ ဧရာဝတီက ဒုတိယဂိုးထပ်ရသွားခဲ့ပြီး နန်းခိုင်ဇင်မြင့်က နောက်ခံလူတွေ ရှုပ်နေတဲ့အနေအထားကနေ ကန်သွင်းသွားခဲ့တာဖြစ်ပါတယ်။

.

ပွဲချိန် ဒုတိယပိုင်း ၄၉ မိနစ်မှာတော့ ဧရာဝတီအသင်းရဲ့ ထောင့်ကန်ဘောကို ဖျက်ထုတ်ဖို့ ကြိုးစားရင်းကနေ ရှမ်းယူနိုက်တက်ကစားသမား ခိုင်သဇင် ကိုယ့်ဂိုးကိုယ်သွင်းမိခဲ့လို့ ဧရာဝတီတို့ ၃ ဂိုးအထိ ရသွားခဲ့တာပါ။

.

ရှမ်းယူနိုက်တက်က တိုက်စစ်ပိုင်းအပြောင်းအလဲတွေ လုပ်ခဲ့ပေမဲ့လည်း ပိစ်နဲ့ ဒါကို တို့အတွဲက နော်ထက်ထက်ဝေ၊ ဖြူဖြူဝင်း၊ ဇွန်ယုယဦးတို့ကို မကျော်နိုင်တာကြောင့် ပွဲအပြီးမှာ ရှမ်းယူနိုက်တက်တို့ ၃-၀ ဆိုတဲ့ရလာဒ်နဲ့ အရှုံးပေးလိုက်ရတာဖြစ်ပါတယ်။

.

ဒီနေ့ပွဲရဲ့အကောင်းဆုံး ကစားသမားဆုကိုတော့ ဧရာဝတီအသင်းခေါင်းဆောင် နော်ထက်ထက်ဝေက ရရှိသွားခဲ့ပြီး ဆုကြေးငွေ ၅ သိန်းကို သိမ်းပိုက်သွားခဲ့ပါတယ်။

.

ဒီပွဲကို ရှုံးနိမ့်သွားတဲ့အတွက် ရှမ်းယူနိုက်တက်အသင်းက အမှတ်ပေးဇယား အဆင့် ၄ နေရာကို ဆင်းပေး လိုက်ရပြီး အဆင့် ၃ နေရာကိုတော့ ဒီတစ်ပတ်ပွဲမှာ ဂိုးပြတ်နိုင်ခဲ့တဲ့ ရန်ကုန်ယူနိုက်တက်က သိမ်းပိုက်သွားခဲ့ ပါတယ်။

.