အလုပ်ထုတ်လိုက်တဲ့ဆရာက သေနတ်နဲ့ခြိမ်းခြောက်လို့ ဟတ်ရိုင်မြို့စာသင်ကျောင်း ယာယီပိတ်

.

၂၀၂၆ ခုနှစ်၊ ဩဂုတ်လ ၉ ရက်

.

ထိုင်းနိုင်ငံတောင်ပိုင်း၊ ဟတ်ယိုင်မြို့မှာရှိတဲ့ အလယ်တန်းကျောင်းတစ်ကျောင်းမှာ အလုပ်ထုတ်ခံရတဲ့ နိုင်ငံခြား ကျောင်းဆရာတစ်ယောက်က သေနတ်နဲ့ ပတ်သက်တဲ့ ခြိမ်းခြောက်စာတွေ လူမှုကွန်ရက်မှာ တင်နေတာကြောင့် ကျောင်းအုပ်ချုပ်ရေးအဖွဲ့က ကျောင်းကို ယာယီပိတ်ထားလိုက်ရပါတယ်။

.

.

ကျောင်းသားဦးရေ ၃၀၀၀ ကျော်နဲ့ ဆရာ၊ဆရာမဦးရေ ၂၅၀ လောက်ရှိတဲ့ အဲဒီကျောင်းမှာ ကျောင်းသား၊ ဆရာတွေနဲ့ ဝန်ထမ်းတွေရဲ့ လုံခြုံရေးအတွက် တနင်္လာနဲ့အ င်္ဂါမှာ ကျောင်းပိတ်ကြောင်း ကြေညာခဲ့ပြီး သင်ကြားမှုတွေကို အွန်လိုင်းကနေပဲ ပို့ချပေးသွားမယ်လို့ ကြေညာခဲ့တာပါ။

.

ကျောင်းအုပ်ကြီး သီတီဝတ်ရဲ့ ထုတ်ပြန်ချက်အရ အခုလို ကျောင်းပိတ်ထားရခြင်းက ပီတာလို့ ခေါ်တဲ့ အင်္ဂလိပ် ဘာသာ ဆရာတစ်ဦးရဲ့ ခြိမ်းခြောက်မှုကြောင့်ဖြစ်တယ်လို့ သိရပါတယ်။ ပီတာက ဇူလိုင် ၂၄ ရက်မှာ စာချုပ်ပါ စည်းကမ်းချက်တွေကို ချိုးဖောက်ခဲ့တာကြောင့် ကျောင်းအုပ်ချုပ်ရေးအဖွဲ့ရဲ့ အလုပ်ရပ်စဲမှုကို ခံခဲ့ရသူပါ။

.

အလုပ်က ရပ်စဲခံရပြီးတဲ့နောက် ပီတာက လူအများဝင်ရောက်အသုံးပြုနေတဲ့ ဆိုရှယ်ပလက်ဖောင်းအဖွဲ့တစ်ခုမှာ သေနတ်ကိုင်ထားတဲ့ဓာတ်ပုံ၊ စာသားတွေနဲ့ အသံဖိုင်တွေကို တင်ခဲ့တယ်လို့ ကျောင်းအုပ်ကြီးက ဆိုပါတယ်။ ဒီအကြောင်းအရာတွေက ကျောင်းသားတွေ၊ ဆရာတွေနဲ့ ကျောင်းအုပ်ချုပ်ရေးအဖွဲ့ကို ခြိမ်းခြောက်တဲ့သဘော ဖြစ်နေကြောင်း ကျောင်းဘက်က သတ်မှတ်ခဲ့တာပါ။

.

လက်ရှိမှာတော့ ဟတ်ယိုင်ခရိုင် ဖက်ကဆန်လမ်းမပေါ်မှာရှိတဲ့ စာသင်ကျောင်းကို ပိတ်ထားခဲ့ပြီး ခြိမ်းခြောက်မှု အပေါ် ရဲစခန်းဆီ တိုင်ကြားထားတယ်လို့ ကျောင်းအုပ်ကြီးက ဆိုပါတယ်။

.

ဟတ်ယိုင်ရဲတပ်ဖွဲ့ရဲ့ပြောဆိုချက်အရတော့ ပီတာ က ဇူလိုင် ၁၉ ရက်နေ့ကတည်းက ထိုင်းနိုင်ငံကနေ ထွက်ခွာ သွားပြီးတဲ့နောက် ပြန်လည်ဝင်ရောက်လာခြင်း မရှိသေးဘူးလို့ သိရပါတယ်။

.

ရဲတပ်ဖွဲ့ရဲ့အဆိုအရတော့ အလုပ်ထုတ်ခံရသူ ဆရာ က တောင်အာဖရိကနိုင်ငံသားဖြစ်ပြီး ဇူလိုင် ၁၉ ရက် နေ့လယ်ပိုင်းမှာ ဆောင်ခလာပြည်နယ် နယ်စပ်ဂိတ်ကနေတစ်ဆင့် ထိုင်းနိုင်ငံက ထွက်ခွာသွားခဲ့သလို ပြန်လည် ဝင်ရောက်လာခြင်းမရှိသေးဘူးလို့ သိရတာပါ။

.

ပီတာ နေထိုင်ခဲ့တဲ့ အဆောက်အအုံကို သွားရောက်စစ်ဆေးခဲ့ရာမှာလည်း အခန်းမှာ လူမရှိတော့တဲ့အကြောင်း ရဲတပ်ဖွဲ့က တွေ့ရှိခဲ့ရပါတယ်။

.

ပီတာက ကျောင်းရဲ့ LINE အဖွဲ့စကားပြောခန်းထဲမှာ သေနတ်ပစ်နေတဲ့ သူ့ရဲ့ဓာတ်ပုံတွေနဲ့ ကျောင်းအုပ်ချုပ်ရေး အဖွဲ့ဝင်တွေရဲ့ ပုံတွေကို တင်ပြီး ခြိမ်းခြောက်စာတွေ ရေးခဲ့တာဖြစ်တယ်လို့လည်း သိရပါတယ်။ အဲဒီ စကားပြော ခန်းထဲမှာ အသုံးပြုသူ ၅၀၀၀ ကျော်ရှိနေပြီး ပီတာက ကျောင်းအုပ်ချုပ်ရေးအဖွဲ့ကိုလည်း ဝေဖန်ခဲ့တဲ့အကြောင်း ရဲတပ်ဖွဲ့ က ပြောဆိုထားပါတယ်။

.

Source – Bangkok Post

.