.
၂၀၂၆ ခုနှစ်၊ ဩဂုတ်လ ၉ ရက်
.
ရှမ်းပြည်နယ်တောင်ပိုင်း၊ တောင်ကြီးမြို့နယ်၊
အေးသာယာမြို့တွင် ယမန်နေ့ ဩဂုတ်လ ၈ ရက်၊ ညနေပိုင်းက အမျိုးသား ၄ ဦးအား စိတ်ကြွရူးသွပ်ဆေးပြား
၅၀၀ နှင့်အတူ ဖမ်းဆီးရမိခဲ့ကြောင်း သိရသည်။
.
တောင်ကြီးခရိုင်မှုခင်းနှိမ်နင်းရေးရဲတပ်ဖွဲ့ဝင်များ
ပါဝင်သော ပူးပေါင်းအဖွဲ့သည် ယမန်နေ့ ဩဂုတ်လ ၈ ရက်၊ ညနေ ၄ နာရီခွဲခန့်က
အေးသာယာမြို့၊ အမှတ် (၆) ရပ်ကွက်၊ မြို့ဦးကျောင်းလမ်းသွယ်ရှိ နေအိမ်တစ်အိမ်အား
မူးယစ်ဆေးဝါး ရောင်းချနေကြောင်း သတင်းအရ ဝင်ရောက်ရှာဖွေခဲ့ကြောင်း သိရသည်။
.
ထိုသို့ ရှာဖွေရာ နေအိမ်အတွင်း အိမ်ရှင်ဖြစ်သူ
ဇာနီဦး (ခ) အဂျမ်း နှင့်အတူ စံလင်း (ခ) ဖိုးလုံး၊ သီဟဇော်၊ ခွန်ပြည့်ဖြိုးအောင် (ခ)
ညီညီ တို့ ၄ ဦးအား ဝိုင်းဖွဲ့ထိုင်လျက် တွေ့ရှိရပြီး ၎င်းတို့
ဝိုင်းဖွဲ့ထိုင်နေသည့် အိပ်ရာပေါ်တွင် စိတ်ကြွမူးယစ်ဆေးဝါး ၂၀၀ ပြားပါ ၁ ထုပ်၊ ၁၀၀
ပြားပါ ၁ ထုပ်၊ ဂတ်စ်မီးခြစ် ၂ လုံး၊ မူးယစ်ဆေးဝါး သုံးစွဲရာတွင် အသုံးပြုရန်
ပြုလုပ်ထားသည့် ပလတ်စတစ် အအေးဘူးခွံ ၂ ခု၊ အဖြူရောင်ခဲပြား ပေါ်တွင် သုံးလက်စ
စိတ်ကြွမူးယစ်ဆေးပြား ၁ ပြားစီပါသည့် ခဲပြားအပိုင်း ၂ ခု၊ ဇာနည်ဦး (ခ) အဂျမ်း ၏
ခန္ဓာကိုယ်တွင် လွယ်ထားသော ဘေးလွယ်အိတ်အတွင်းမှ စိတ်ကြွမူးယစ်ဆေးဝါး ၂၀၀ ပြားပါ ၁ ထုပ်
တို့အား ဖမ်းဆီးရမိခဲ့ကြောင်း သိရသည်။
.
“ဖမ်းမိတာ ဟုတ်ပါတယ်။ မူးယစ်ဥပဒေနဲ့
အမှုဖွင့်ထားပါတယ်” ဟု တာဝန်ရှိသူတစ်ဦးက ပြောသည်။
.
အဆိုပါ မူးယစ်ဆေးဝါးများ ဖမ်းဆီးရမိမှုနှင့်
ပတ်သက်၍ ဇာနည်ဦး (ခ) အဂျမ်း၊ စံလင်း (ခ) ဖိုးလုံး၊ သီဟဇော် နှင့်
ခွန်ပြည့်ဖြိုးအောင် (ခ) ညီညီ တို့ ၄ ဦးအား အေးသာယာနယ်မြေရဲစခန်းတွင်
မူးယစ်ဆေးဝါးနှင့် စိတ်ကို ပြောင်းလဲစေသော ဆေးဝါးများဆိုင်ရာဥပဒေပုဒ်မ ၁၉ (က)/၂၁ ဖြင့်
အမှုဖွင့်အရေးယူ ဆောင်ရွက်လျက် ရှိကြောင်း သိရသည်။
.
No comments:
Post a Comment