ဟိုပုံးမြို့နယ်တွင် တရားမဝင် သယ်ဆောင်လာသည့် ကျွန်းပြတင်း တံခါးချပ် ၃၀၀ ကျော် ဖမ်းမိ

.

၂၀၂၆ ခုနှစ်၊ စက်တင်ဘာလ ၈ ရက်

.

ရှမ်းပြည်နယ်တောင်ပိုင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ဟိုပုံးမြို့နယ်တွင် စက်တင်ဘာလ ၅ ရက်၊ ညပိုင်းက တရားမဝင် သယ်ဆောင်လာသည့် ကျွန်းပြတင်း၊ တံခါးချပ် ၃၀၀ ကျော်ကို ဖမ်းဆီးရမိခဲ့ကြောင်း သိရသည်။

.

.

ဟိုပုံးမြို့မရဲစခန်းမှ တပ်ဖွဲ့ဝင်များ ပါဝင်သော ပူးပေါင်းအဖွဲ့သည် စက်တင်ဘာလ ၅ ရက်၊ ည ၁၀ နာရီခွဲ ခန့်က ဟိုပုံးမြို့နယ်၊ လွယ်အွန့်ကျေးရွာအုပ်စု၊ လွယ်အွန့်ကျေးရွာအနီး၊ ပအိုဝ်းမတောင်ခြေ မြေသား ကွင်းလမ်းတွင် လှည့်ကင်းဆောင်ရွက်နေစဉ် ဆီဆိုင်မြို့ဘက်မှ တောင်ကြီးမြို့ဘက်သို့ ယာဉ်မောင်း ရန်ပိုင်အောင် မောင်းနှင်ပြီး ငြိမ်းချမ်းအောင်နှင့် ကောင်းစစ်ဇော်တို့ လိုက်ပါစီးနင်းလာသည့် TOYOTA HIACE အမျိုးအစား မီးခိုရောင်ယာဉ်အား ရပ်တန့်စစ်ဆေးခဲ့ကြောင်း သိရသည်။

.

ထိုသို့ စစ်ဆေးရာတွင် ယာဉ်ပေါ်၌ တရားမဝင် သယ်ဆောင်လာသည့် ကျွန်းတံခါးချက်များအား စိစစ် တွေ့ရှိရ သဖြင့် ဖမ်းဆီးထိန်းသိမ်းခဲ့ပြီး ကျွန်းတံခါးချပ်များအား ခွဲခြားတိုင်းထွာစစ်ဆေးခဲ့ရာ ကျွန်းပြတင်း တံခါးရွက်ဆိုဒ်စုံ ၁၉၆ ချပ်၊ ကျွန်းလေကာပြတင်း ၁၄၅ ချပ်၊ စုစုပေါင်း ကျွန်းပြတင်း တံခါးရွက်/လေကာ ပြတင်းဆိုဒ်စုံ ၃၄၁ ချပ်၊ အလေးချိန် ၃ ဒသမ ၂၂၈ တန်၊ တန်ဖိုး ၉၆၈၄ဝဝဝ ကျပ်ခန့်အား ဖမ်းဆီးရမိခဲ့ ကြောင်း သိရသည်။

.

အဆိုပါ တရားမဝင် ကျွန်းတံခါးချပ်များ သယ်ဆောင်လာသူ ရန်ပိုင်အောင်၊ ငြိမ်းချမ်းအောင်နှင့် ကောင်းစစ်ဇော် တို့ ၃ ဦးအား ဟိုပုံးမြို့မရဲစခန်းတွင် အမှုဖွင့်လှစ် စစ်ဆေးဆောင်ရွက်လျက်ရှိကြောင်း သိရသည်။

.