ချန်ပီယံခါးပတ်ကို ဒုတိယအကြိမ် ကာကွယ်ခဲ့တဲ့ ဗန်

.

၂၀၂၆ ခုနှစ်၊ စက်တင်ဘာလ ၂၀ ရက်

.

UFC Flyweight ချန်ပီယံ ဂျော့ရှုဝါဗန် ဟာ အမေရိကန်၊ လော့စ်အိန်ဂျယ်လိစ်မှာ ပြုလုပ်တဲ့ UFC 331 ပြိုင်ပွဲမှာ အရင်ချန်ပီယံဟောင်း ပန်တိုဂျာ ကို ဒိုင် အဆုံးအဖြတ်နဲ့ အနိုင်ယူပြီး ချန်ပီယံခါးပတ်ကို ဒုတိယအကြိမ် ကာကွယ်နိုင်ခဲ့ပြန်ပါတယ်။

.

.

UFC 331 ၏ အဓိက ယှဉ်ပြိုင်ပွဲဖြစ်တဲ့ ဒီပြိုင်ပွဲမှာ ပန်တိုဂျာဟာ ဗန်ကို ချုပ်ကွက်နဲ့ အနိုင်ယူဖို့ ကြိုးစားခဲ့တာကို တွေ့မြင်ရပြီး ဗန်ကလည်း မတ်တပ်ရပ်ပြီး လက်သီး တွဲဆိုင်းတွေကို အသုံးပြုခဲ့တာပါ။ ဗန်က ပန်တိုဂျာ ကို ငါးချီမြောက်မှာ ချုပ်ကွက်နဲ့ ပွဲသိမ်းဖို့ ကြိုးစားခဲ့သေးပေမယ့် အလုပ် မဖြစ်ခဲ့ပါဘူး။

.

ချန်ပီယံဟောင်း ပန်တိုဂျာကတော့ ဗန်နဲ့ ပထမဆုံး ယှဉ်ပြိုင်ခဲ့တဲ့ ပွဲမှာ ဒဏ်ရာ ရပြီး ချန်ပီယံ ခါးပတ်ကို လက်လွှတ်ပေးခဲ့ရတာ ဖြစ်ပြီး အခု ဒုတိယအကြိမ် ဖြစ်တဲ့ မကြေပွဲမှာလည်း ဗန်ရဲ့ အရှိန်အဟုန်နဲ့ တိုက်စစ်ဆင်ခဲ့မှု အောက်မှာ ဒိုင်လူကြီးတွေရဲ့ အမှတ်ပေး ဆုံးဖြတ်ချက်နဲ့ ရှုံးပွဲ ထပ်တွေ့ခဲ့တာပါ။

.

မြန်မာပြည်နွယ်ဖွား ချင်းတိုင်းရင်းသား ရှုဝါဗန်ဟာ UFC သမိုင်းတလျှောက် ဒုတိယ အသက်အငယ်ဆုံး ချန်ပီယံလည်း ဖြစ်၊ အာရှရဲ့ ပထမဆုံး အမျိုးသားချန်ပီယံလည်း ဖြစ်တယ်ဆိုတာကို ထပ်ပြီး သက်သေပြခဲ့တာလည်း ဖြစ်ပါတယ်။

.