ကုန်ကျစရိတ် မြင့်တက်လာသော်လည်း ပြိုင်ပွဲဝင် မီးပုံးပျံအလုံးရေ ပိုမို များပြားလာနိုင်

.

၂၀၂၆ ခုနှစ်၊ စက်တင်ဘာလ ၆ ရက်

.

မီးပုံးပျံ ပြုလုပ်ရန်အတွက် ရှမ်းစက္ကူနှင့် ယမ်းပစ္စည်းများ ဈေးနှုန်း မြင့်တက်လာသဖြင့် ကုန်ကျစရိတ်များ မြင့်တက်လာနေသော်လည်း ယခုနှစ် တောင်ကြီးတန်ဆောင်တိုင်ပွဲတော် မီးပုံးပျံပြိုင်ပွဲတွင် ပြိုင်ပွဲဝင် မီးပုံးပျံ အရေအတွက် ယခင်နှစ်ထက် ပိုမိုများပြားလာနိုင်သည်ဟု သိရသည်။

.

.

ပြိုင်ပွဲဝင် မီးပုံးပျံ အရေအတွက် များပြားလာမည်ဖြစ်သော်လည်း ပြိုင်ပွဲနှင့်ပတ်သက်၍ အစည်းအဝေး တစ်စုံတစ်ရာ ခေါ်ယူခြင်း မရှိသေးသဖြင့် လက်ရှိအချိန်အထိ ပြိုင်ပွဲဝင် မီးပုံးပျံအရေအတွက်ကို အတိအကျ မသိရှိရသေးကြောင်း မီးပုံးပျံအဖွဲ့များထံက သိရသည်။

.

“အရင် မီးအဖွဲ့ဟောင်းတွေလည်း ပြန်ဝင်လာတာရှိတယ်။ အစည်းအဝေးမခေါ်သေးတော့ အတိအကျ မသိရသေးဘူး။ လောလောဆယ် လုပ်နေတာ ညမီးကြီး ကို အလုံး ၄၀ ကျော်၊ ၅၀ လောက် ရှိပါတယ်” ဟု ပြိုင်ပွဲဝင် မီးပုံးပျံအဖွဲ့ဝင်တစ်ဦးက ပြောသည်။

.

မီးပုံးပျံ ကိုယ်ထည်ပြုလုပ်ရာတွင် အဓိကအသုံးပြုသည့် ရှမ်းစက္ကူဈေးနှုန်းများမှာ ယခင်နှစ်ထက် သိသိသာသာ ဈေးနှုန်း မြင့်တက်သွားပြီး ယခင်က ရှမ်းစက္ကူတစ်ရွက်လျှင် ၄၀၀ မှ ၅၀၀ ကျပ်သာ ရှိသော်လည်း ယခုနှစ်တွင် ရှမ်းစက္ကူတစ်ရွက်လျှင် ၁၈၀၀ မှ ၂၀၀၀ ကျပ်ဝန်းကျင်အထိ ဈေးတက်သွားကာ မီးပုံးပျံတစ်လုံးလျှင် ရှမ်းစက္ကူ အရွက်ရေ ၁၀၀၀ ခန့် အသုံးပြုရသည်ဟု သိရသည်။

.

ထို့အပြင် မီးပုံးပျံကိုယ်ထည်တွင် အလှဆင် ရေးဆွဲသည့် ပန်းချီဆွဲခများမှာလည်း ယခင်နှစ်က ကျပ် ၃ သိန်းမှ ၄ သိန်းဝန်းကျင်သာ ကျသင့်ခဲ့သော်လည်း ယခုနှစ်တွင် ၇ သိန်းခန့် ကုန်ကျမည်ဖြစ်သည်ဟု သိရသည်။

.

ညမီးကြီး မီးပုံးပျံအတွက် လိုအပ်မည့် ယမ်းပစ္စည်းများ ဝယ်ယူရာတွင်မူ အခက်အခဲ မရှိဘဲ ကုန်ကျစရိတ် မြင့်တက်လာမှုသာ ရှိကြောင်း မီးပုံးပျံအဖွဲ့များက ပြောဆိုကြသည်။

.

“ယမ်းကတော့ ဌာနဆိုင်ရာက လက်မှတ်ပေးထားတယ်။ ဝယ်လို့ရတယ်။ အခက်အခဲမရှိပါဘူး။ သူတို့ (ဌာနဆိုင်ရာက) ထုတ်ပေးတာလည်း များပါတယ်။ အဓိက ကတော့ ဈေးကြီးလာတော့ ငွေကြေးပဲ အခက်အခဲရှိပါတယ်” ဟု မီးပုံးပျံ ပြုလုပ်နေသူတစ်ဦးကလည်း ပြောဆိုခဲ့သည်။

.

ယင်းကဲ့သို့ အထွေထွေကုန်ကျစရိတ်များ မြင့်တက်လာသည့်အတွက် ယခုနှစ်တွင် ညမီးကြီး မီးပုံးပျံတစ်လုံး လျှင် ကျပ်သိန်း ၄၀၀ မှ ၄၅၀ အထိ ကုန်ကျနိုင်ပြီး စိန်နားပန် မီးပုံးပျံတစ်လုံးလျှင် ကျပ်သိန်း ၇၀ ခန့်အထိ ကုန်ကျနိုင်မည်ဖြစ်ကြောင်း သိရသည်။

.

အထွေထွေ ကုန်ကျစရိတ် မြင့်တက်လာနေသော်လည်း ပြိုင်ပွဲဝင် မီးပုံးပျံအဖွဲ့များ အနေဖြင့် ရိုးရာ အစဉ်အလာကို ထိန်းသိမ်းသည့်အနေဖြင့် မီးပုံးပျံပြိုင်ပွဲ ဝင်ရောက်ယှဉ်ပြိုင်နိုင်ရန် ပြင်ဆင်ဆောင်ရွက်လျက် ရှိသည်ဟု သိရသည်။

.

“မီးပုံးပျံ အရေအတွက်က အရင်နှစ်ထက် များလာနိုင်ပေမဲ့ ဟိုးအရင် ကိုဗစ်ကာလ မတိုင်မီက အရေအတွက်လောက်တော့ ရှိနိုင်မှာ မဟုတ်ဘူးပေါ့” ဟု ဒေသခံတစ်ဦးကလည်း ပြောဆိုခဲ့သည်။

.

ယခုနှစ် ၂၀၂၆ ခုနှစ်၊ တောင်ကြီးတန်ဆောင်တိုင်ပွဲတော်ကို နိုဝင်ဘာလလယ်ခန့်တွင် စတင်ကျင်းပပြုလုပ် သွားမည်ဖြစ်ပြီး မီးပုံးပျံပြိုင်ပွဲ ဝင်ရောက်ယှဉ်ပြိုင်မည့် ညမီးကြီးနှင့် စိန်နားပန် မီးပုံးပျံအဖွဲ့များက မီးပုံးပျံ နှင့် ယမ်းလုပ်ငန်းများကို စတင်ဆောင်ရွက်နေခြင်းဖြစ်ကြောင်း သိရသည်။

.

ပြီးခဲ့သည့် ၂၀၂၅ ခုနှစ်၊ တောင်ကြီးမြို့တော် တန်ဆောင်တိုင်ပွဲတော် မီးပုံးပျံပြိုင်ပွဲတွင် ပြိုင်ပွဲဝင် ညမီးကြီးနှင့် စိန်နားပန် မီးပုံးပျံ စုစုပေါင်း အလုံးရေ ၈၀ ကျော် ဝင်ရောက်ယှဉ်ပြိုင်ခဲ့ကြောင်း သိရသည်။

.

COVID-19 ကပ်ရောဂါ မဖြစ်ပွားမီ ၂၀၁၉ ခုနှစ်က တောင်ကြီးတန်ဆောင်တိုင်ပွဲတော် မီးပုံးပျံပြိုင်ပွဲတွင် ညမီးကြီး မီးပုံးပျံ ၇၉ လုံး၊ စိန်နားပန် မီးပုံးပျံ  ၃၆ လုံး၊ နေ့လွှတ်အရုပ် မီးပုံးပျံ  ‌ခြေ ၂ ချောင်း ၁၅၀ လုံး၊ ခြေ ၄ ချောင်း ၉၄ လုံး၊ အုပ်စု ၃၅ လုံး၊ စုစုပေါင်း မီးပုံးပျံ အရေအတွက် ၃၉၄ လုံး ဝင်ရောက်ယှဉ်ပြိုင် လွှတ်တင်ခဲ့သည်။

.