ဓာတ်မြေဩဇာ၊ LNG နှင့် ဒီဇယ်ဆီ တင်သွင်းမှုများအပေါ် အခွန်ကင်းလွတ်ခွင့် စက်တင်ဘာလကုန် အထိ ထပ်တိုး

.

၂၀၂၆ ခုနှစ်၊ စက်တင်ဘာလ ၂ ရက်

.

ဓာတ်မြေဩဇာ၊ သဘာဝဓာတ်ငွေ့ရည် (LNG) နှင့် ဒီဇယ်ဆီ HSD (500 ppm) တင်သွင်းမှုများအပေါ် အခွန်ကင်းလွတ်ခွင့်များကို စက်တင်ဘာ လကုန်အထိ ထပ်မံသက်တမ်းတိုးမြှင့်လိုက်ကြောင်း ဘဏ္ဍာရေးနှင့် အခွန်ဝန်ကြီးဌာနက ထုတ်ပြန်ထားသည်။

.

.

စိုက်ပျိုးရေးထုတ်လုပ်မှု ကုန်ကျစရိတ်လျှော့ချရေး၊ လျှပ်စစ်ဓာတ်အားထုတ်လုပ်မှု အထောက်အကူပြုရေးနှင့် အခြေခံစားသောက်ကုန်ဈေးနှုန်း တည်ငြိမ်ရေးတို့ကို အထောက်အကူပြုနိုင်ရန် ရည်ရွယ်၍ ယင်းကဲ့သို့ အခွန် ကင်းလွတ်ခွင့်ကို တိုးမြှင့်ပေးခြင်းဖြစ်ကြောင်း သိရသည်။

.

ဓာတ်မြေဩဇာတင်သွင်းမှုအတွက် ကောက်ခံသည့် ကြိုတင်ဝင်ငွေခွန် (၂ ရာခိုင်နှုန်း) ကင်းလွတ်ခွင့်ကို စိုက်ပျိုးရေးကဏ္ဍ စဉ်ဆက်မပြတ်ဖွံ့ဖြိုးတိုးတက်စေရန်နှင့် တောင်သူလယ်သမားများ၏ ကုန်ထုတ်လုပ်မှု စရိတ် လျော့ကျစေရန် ရည်ရွယ်၍ စက်တင်ဘာ ၃၀ ရက်အထိ ထပ်မံသက်တမ်းတိုးမြှင့်ပေးခြင်း ဖြစ်ကြောင်း သိရသည်။

.

ထို့ပြင် အရှေ့အလယ်ပိုင်းဒေသ ပဋိပက္ခများကြောင့် ကမ္ဘာ့စွမ်းအင်ဈေးနှုန်းများ မြင့်တက်နေသည့် အခြေအနေတွင် လျှပ်စစ်ဓာတ်အားထုတ်လုပ်မှု အထောက်အကူပြုရေးနှင့် ဓာတ်အားခသက်သာစေရေး အတွက် LNG တင်သွင်းမှုအပေါ် အကောက်ခွန်၊ ကုန်သွယ်လုပ်ငန်းခွန်နှင့် ကြိုတင်ဝင်ငွေခွန် ကင်းလွတ်ခွင့် များကိုလည်း စက်တင်ဘာ ၃၀ ရက်အထိ ထပ်မံတိုးမြှင့်ပေးထားကြောင်း သိရသည်။

.

အလားတူ အခြေခံစားသောက်ကုန်နှင့် ကုန်စည်ဈေးနှုန်းများ တည်ငြိမ်စေရန် ရည်ရွယ်၍ ဒီဇယ်ဆီ HSD (500 ppm) တင်သွင်းမှုအပေါ် အကောက်ခွန်၊ အထူးကုန်စည်ခွန်၊ ကုန်သွယ်လုပ်ငန်းခွန်နှင့် ကြိုတင် ဝင်ငွေခွန် (၂ ရာခိုင်နှုန်း) ကင်းလွတ်ခွင့်များကိုလည်း စက်တင်ဘာ ၃၀ ရက်အထိ ဆက်လက် သက်တမ်းတိုးမြှင့် ပေးခဲ့ကြောင်း သိရသည်။

.

အဆိုပါ အခွန်ကင်းလွတ်ခွင့်များသည် ၂၀၂၆ ခုနှစ် စက်တင်ဘာ ၃၀ ရက်အထိ အကောက်ခွန်ဦးစီးဌာနတွင် Import Declaration (ID) ဖွင့်လှစ်၍ တင်သွင်းသည့် ကုန်ပစ္စည်းများအပေါ် အကျုံးဝင်မည် ဖြစ်ကြောင်း ဘဏ္ဍာရေးနှင့် အခွန်ဝန်ကြီးဌာနက ထုတ်ပြန်ထားသည်။

.