ဘောလိဝုဒ်မင်းသား တိုင်ဂါး ရှရော့ဖ် မွမ်ဘိုင်းတွင် သေနတ်ဖြင့် ပစ်ခတ်ခံရမှုမှ လွတ်မြောက်

.

၂၀၂၆ ခုနှစ်၊ အောက်တိုဘာလ ၂၀ ရက်

.

အိန္ဒိယနိုင်ငံ မွမ်ဘိုင်းမြို့မှာ ဘောလိဝုဒ်မင်းသား တိုင်ဂါး ရှရော့ဖ်ကို သေနတ်နဲ့ ပစ်ခတ်ဖို့ ကြိုးစားမှု ဖြစ်ပွားခဲ့ ပေမဲ့ မင်းသားမှာ သေနတ်ဒဏ်ရာ မရခဲ့ဘူးလို့ ရဲတပ်ဖွဲ့က ပြောပါတယ်။

.

.

အသက် ၃၆ နှစ်အရွယ် တိုင်ဂါး ရှရော့ဖ်ဟာ တနင်္ဂနွေနေ့ညက ဂျူဟူးအရပ်မှာ ဘောလုံးကွင်းကနေ ကားနဲ့ ထွက်လာချိန် ပစ်ခတ်ခံခဲ့ရတာဖြစ်ပါတယ်။ ထွက်ပေါ်လာတဲ့ ဗီဒီယိုတွေအရ လူအုပ်ကြားကနေ ကားက ဖြည်းဖြည်းမောင်းထွက်လာချိန်မှာ လူနှစ်ဦးထက်မနည်းက ကားရဲ့ ရှေ့ခန်းဘက်ကို အနီးကပ် သေနတ်နဲ့ အကြိမ်ကြိမ် ပစ်ခတ်ခဲ့တာကို တွေ့ရပါတယ်။

.

ပစ်ခတ်မှုကြောင့် တိုင်ဂါး ရှရော့ဖ်ရဲ့ ယာဉ်မောင်းအပါအဝင် လူ ၂ ဦး ဒဏ်ရာရခဲ့တယ်လို့ ရဲတပ်ဖွဲ့က ပြော ပါတယ်။ ဒီဖြစ်စဉ်နဲ့ပတ်သက်ပြီး တနင်္လာနေ့မှာ ရာဂျက်စသန်ပြည်နယ်အတွင်း လူ ၃ ဦးကို ဖမ်းဆီး ထိန်းသိမ်းထားတယ်လို့ ဆိုပါတယ်။

.

အဆိုပါပစ်ခတ်မှုကြောင့် ဘောလိဝုဒ်လောကအတွင်း စိုးရိမ်မှုတွေ မြင့်တက်လာပြီး မင်းသားရဲ့ လုံခြုံရေး အတွက် သရုပ်ဆောင်တွေကလည်း စိုးရိမ်ကြောင်း ပြောဆိုနေကြပါတယ်။ မွမ်ဘိုင်းမြို့မှာလည်း မကြာသေးခင်နှစ်တွေက သရုပ်ဆောင်တွေနဲ့ နိုင်ငံရေးသမားတချို့ သေနတ်သမားတွေရဲ့ ပစ်ခတ် တိုက်ခိုက်မှုကို ခံခဲ့ရပါတယ်။

.

တိုင်ဂါး ရှရော့ဖ်ဟာ နာမည်ကြီး ဘောလိဝုဒ်မင်းသားဟောင်း ဂျက်ကီ ရှရော့ဖ်ရဲ့ သားဖြစ်ပြီး ၂၀၁၄ ခုနှစ်မှာ Heropanti ဇာတ်ကားနဲ့ ရုပ်ရှင်လောကထဲ စတင်ဝင်ရောက်ခဲ့ပါတယ်။ အက်ရှင်ဇာတ်ကားတွေမှာ အများအပြား ပါဝင်ခဲ့ပြီး အကနဲ့ ကိုယ်ခံပညာကျွမ်းကျင်မှုကြောင့် ပရိသတ်ကြား လူကြိုက်များသူလည်း ဖြစ်ပါတယ်။

.

ပစ်ခတ်မှုဖြစ်ချိန်မှာတော့ ပုံမှန်ဘောလုံးလေ့ကျင့်မှု ပြီးဆုံးပြီး ဘောလုံးကွင်းကနေ ပြန်ထွက်လာ တာဖြစ်ပါတယ်။ မဟာရက်ရှ်ထရာပြည်နယ် ဒုတိယဝန်ကြီးချုပ် အက်ခ်နတ် ရှင်ဒေးက ပစ်ခတ်မှုဖြစ်ပြီးနောက် တိုင်ဂါး ရှရော့ဖ်ကို သွားရောက်တွေ့ဆုံခဲ့ပြီး ဒီဖြစ်စဉ်ကြောင့် မင်းသား စိတ်ထိခိုက်တုန်လှုပ်ခဲ့တယ်လို့ ပြောပါတယ်။ ပြည်နယ်ဝန်ကြီးချုပ် ဒေဗန်ဒရာ ဖဒ်နာဗစ်ကလည်း ဒီဖြစ်စဉ်ဟာ ပြင်းထန်ပြီး ရှုတ်ချဖွယ်ဖြစ်တယ်လို့ ပြောကာ တာဝန်ရှိသူတွေကို မကြာခင် ဖမ်းဆီးမယ်လို့ ဆိုပါတယ်။

.

ရာဂျက်စသန်ရဲတပ်ဖွဲ့ရဲ့ အဆိုအရ ထိန်းသိမ်းထားသူ ၃ ဦးထဲက ၂ ဦးဟာ ဟာရီယာနာနဲ့ ဘီဟာပြည်နယ်တွေကဖြစ်ပြီး လွန်ခဲ့တဲ့နှစ်အနည်းငယ်ကတည်းက မွမ်ဘိုင်းမှာ နေထိုင်နေသူတွေ ဖြစ်ပါတယ်။ တတိယတစ်ဦးကတော့ အရွယ်မရောက်သေးသူ ဖြစ်ပါတယ်။ သူတို့ကို မွမ်ဘိုင်း ရဲတပ်ဖွဲ့ထံ လွှဲပြောင်းပေးသွားမယ်လို့ သိရပါတယ်။

.

All Indian Cine Workers Association ကလည်း ဒီတိုက်ခိုက်မှုကို ရှုတ်ချခဲ့ပြီး ရုပ်ရှင်လောကထဲက လူတွေကို ရာဇဝတ်ဂိုဏ်းတွေက ရည်ရွယ်ချက်ရှိရှိ ပစ်မှတ်ထားကာ ကြောက်ရွံ့မှုတွေ ဖန်တီးပြီး ငွေညှစ်ဖို့ ကြိုးစားနေ တယ်လို့ စွပ်စွဲပါတယ်။

.

ပစ်ခတ်မှုနောက်ကွယ်မှာ ဘယ်သူတွေ ပါဝင်တယ်ဆိုတာကို ရဲတပ်ဖွဲ့က အတည်ပြုထားခြင်း မရှိသေးပါဘူး။ ဒါပေမယ့် အိန္ဒိယမီဒီယာတွေမှာတော့ လောရင့်စ် ဘစ်ရှနွိုင်း ရာဇဝတ်ဂိုဏ်းနဲ့ ဆက်နွှယ်သူတစ်ဦးက ပစ်ခတ်မှုကို သူတို့လုပ်တာဖြစ်တယ်လို့ ပြောထားတဲ့ အသံဖိုင်တစ်ခု ထွက်ပေါ်လာတယ်လို့ ဖော်ပြနေကြပါတယ်။

.

အဲဒီအသံဖိုင်ရဲ့ အမှန်တကယ်ဖြစ်မှုနဲ့ ပြောဆိုချက် တွေကိုတော့ သီးခြားအတည်ပြုနိုင်ခြင်း မရှိသေးသလို ရဲတပ်ဖွဲ့ကလည်း အဆိုပါဂိုဏ်း ပါဝင်ပတ်သက်မှုကို အတည်ပြုထားခြင်း မရှိသေးပါဘူး။

.

Ref – BBC

.