စဝ်စံထွန်းဆေးရုံဝင်းအတွင်း အမျိုးသားတစ်ဦးထံမှ စိတ်ကြွရူးသွပ်ဆေးပြားများ ဖမ်းမိ

.

၂၀၂၆ ခုနှစ်၊ အောက်တိုဘာလ ၁၁ ရက်

.

ရှမ်းပြည်နယ်မြို့တော် တောင်ကြီးမြို့၊ စဝ်စံထွန်းရပ်ကွက်ရှိ စဝ်စံထွန်းပြည်သူ့ဆေးရုံဝင်းအတွင်း အောက်တိုဘာလ ၉ ရက်၊ နေ့လယ်ပိုင်းက အမျိုးသားတစ်ဦးထံမှ စိတ်ကြွရူးသွပ်ဆေးပြားများ ဖမ်းဆီး ရမိခဲ့ကြောင်း သိရသည်။

.

.

တောင်ကြီးနယ်မြေရဲစခန်း တပ်ဖွဲ့ဝင်များ ပါဝင်သော ပူးပေါင်းအဖွဲ့သည် အောက်တိုဘာလ ၉ ရက်၊ နေ့လယ် ၁၂ နာရီခွဲခန့်က မူးယစ်ဆေးဝါး သတင်းအရ တောင်ကြီးမြို့၊ စဝ်စံထွန်းဆေးရုံဝင်းအတွင်းရှိ အရိုးကုသဆောင် ရှေ့တွင် စောင့်ဆိုင်းနေစဉ် ဖြတ်သန်းလာသည့် CANDA 125 အမျိုးအစား အနီ/အနက်ကြား ဆိုင်ကယ်စီးနင်းလာသူအား ရပ်တန့်စစ်ဆေးခဲ့ကြောင်း သိရသည်။

.

ထိုသို့ စစ်ဆေးရာတွင် ဆိုင်ကယ်စီးနင်းလာသူမှာ တောင်ကြီးမြို့၊ ကံကြီးရပ်ကွက်နေ သိန်းဌေး ဆိုသူဖြစ်ကြောင်း သိရပြီး ၎င်းလွယ်ထားသည့် လွယ်အိတ်အတွင်းမှ WY စာတမ်းပါ ပန်းရောင်စိတ် ကြွမူးယစ် ဆေးပြား ၂၀၀ ပြား စီပါ ၃ ထုပ်၊ စုစုပေါင်း ဆေးပြား ၆၀၀၊ ကာလတန်ဖိုး ၃၀၀၀၀၀ ကျပ်အား ဖမ်းဆီးရမိ ခဲ့ခြင်းဖြစ်ကြောင်း သိရသည်။

.

အဆိုပါ တရားမဝင် မူးယစ်ဆေးဝါးများအား သုံးစွဲရန်နှင့် ရောင်းချရန်အလို့ငှာ လက်ဝယ်တွေ့ရှိသူ သိန်းဌေး အား တောင်ကြီးနယ်မြေရဲစခန်းတွင် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေ ပုဒ်မ ၁၉ (က) ဖြင့် အမှုဖွင့်အရေးယူ ဆောင်ရွက်လျက်ရှိကြောင်း သိရသည်။

.