တောင်ကြီးမြို့ဝင်ဘီးခွန် ရုတ်တရက် တိုးမြှင့်လိုက်သည့်အတွက် ယာဉ်ပိုင်ရှင်များ အခက်ကြုံ

.

၂၀၂၆ ခုနှစ်၊ အောက်တိုဘာလ ၂၂ ရက်

.

မြို့နယ်စည်ပင်သာယာရေးဌာနမှ ကောက်ခံလျက်ရှိသည့် မြို့ဝင်ဘီးခွန်များကို ရုတ်တရက် တိုးမြှင့်ကောက်ခံ လိုက်သည့်အတွက် ယာဉ်ပိုင်ရှင်များ အခက်အခဲဖြစ်ပေါ်နေရကြောင်း သိရသည်။

.

.

တောင်ကြီးမြို့ရှိ ကုန်းလမ်းပို့ဆောင်ရေး ညွှန်ကြားမှုဦးစီးဌာနရုံးတွင် မော်တော်ယာဉ်သက်တမ်းတိုး ဆောင်ရွက်ရာ၌ စည်ပင် ဘီးခွန်များကိုပါ တစ်ပါတည်း ကောက်ခံနေခြင်းဖြစ်ပြီး ယခုကဲ့သို့ ဘီးခွန်ကြေး ရုတ်တရက် တိုးမြှင့်လိုက်သည့်အတွက် အခက်အခဲ ဖြစ်ပေါ်နေရခြင်းဖြစ်ကြောင်း သိရသည်။

.

“၂ နှစ်စာကို အရင်က ၂ သောင်းကျော်ပဲ ကျတာ အခုက အိမ်စီးကားကို ၁၇၀၀၀၀ ကျတယ်။ အင်ဂျင်ပါဝါကို မူတည်ပြီး ကောက်တာပါ။ ကညန သက်တမ်းတိုးခထက် စည်ပင်ဘီးခွန်က ပိုများနေတယ်။ အရင်က အဲဒီလောက် မများဘူး။ တချို့ဆိုရင် မသိတော့ ပိုက်ဆံမလောက်လို့ ဒုက္ခတွေ ရောက်နေတယ်” ဟု ကညန ရုံးတွင် မော်တော်ယာဉ်လိုင်စင် သက်တမ်းတိုး သွားရောက်ဆောင်ရွက်ခဲ့သည့် ယာဉ်ပိုင်ရှင် တစ်ဦးက ပြောသည်။

.

စည်ပင်သာယာရေးဌာနမှ ကညနရုံးအနီး သံလမ်းဘေးတွင် ဂိတ်တဲဖွင့်လှစ်ကာ လိုင်စင်သက်တမ်းတိုး လာရောက်ဆောင်ရွက်သည့် ယာဉ်များကို ဘီးခွန် တစ်ပါတည်း ကောက်ခံနေခြင်း ဖြစ်ကြောင်း သိရသည်။

.

“လုပ်ငန်းသုံး နံပါတ်အနီကားတွေကို တစ်နှစ်စာ၊ နံပါတ်အနက် အိမ်စီးကားတွေကို ၂ နှစ်စာ ကောက်ပါ တယ်။ ရုတ်တရက် အဆပေါင်းများစွာ ဈေးတက်သွားတော့ ယာဉ်ပိုင်ရှင်တွေ ဒုက္ခရောက်တာပေါ့” ဟု ယာဉ်မောင်း တစ်ဦးကလည်း ပြောဆိုခဲ့သည်။

.

ထို့အတူ ဆိုင်ကယ် တစ်စီးလျှင် ၂ နှစ်စာအတွက် ဘီးခွန် ၉၀၀၀ ကျပ် ပေးဆောင်နေရသည်ဟု သိရသည်။

.

“အရင်တုန်းကတော့ ဆိုင်ကယ်တွေက ဘီးခွန်ဆောင်စရာမလိုသလို ဂိတ်ဖြတ်တဲ့အခါမှာလည်း ပေးစရာ မလိုပါဘူး။ ဆိုင်ကယ်တွေအတွက်တော့ သိပ်မများဘူး ဆိုပေမဲ့ ကားက သိန်းဂဏန်းဆိုတော့ အခက်အခဲ ဖြစ်တာပေါ့” ဟု ဒေသခံတစ်ဦးကလည်း ၎င်း၏အမြင်ကို ပြောဆိုခဲ့သည်။

.

အဆိုပါကိစ္စနှင့် ပတ်သက်၍ ‌တောင်ကြီးမြို့နယ် စည်ပင်သာယာရေးဌာန တာဝန်ရှိသူတစ်ဦးက “ဘီးခွန် နှုန်းထားတွေကို အရင် နှစ်ပေါင်းများစွာကတည်းက သတ်မှတ်ထားတဲ့ နှုန်းထားတွေအတိုင်း ကောက်ခံ လာခဲ့ရာကနေ နှုန်းထားပြောင်းလဲကောက်ခံဖို့ တင်ပြပြီး ပြည်နယ်အစိုးရရဲ့ ခွင့်ပြုချက်အရ အောက်တိုဘာ ၁၉ ရက်မှာ စပြီး တိုးမြှင့်ကောက်ခံတာ ဖြစ်ပါတယ်” ဟု ပြောဆိုခဲ့သည်။

.

ယခင်က ဘီးခွန်ကို ယာဉ်တန်ချိန်အလိုက် ကောက်ခံခဲ့သော်လည်း ယခုအခါ အင်ဂျင်ပါဝါအလိုက် သတ်မှတ်ကောက်ခံနေခြင်းဖြစ်ပြီး ကောက်ခံရရှိငွေများကို မြို့ဖွံ့ဖြိုးတိုးတက်ရေး လုပ်ငန်းများတွင် ပြန်လည် အသုံးပြုသွားမည်ဖြစ်ကြောင်း ၎င်းထံက သိရသည်။

.