မြို့တော် တောင်ကြီးတွင် ဆိုင်ကယ်ခိုးယူခံရမှုများ မကြာခဏ ဖြစ်ပွားနေ

.

၂၀၂၆ ခုနှစ်၊ အောက်တိုဘာလ ၂၁ ရက်

.

ရှမ်းပြည်နယ်မြို့တော် တောင်ကြီးမြို့တွင် ဆိုင်ကယ်ခိုးယူခံရမှုများ မကြာခဏဆိုသလို ဖြစ်ပွားနေပြီး ခိုးယူ ခံရသည့်ဆိုင်ကယ် ပြန်လည်ရရှိမှုနှင့် ခိုးယူသူများကို ဖမ်းဆီးရရှိမှု မရှိသလောက် နည်းပါးကြောင်း ဒေသခံများထံက သိရသည်။

.

.

ယမန်နေ့ အောက်တိုဘာလ ၂၀ ရက်၊ နေလယ် ၂ နာရီခွဲခန့်က တောင်ကြီးမြို့၊ ကံရှေ့ရပ်ကွက်၊ အရှေ့မြို့ပတ် လမ်းပေါ်တွင် တက္ကသိုလ်ကျောင်းသူတစ်ဦး စီးနင်းလာသည့် ဆိုင်ကယ် ခိုးယူခံရမှု ဖြစ်ပွားခဲ့ပြီး ဆိုင်ကယ် ပိုင်ရှင် ကျောင်းသူမှ မိုးခိုနေစဉ် ၁၅ မိနစ်ခန့်အတွင်း ခိုးယူခံခဲ့ရခြင်းဖြစ်ကြောင်း သိသည်။

.

“ဆိုင်ကယ်ပျောက်တာကတော့ နေ့တိုင်းကို ဖြစ်နေတာပါပဲ။ အထူးသဖြင့် မရှိလို့ လိုင်စင်မဲ့ ဝယ်စီးရတဲ့သူ တွေဆိုရင် ပိုဒုက္ခရောက်ရတာပေါ့။ လိုင်စင်ဘီး မတတ်နိုင်လို့ Wtihout လေး စီးပါတယ်၊ အခိုးခံရတော့လည်း လိုင်စင်မပါတော့ တိုင်လို့မရ၊ ဒီအတိုင်းပဲ ထိုင်ကြည့်နေရတယ်” ဟု ဆိုင်ကယ်ခိုးယူခံရသူတစ်ဦးက ကမ္ဘောဇတိုင်းသို့ ပြောသည်။

.

ယခု အောက်တိုဘာလအတွင်း ဆိုင်ကယ်ခိုးယူမှုများ နေ့စဉ်လိုလို ကြားသိနေရပြီး လမ်းဘေးတွင် ရပ်ထား သည့် ဆိုင်ကယ်များအပြင် နေအိမ်ခြံဝင်းအတွင်းမှ ဆိုင်ကယ်များ၊ ရပ်ကွက်အုပ်ချုပ်ရေးမှူးရုံးများနှင့် ဌာနဆိုင်ရာရုံးများတွင် ရပ်တန့်ထားသည့် ဆိုင်ကယ်များလည်း ခိုးယူခံနေရခြင်းဖြစ်ကာ ပြီးခဲ့သည့် အောက်တိုဘာ ၁၇ ရက်၊ ညပိုင်းက တောင်ကြီးမြို့၊ မင်္ဂလာဦးရပ်ကွက်ရှိ ဝန်ထမ်းအိမ်ရာတစ်ခုတွင် ရပ်တန့်ထားသည့် ဆိုင်ကယ်တစ်စီး ခိုးယူခံရမှု ဖြစ်ပွားခဲ့သေးကြောင်း သိရသည်။

.

“အခုခေတ်မှာ အစစအရာရာ ကုန်ဈေးနှုန်း ကြီးနေတော့ ဆိုင်ကယ်တစ်စီး ဖြစ်လာဖို့ဆိုတာ မလွယ်ပါဘူး။ ခိုးမှုတွေကလည်း နေ့တိုင်းလိုလို ဖြစ်နေတော့ အားလုံး ဂရုစိုက်ကြဖို့ လိုပါတယ်” ဟု တောင်ကြီးမြို့၊ ကျောင်းကြီးစုရပ်ကွက်နေ ဒေသခံတစ်ဦးကလည်း ၎င်း၏အမြင်ကို ပြောဆိုခဲ့သည်။

.

ယင်းကဲ့သို့ ဆိုင်ကယ်ခိုးယူမှုများအပြင် ဆိုင်ကယ်ခိုးယူခံရသူကို ဆက်သွယ်ကာ ငွေကြေးလိမ်လည် တောင်းခံမှုများလည်း ရှိလာနေသည့်အတွက် သတိပြုရန် လိုအပ်နေသည်ဟု ဒေသခံများက ပြောဆိုကြ သည်။

.

“ဆိုင်ကယ် အခိုးခံရတဲ့သူက သူ့ဆိုင်ကယ်ကို တွေ့ရင် ဆက်သွယ်ပါ ဆိုပြီး ဖုန်းနံပါတ် တင်ထားတယ်။ လူလိမ် ကျားဖြန့်တွေက အဲဒီနံပါတ်ကို ဆက်သွယ်ပြီး ဆိုင်ကယ်ကိုတွေ့ထားပါပြီ။ ငွေဘယ်လောက် လွှဲပေးပါ ဆိုတာမျိုးတွေလည်း ရှိလာတယ်။ အဲဒါတွေကိုလည်း ဂရုစိုက်ဖို့ လိုပါတယ်” ဟု အခြား ဒေသခံတစ်ဦးက ပြောဆိုခဲ့သည်။

.

ယင်းကဲ့သို့ ဆိုင်ကယ်ခိုးယူခံရမှုများ မကြာခဏ ဖြစ်ပွားနေသည့်အတွက် ဆိုင်ကယ်ပိုင်ရှင်များအနေဖြင့် မိမိတို့၏ ဆိုင်ကယ်များကို လုံခြုံသည့်နေရာတွင် ရပ်နား၍ ဇက်သော့ သေချာစွာ ခတ်ထားရန်နှင့် ဂရုပြု နေထိုင်ရန် လိုအပ်နေကြောင်း ဒေသခံများအကြား သတိပေးမှုများ ရှိနေသည်။

.