ဒေါ်အောင်ဆန်းစုကြည်နှင့် သားဖြစ်သူ Kim Aris တယ်လီဖုန်းဖြင့် ဆက်သွယ်စကားပြောခဲ့

.

၂၀၂၆ ခုနှစ်၊ အောက်တိုဘာလ ၂၂ ရက်

.

ဒေါ်အောင်ဆန်းစုကြည်နှင့် သားဖြစ်သူ Kim Aris (ခ) ကိုထိန်းလင်းတို့ ယနေ့ အောက်တိုဘာလ ၂၂ ရက်၊ နေ့လယ်ပိုင်းက တယ်လီဖုန်းမှတစ်ဆင့် စကားပြောဆိုဆက်သွယ်ခွင့်ရခဲ့ကြောင်း ပြောရေးဆိုခွင့်ရှိသူ ဒေါက်တာ ခိုင်ခိုင်စိုးက ထုတ်ပြန်ထားသည်။

.

.

ဒေါ်အောင်ဆန်းစုကြည်သည် သားဖြစ်သူ Kim Aris နှင့် လန်ဒန်မြို့ရှိ မြန်မာသံရုံးမှတစ်ဆင့် ယနေ့ အောက်တိုဘာလ ၂၂ ရက်၊ နေ့လယ် ၂ နာရီခွဲမှ ၂ နာရီ ၅၀ မိနစ်အထိ မိနစ် ၂၀ ကြာ ဆက်သွယ် ပြောဆိုမှု ပြုလုပ်ခဲ့ခြင်းဖြစ်ကြောင်း သိရသည်။

.

“ဒီနေ့ ငါးနှစ်ကျော်ကြာပြီးမှ ကျွန်တော့်မေမေ ဒေါ်အောင်ဆန်းစုကြည်နဲ့ စကားပြောခွင့်ရခဲ့ပါတယ်။ မေမေ့ အသံကို ပြန်ကြားရတာ ကျွန်တော့်အတွက် စကားလုံးတွေနဲ့ ဖော်ပြလိုမရလောက်အောင် အဓိပ္ပာယ်ရှိ ပါတယ်” ဟု ဒေါ်အောင်ဆန်းစုကြည်၏ သားဖြစ်သူ Kim Aris (ခ) ကိုထိန်လင်းက ၎င်း၏ လူမှုကွန်ရက် စာမျက်နှာတွင် ရေးသားထားသည်။

.

ယင်းကဲ့သို့ တယ်လီဖုန်း ဆက်သွယ်ပြောဆိုမှုနှင့် ပတ်သက်၍ မည်သည့်အကြောင်းအရာများ ပြောဆိုခဲ့သည် ကိုမူ ပြောရေးဆိုခွင့်ရှိသူ၏ ထုတ်ပြန်ချက်တွင်လည်းကောင်း၊ ကိုထိန်လင်း၏ ‌ရေးသားမှုတွင်လည်းကောင်း ဖော်ပြထားခြင်း မရှိချေ။

.