.
၂၀၂၆ ခုနှစ်၊ အောက်တိုဘာလ ၁၉ ရက်
.
ရှမ်းပြည်နယ်တောင်ပိုင်းဒေသအတွင်းရှိ ဟိုတယ်၊ မိုတည်၊
တည်းခိုခန်းများအားလုံး တောင်ကြီး တန်ဆောင်တိုင်ပွဲတော် ရိုးရာမီးပုံးပျံပွဲကာလအတွင်း
အခန်း ၂ ခန်းစီ ချန်လှပ်ထားရန် ဟိုတယ်နှင့် ခရီးသွားညွှန်ကြားမှု ဦးစီးဌာနက
ညွှန်ကြားထားသည်ဟု သိရသည်။
.
.
မြို့တော်တောင်ကြီး အပါဝင် ရှမ်းတောင်ဒေသရှိ ဟိုတယ်၊
မိုတည်၊ တည်းခိုခန်း အားလုံးကို ဟိုတယ် တစ်ခုလျှင် ၂ ခန်းကျ နိုဝင်ဘာ ၁၈ ရက်မှ ၂၄
ရက်အထိ ချန်ထားပေးရန် ဟိုတယ်နှင့်ခရီးသွား ညွှန်ကြားမှု ဦးစီးဌာနက
ညွှန်ကြားထားခြင်းဖြစ်ပြီး ယင်းအခန်းများအတွက် မည်သို့ ငွေပေးချေမည်ကို မသိရှိရသေး
ကြောင်း ဟိုတယ်လုပ်ငန်းရှင်များထံက သိရသည်။
.
“တောင်ကြီးတန်ဆောင်တိုင်ပွဲတော်ရက် နိုဝင်ဘာ ၁၈ ကနေ ၂၄
အထိ ဟိုတယ်တွေအကုန်လုံးကို ၂ ခန်းစီ ချန်ခိုင်းတယ်။ ရှမ်းတောင်က ဟိုတယ်တွေ
အကုန်လုံးလို့ ပြောပါတယ်။ ဟိုတယ်ခရီးဌာနက လို့တော့ ပြောပါတယ်” ဟု
သတင်းရင်းမြစ်တစ်ဦးက ပြောသည်။
.
ထို့အတူ ဟိုတယ်လုပ်ငန်းရှင် တစ်ဦးကလည်း “ဒီနှစ်မှ စပြီး
စာထုတ်တောင်းတာပါ။ အရင်နှစ်တွေကတော့ အဲဒီလို ချန်ခိုင်းတာ မရှိပါဘူး။ သူတို့ဘက်က
ဘယ်သူတွေ လာတည်းမယ်၊ ဘယ်ရက်တွေ ယူမယ်ဆိုတာ လည်း သေချာ မပြောထားပါဘူး” ဟု ပြောဆိုခဲ့သည်။
.
အလားတူ အခြားဟိုတယ် များတွင်လည်း အခန်း ၂ ခန်း
ချန်ထားပေးရသည်မှာ မှန်ကန်ပြီး မည်သို့ ဆောင်ရွက်မည်ကို တိတိကျကျ
ပြောဆိုထားခြင်းမရှိကြောင်း အခြားလုပ်ငန်းရှင်တစ်ဦးကလည်း အတည်ပြု ပြောဆိုခဲ့သည်။
.
အဆိုပါကိစ္စနှင့် ပတ်သက်၍ တောင်ကြီးမြို့ရှိ
ရှမ်းပြည်နယ် ဟိုတယ်နှင့် ခရီးသွား ညွှန်ကြားမှု ဦးစီးဌာနမှ တာဝန်ရှိသူအား
သွားရောက်တွေ့ဆုံမေးမြန်းရာတွင် “အခန်း ၂ ခန်းကို အလကားတောင်းတာ မဟုတ်ပါဘူး။
ဌာနအတွက် လုပ်တာလည်း မဟုတ်ဘူး။ ပွဲရက်မှာ အရေးကြီးဧည့်သည်တွေ ရောက်လာရင် အဆင်သင့်
ဖြစ်အောင် လုပ်ထားတာပါ။ မယူဖြစ်ရင်လည်း သူတို့ ပေါက်ဈေးအတိုင်းပဲ
ပြန်ရောင်းခိုင်းမှာပါ” ဟု ပြန်လည် ဖြေကြားခဲ့သည်။
.
ရှမ်းတောင်ရှိ ဟိုတယ်၊ မိုတယ်၊ တည်းခိုခန်းများအနေဖြင့်
တန်ဆောင်တိုင်ပွဲတော်ကာလ တစ်ခုသာ အဓိက အားထား၍ လုပ်ငန်းဆောင်ရွက်ရခြင်းဖြစ်ပြီး
ယခုကဲ့သို့ အခန်း ၂ ခန်း တောင်းခံသည့်အတွက် အခက်အခဲ ဖြစ်နေရကြောင်း သိရသည်။
.
တောင်ကြီးမြို့နယ်အတွင်း ဟိုတယ် အလုံး ၄၀၊ တည်းခိုးခန်း
၄၆ ခု၊ စုစုပေါင်း ၈၆ ခု ရှိနေကြောင်း ဟိုတယ်နှင့် ခရီးသွား ညွှန်ကြားမှုဦးစီးဌာန၏
အချက်အလက်များအရ သိရသည်။
.
No comments:
Post a Comment