တောင်ကြီးတန်ဆောင်တိုင် ရိုးရာမီးပုံးပျံပြိုင်ပွဲ ညမီးကြီးနှင့် စိန်နားပန်မီးပုံးပျံများ မဲနှိုက်ရွေးချယ်

.

၂၀၂၆ ခုနှစ်၊ နိုဝင်ဘာလ ၇ ရက်

.

၂၀၂၆ ခုနှစ် တောင်ကြီးမြို့တော် တန်ဆောင်တိုင်ပွဲတော် ရိုးရာမီးပုံးပျံပြိုင်ပွဲတွင် ဝင်ရောက်ယှဉ်ပြိုင် လွှတ်တင်မည့် ညမီးကြီးနှင့် စိန်နားပန် မီးပုံးပျံအဖွဲ့များအား ယနေ့ နိုဝင်ဘာလ ၇ ရက်၊ နံနက်ပိုင်းက တောင်ကြီးမြို့၊ အဝေရာ မီးပုံးပျံကွင်း အတွင်း၌ မဲနှိုက်ရွေးချယ်ခဲ့ကြောင်း သိရသည်။

.

.

ပြိုင်ပွဲဝင် လွှတ်တင်မည့် ညမီးကြီးနှင့် စိန်နားပန် မီးပုံးပျံများအတွက် လွှတ်တင်ရမည့်ရက်ကို မဲနှိုက်ရွေးချယ်ခဲ့ခြင်း ဖြစ်ပြီး မနက်ဖြန် နိုဝင်ဘာလ ၈ ရက်တွင် နေ့လွှတ်အရုပ် ခြေနှစစ်ချောင်း၊ ခြေလေးချောင်းနှင့် အုပ်စုပြိုင်ပွဲများအတွက် လွှတ်ရမည့်ရက်ကို မဲနှိုက်ရွေးချယ်သွားမည်ဖြစ်ကြောင်း သိရသည်။

.

တောင်ကြီးမြို့တော် တန်ဆောင်တိုင်ပွဲတော်တွင် ညလွှတ် ညမီးကြီး ၇၁ လုံး၊ စိန်နားပန် ၄၁ လုံး၊ နေ့လွှတ်အရုပ် ခြေနှစ်ချောင်း ၂၃၆ လုံး၊ ခြေလေးချောင်း ၁၃၈ လုံး၊ အုပ်စု ၇၅ အုပ်စု၊ စုစုပေါင်း ၅၆၁ ဖွဲ့ လွှတ်တင် ယှဉ်ပြိုင်သွားမည် ဖြစ်ကြောင်း သိရသည်။

.

“ဒီနေ့ကတော့ ညမီးကြီးနဲ့ စိန်နားပန် မဲနှိုက်ရွေးချယ်တာဖြစ်ပါတယ်။ လွှတ်တင်ရမယ့် ဇယားကတော့ နောက် ၄/၅ ရက်‌လောက်မှ အတည်ပြုပြီး ပုံနှိပ်ထုတ်ဝေပါမယ်။ ပျှမ်းမျှ တစ်ညကို ညမီးကြီး ၈ လုံးလောက်နဲ့ စိန်နားပန် ၄ လုံးကနေ ၅ လုံးလောက် လွှတ်တင်မှာဖြစ်ပါတယ်” ဟု ရှမ်းပြည်နယ်ရိုးရာမီးပုံးပျံပညာရှင်များအသင်း၊ မီးပုံးပျံ ဆပ်ကော်မတီမှ ဦးတင်ဝင်းက ပြောသည်။

.

မီးပုံးပျံပြိုင်ပွဲကို နိုဝင်ဘာလ ၁၆ ရက်မှ ၂၄ ရက်ထိ ပြုလုပ်ပြီး ဆုပေးပွဲနှင့် ပိတ်ပွဲအခမ်းအနားကို ၂၅ ရက်တွင် ပြုလုပ်သွားမည် ဖြစ်သည်။

.

နေ့လွှတ်အရုပ် မီးပုံးပျံများမှာ ဖွင့်ပွဲမစတင်မီ ၃ ရက်အလို နိုဝင်ဘာလ ၁၃ ရက်မှ စတင်၍ နိုဝင်ဘာ ၂၄ ရက်အထိ အဝေရာ မီးပုံးပျံကွင်းအတွင်း၌ လွှတ်တင်ယှဉ်ပြိုင်သွားမည်ဖြစ်ကြောင်း သိရသည်။

.

တောင်ကြီးတန်ဆောင်တိုင်ပွဲတော်တွင် ရိုးရာမီးပုံးပျံပြိုင်ပွဲအပြင် မြို့လုံးကျွတ်ဘုံကထိန် လှည့်လည်ပူဇော်ပွဲ၊ မီးပဒေသာ လှည့်လည်ပူဇော်ပြိုင်ပွဲ၊ မသိုးသင်္ကန်းရက်လုပ်ပူဇော်ပြိုင်ပွဲများကို နှစ်စဉ်ကျင်းပမြဲအတိုင်း ထည့်သွင်း ပြုလုပ်သွားမည်ဖြစ်ကြောင်း သိရသည်။

.