တောင်ကြီး အမျိုးသမီးနှင့် ကလေးဆေးရုံအတွင်း ရပ်ထားသည့် ဆိုင်ကယ် ခိုးယူခံရ

တောင်ကြီးမြို့၊ အမျိုးသမီးနှင့် ကလေးဆေးရုံဝန်း အတွင်း၌ ရပ်ထားသည့် မော်တော်ဆိုင်ကယ် တစ်စီး ယနေ့ ဧပြီလ ၂၀ ရက်၊ နံနက်ပိုင်းက ခိုးယူခံရကြောင်း သိရသည်။

.

ခိုးယူခံရသည့် ‌မော်တော်ဆိုင်ကယ်မှာအလုပ်သင် ဆရာ၀န် တစ်ဦး၏ Honda Dream 125 အနက်ရောင် အမျိုးအစား ဖြစ်ပြီး ဆေးရုံဝန်း အတွင်း၌ ရပ်ထားစဉ် နံနက် ၃ နာရီကျော်ခန့်က ခိုးယူခံရခြင်း ဖြစ်သည်။

.

" ကျွန်တော့် ဂျူတီက ၆ နာရီခွဲ ၀င်ရတာပေါ့။ ည ၁၀ နာရီကျော်တဲ့အထိ ဆိုင်ကယ်က ရှိနေသေးတယ်။ မွေးခန်းမှာ ကလေးမွေးပြီး မနက် ၆ နာရီခွဲ ဂျူတီ ထွက်လာတော့ ဆိုင်ကယ်က မရှိတော့ဘူး။ ဇက်သော့ရော၊ ကြိုးသော့ပါ ခတ်ထားတာပါ။ ကြိုးသော့ပါ ဖြတ်ပြီး ခိုးသွားတာ။" ဟု ဆိုင်ကယ် ခိုးယူခံရသူ ဆရာ၀န်က ပြောသည်။

.

CCTV မှတ်တမ်းတွင်မူ အမျိုးသား ၂ ဦး မော်တော်ဆိုင်ကယ်ဖြင့် လာရောက်၍ တစ်ဦးမှ အခြေအနေ စောင့်ကြည့်ကာ ကျန်တစ်ဦးက ဝင်ရောက် ခိုးယူပြီးနောက် အတူ ပြန်လည် ထွက်ခွာသွားခြင်း ဖြစ်သည်ကို တွေ့ရသည်။

.

အဆိုပါ ခိုးယူခံရသည့် မော်တော်ဆိုင်ကယ်မှာ ဆေးရုံ၀န်း အတွင်းပိုင်းကျသည့် နေရာတွင် ဇက်သော့နှင့် ကြိုးသော့ပါ တွဲခတ်ထားသော်လည်းခိုးယူခံရသည့်အတွက် လုံခြုံရေးပိုင်းဆိုင်ရာတွင် အားနည်းချက်များ ရှိနေကြောင်း သိရသည်။

.

ဆိုင်ကယ်ခိုးယူခံရမှုနှင့် ပတ်သက်၍ ‌တောင်ကြီးမြို့မရဲစခန်းတွင် တိုင်ကြားထားကြောင်းလည်း သိရသည်။

.