တောင်ကြီးမြို့၊ နာရီစင်ညဈေးရှိ ဈေးသည်များကို ပြောင်းရွှေ့ရန် တစ်ရက် နောက်ဆုတ်ပေး

.

၂၀၂၆ ခုနှစ်၊ မေလ ၁၅ ရက်

.

ရှမ်းပြည်နယ်မြို့တော် တောင်ကြီးမြို့၊ တပင်ရွှေထီးလမ်းရှိ နာရီစင်ညဈေးမှ ဈေးသည်များအား ကုန်သည် လမ်းရှိ ယာယီညဈေးသို့ ယနေ့ မေလ ၁၅ ရက်အပြီး ပြောင်းရွှေ့ခိုင်းထားသော်လည်း တောင်းဆိုမှုများ ရှိသည့်အတွက် တစ်ရက် နောက်ဆုတ်ပေးထားသည်ဟု သိရသည်။

,

.

“ဒီနေ့ကပြဿဒါးဖြစ်နေလို့ မနက်ဖြန်မှ ရွှေ့ပါရစေဆိုပြီး ပြောလို့ ခွင့်ပြုပေးလိုက်ပါတယ်” ဟု တောင်ကြီး မြို့နယ်စည်ပင်သာယာရေးဌာနမှ တာဝန်ရှိသူတစ်ဦးက ပြောသည်။

.

အဆိုပါ နာရီစင်ညဈေးရှိ ဈေးသည်များကို မူလက ယနေ့ မေလ ၁၅ ရက် နောက်ဆုံးထား ပြောင်းရွှေ့ပေးရန် စည်ပင်သာယာရေးဌာနက ညွှန်ကြားထားခဲ့ခြင်းဖြစ်ပြီး လက်ရှိတွင် ဈေးအိမ်သာနှင့် ရေတွင်းတူးဖော်ခြင်း လုပ်ငန်းများကို ဆောင်ရွက်နေဆဲဖြစ်ကြောင်း သိရသည်။

.

“မနက်ဖြန် ရွှေ့ရမှာပါ။ ဟိုဘက်ကလည်း မပြီးသေးလို့ နည်းနည်းလေး ရက်ဆုတ်ချင်တာတောင် မရပါဘူး” ဟု ဈေးသည်တစ်ဦးက ပြောသည်။

.

ယင်းကဲ့သို့ ကုန်သည်လမ်းရှိ ယာယီညဈေး နေရာသို့ ပြောင်းရွှေ့ရပါက ရရှိမည့် ဆိုင်ခန်းနေရာ ကျဉ်းမြောင်း သွားပြီး ဈေးရောင်းချရန်နှင့် ပစ္စည်းများ သိမ်းဆည်းပြောင်းရွှေ့ရန် အခက်အခဲများ ဖြစ်ပေါ်လာနိုင်ကြောင်း ဈေးသည်များက ပြောဆိုကြသည်။

.

ထို့အပြင် ညဈေးတန်းနှင့် မသက်ဆိုင်သော သား၊ ငါးဆိုင်များကိုလည်း ယာယီညဈေးတွင် နေရာပေးထား သည့်အတွက် ညဈေးတန်း ဈေးသည်များ ရရှိသည့် နေရာ ကျဉ်းမြောင်းသွားကြောင်း ဈေးသည်တစ်ဦးက ပြောသည်။

.

တောင်ကြီးမြို့၊ တပင်ရွှေထီးလမ်းရှိ နာရီစင်ညဈေး နေရာတွင် သီဟကုမ္ပဏီမှ ၇ ထပ် ကားပါကင် အဆောက်အဦ ဆောက်လုပ်မည်ဖြစ်သည့်အတွက် ယင်းနေရာရှိ ဈေးသည်များကို မြို့မဈေး မြောက်ဘက်၊ ကုန်သည်လမ်းတွင် ယာယီ နေရာချထားပေးခြင်းဖြစ်ကြောင်း သိရသည်။

.