လဲချားမြို့နယ်နှင့် ကျိုင်းတောင်းမြို့အနီးတွင် အွန်လိုင်းလိမ်လည်လောင်းကစား ပြုလုပ်သူများကို ဖမ်းမိ

.

၂၀၂၆ ခုနှစ်၊ မေလ ၉ ရက်

.

ရှမ်းပြည်နယ်တောင်ပိုင်း၊ လဲချားမြို့နယ်နှင့် ကျိုင်းတောင်းမြို့အနီးတွင် ယမန်နေ့ မေလ ၈ ရက်က အွန်လိုင်းလိမ်လည်လောင်းကစား ပြုလုပ်သူများကို အသုံးပြုသည့် ဆက်စပ်ပစ္စည်းများနှင့်အတူ ဖမ်းဆီး ရမိခဲ့ကြောင်း သိရသည်။

.

.

လုံခြုံရေးပူးပေါင်းအဖွဲ့များသည် နယ်မြေရှင်းလင်းရေး ဆောင်ရွက်နေစဉ် ယမန်နေ့ မေလ ၈ ရက်၊ နံနက်ပိုင်း က လဲချားမြို့နယ်၊ ဆီးဆောကျေးရွာ၏ အရှေ့တောင်ဘက်မီတာ ၆၈၀၀ ခန့်အကွာ၌ အွန်လိုင်း လိမ်လည် လောင်းကစားမှု ကျူးလွန်သူ တရုတ်နိုင်ငံသား အမျိုးသား ၁၃ ဦးနှင့် မြန်မာနိုင်ငံသား အမျိုးသမီး ၅ ဦး၊ စုစုပေါင်း ၁၈ ဦးတို့အား အလျား ၁၂၀ ပေ အနံ ၃၀ ပေရှိ လူနေတဲ ၂ လုံး၊ အလျား ၁၂၀ ပေ အနံ ၃၀ ပေရှိ လုပ်ငန်းသုံးတဲ ၁ လုံး၊ အလျား ၈၀ ပေ အနံ ၃၀ ပေရှိ မီးဖိုဆောင် ၁ လုံး၊ All In One ၂ လုံး၊ မီးစက် အလတ် ၁ လုံး၊ ပါဝါစတေရှင်(အကြီး) ၂ လုံးနှင့် ဖျက်ဆီးထားသည့် ဖုန်းမျိုးစုံ ၉၀ လုံးတို့နှင့်အတူ ဖမ်းဆီးရမိခဲ့ခြင်း ဖြစ်ကြောင်း သိရသည်။

.

ဆက်လက်ပြီး လုံခြုံရေးပူးပေါင်းအဖွဲ့များသည် နယ်မြေရှင်းလင်းခြင်းနှင့် ရှာဖွေ ဖော်ထုတ်စစ်ဆေးခြင်း လုပ်ငန်းများအား ဆက်လက်ဆောင်ရွက်ခဲ့ရာ ဆီးဆောကျေးရွာ၏ အနောက်မြောက်ဘက် မီတာ ၁၂၀၀ ခန့်အကွာ၌ အွန်လိုင်းလိမ်လည် လောင်းကစားမှုကျူးလွန်သူ တရုတ်နိုင်ငံသား အမျိုးသား ၁၂ ဦးတို့အား ထပ်မံဖမ်းဆီးရမိခဲ့ကြောင်း သိရသည်။

.

ထို့အတူ ယမန်နေ့ မေလ ၈ ရက်၊ နေ့လယ်ပိုင်းက ကျိုင်းတောင်းမြို့၏ တောင်ဘက်မီတာ ၁၂၀၀၀ ခန့်အကွာ မိုင်းပန်-ကျိုင်းတောင်းသွား ကားလမ်းအနီး၌ တရားမဝင်အွန်လိုင်းလောင်းကစားမှုကျူးလွန်သူ တရုတ်နိုင်ငံသား အမျိုးသား ၆ ဦးအား ထပ်မံဖမ်းဆီးရမိခဲ့ကြောင်း သိရသည်။

.

အဆိုပါ ဖမ်းဆီးရမိသူများကို လိုအပ်သည့် စစ်ဆေးမှုများ ပြုလုပ်ပြီး တည်ဆဲဥပဒေများနှင့်အညီ ထိရောက် ပြင်းထန်စွာ အရေးယူဆောင်ရွက်သွားမည်ဖြစ်ကာ သိမ်းဆည်းရမိသည့် လုပ်ငန်းသုံးပစ္စည်းများအား လုပ်ထုံး လုပ်နည်းများနှင့်အညီ ဆက်လက်ဆောင်ရွက်သွားမည်ဖြစ်ကြောင်း သိရသည်။

.