ရှမ်းပြည်နယ်အရှေ့ပိုင်း၊ ကျိုင်းတုံမြို့တွင် ယနေ့ မေလ ၁၃ ရက်၊
နေ့လယ်ပိုင်းက အမျိုးသားတစ်ဦး ဓားပြတိုက် ခံရပြီးနောက်
သေနတ်ဖြင့်ပါ ပစ်ခတ်ခံရ၍ သေဆုံးမှု ဖြစ်ပွားခဲ့ကြောင်း
သိရသည်။
.
ကျိုင်းတုံမြို့၊ နောင်ခိုက်ရပ်ကွက်နေ ရွှေဆိုင်ပိုင်ရှင်
စိုင်းယီတစ် ဆိုသူသည် ယနေ့ မေလ ၁၃ ရက်၊ နေ့လယ် ၁ နာရီခွဲခန့်က
ကျိုင်းတုံမြို့မဈေးမှ ကျိုင်းတုံမြို့၊ အမှတ် (၂) ရပ်ကွက်၊ နောင်ခိုက်ရှိ
၎င်းနေအိမ်သို့ ပြန်လာစဉ် အိမ်ရှေ့ အရောက်တွင် အမည်မသိ အမျိုးသား ၄ ဦးက PAJERO
အမျိုးအစား အဖြူရောင်ယာဉ်ဖြင့် ရောက်ရှိလာပြီး သေနတ်ဖြင့် ပစ်ခတ်၍ စိုင်းယီတစ် မောင်းနှင်လာသည့် မော်တော်ယာဉ်နှင့် ယာဉ်ပေါ်ရှိ
ရွှေထည်ပစ္စည်းများကို လုယူ ထွက်ပြေးသွားခဲ့ခြင်း ဖြစ်ကြောင်း သတင်းရင်းမြစ်များထံမှ သိရသည်။
.
သေနတ်ဖြင့် ပစ်ခတ်ခံရမှုကြောင့် စိုင်းယီတစ် တွင် နားထင် နှင့်
ဝမ်းဗိုက်တို့တွင် ကျည်ဖောက်ဝင် ဒဏ်ရာများ
ရရှိပြီး အခင်းဖြစ်နေရာတွင် သေဆုံးခဲ့ရကာ
ရုပ်အလောင်းအား နှလုံးလှပိုင်ရှင်များ လူမှုကူညီရေးအသင်းက
ကျိုင်းတုံပြည်သူ့ဆေးရုံကြီးသို့ ပို့ဆောင်ပေးခဲ့ကြောင်း သိရသည်။
.
အဆိုပါကိစ္စနှင့် ပတ်သက်၍ ကျိုင်းတုံမြို့မရဲစခန်းမှူးအား
ကမ္ဘောဇတိုင်းမှ ဆက်သွယ် မေးမြန်းရာတွင် ဓားပြမှု တရားခံနောက် လိုက်နေ၍ ဖြေဆို၍ မရသေးကြောင်း
ပြန်လည် ပြောဆိုခဲ့သည်။
.
ကျိုင်းတုံမြို့တွင် ပြီးခဲ့သည့် ဧပြီလ ၁၀ ရက်၊ နံနက်ပိုင်းကလည်း
ဆိုင်ကယ်စီးနင်းလာသူ အမျိုးသား တစ်ဦးအား ဓားဖြင့် ခုတ်၍ ဆိုင်ကယ်လုယက်မှု တစ်ခု
ဖြစ်ပွားခဲ့ဖူးပြီး ကျိုင်းတုံမြို့နယ်အတွင်း ဆိုင်ကယ် ခိုးယူမှု၊ လုယက်မှုအပြင်
အခြား ဒုစရိုက်မှုများ မကြာခဏ ဖြစ်ပွားနေကြောင်း သိရသည်။
No comments:
Post a Comment