မေဂျာလိဂ်မှာ လစာအများဆုံး ကစားသမားအဖြစ် ဆက်လက်ရပ်တည်နေဆဲဖြစ်တဲ့ မက်ဆီ

.

၂၀၂၆ ခုနှစ်၊ မေလ ၁၃ ရက်

.

အမေရိကန်ဘောလုံးလိဂ်ဖြစ်တဲ့ မေဂျာလိဂ်ရဲ့ အင်္ဂါနေ့ထုတ်ပြန်ချက်တွေအရ မက်ဆီဟာ မေဂျာလိဂ်မှာ လစာအမြင့်ဆုံး ကစားသမားအဖြစ် ဆက်လက်ရပ်တည်နေဆဲဖြစ်ပြီး သူ့ရဲ့နှစ်စဉ် အခြေခံလစာက ဒေါ်လာ ၂၅ သန်းရရှိနေတာပါ။

.

.

ဒီပမာဏက ဒုတိယလစာအမြင့်ဆုံးအဖြစ် ရပ်တည်နေတဲ့ တောင်ကိုရီးယားတိုက်စစ်မှူး ဆွန်ဟောင်မင် ထက် ၂ ဆ များပါတယ်။

.

ကစားသမား လစာငွေစာရင်း အသစ်မှာ ပြီးခဲ့တဲ့ အောက်တိုဘာက ချုပ်ဆိုခဲ့တဲ့ မက်ဆီနဲ့ အင်တာမိုင်ယာမီရဲ့ စာချုပ်သက်တမ်းတိုးမှုကို ထည့်သွင်းဖော်ပြထားပြီး ဒီစာချုပ်ကြောင့် မက်ဆီက ၂၀၂၈ ခုနှစ်အထိ မိုင်ယာမီ မှာ ဆက်ပြီး ကစားပေးသွားမှာဖြစ်ပါတယ်။

.

ထုတ်ပြန်ထားတဲ့ အချက်အလက်တွေအရ မက်ဆီရဲ့ အခြေခံလစာက ၂ ဆ တိုးလာခဲ့ပြီး သူ့ရဲ့ပုံရိပ် အသုံးပြုမှုတွေ၊ ကြော်ငြာဝင်ငွေတွေ မပါသေးပါဘူး။

.

ပြီးခဲ့တဲ့ ဩဂုတ်လမှာ စပါးအသင်းကနေ LA FC အသင်းဆီ ဒေါ်လာ ၂၆ သန်းနဲ့ ရောက်လာတဲ့ ဆွန်ဟောင်မင် ကတော့ တစ်နှစ်လစာငွေ ဒေါ်လာ ၁၀ သန်းကျော်သာ ရရှိနေပြီး ပုံရိပ်အသုံးပြုမှုတွေကိုပါ ထည့်သွင်းတွက်ချက်လိုက်ရင် တစ်နှစ်ကို ဒေါ်လာ ၁၁ သန်းကျော်တော့ ရရှိနေတာပါ။

.

ဒီလစာတွေထဲမှာ ကြော်ငြာစာချုပ်ကရတဲ့ ဝင်ငွေတွေမပါသေးသလို မက်ဆီရဲ့ ဝင်ငွေစာရင်းမှာလည်း တခြားကနေ ရရှိတဲ့ စီးပွားရေးဝင်ငွေတွေ မပါသေးပါဘူး။

.

အသက် ၃၈ နှစ်ရှိပြီဖြစ်တဲ့ မက်ဆီဟာ လာမယ့် ကမ္ဘာ့ဖလားပြိုင်ပွဲမှာ အာဂျင်တီးနားရဲ့ ချန်ပီယံဆုကို ကာကွယ်ဖို့ ဦးဆောင်လာမှာဖြစ်ပြီး ဒီရာသီ မေဂျာလိဂ်မှာလည်း စွမ်းဆောင်ရည်ကောင်းတွေ ပြခဲ့တာပါ။

.

မက်ဆီက မေဂျာလိဂ်မှာ ကစားခဲ့တဲ့ ပွဲစဉ် ၆၄ ပွဲမှာ ၅၉ ဂိုးသွင်းခဲ့ပြီး ပြီးခဲ့တဲ့ ရာသီမှာ သွင်းဂိုး ၂၉ ဂိုးနဲ့ မေဂျာလိဂ်ရဲ့ ဂိုးသွင်းအများဆုံး ကစားသမားဖြစ်ခဲ့ပါတယ်။ ဒါ့အပြင် မေဂျာလိဂ်ရဲ့ တန်ဖိုးအရှိဆုံး ကစားသမား ဆုကိုလည်း ၂ နှစ်ဆက်တိုက် ရရှိခဲ့တာပါ။

.

မေဂျာလိဂ်ရဲ့ တတိယမြောက် လစာအမြင့်ဆုံး ကစားသမားနေရာမှာတော့ မက်ဆီရဲ့ အသင်းဖော် ဒီပေါလ်က တစ်နှစ်လစာ ၉.၇ သန်းနဲ့ ရပ်တည်နေပြီး စတုတ္တနေရာမှာတော့ ဆန်ဒီယေဂိုအက်ဖ်စီရဲ့ ကစားသမား လိုဇာနိုက တစ်နှစ်လစာ ဒေါ်လာ ၉.၃ သန်းနဲ့ ရပ်တည်နေပါတယ်။

.

မေဂျာလိဂ်ရဲ့တာဝန်ရှိသူတွေကတော့ လိဂ်တစ်ခုလုံးရဲ့ စုစုပေါင်းအသုံးစရိတ်ဟာ ဒေါ်လာ ၆၃၁ သန်း ရှိတယ်လို့ ဖော်ပြထားပါတယ်။

.