မေလအတွက် K-Pop မိန်းကလေးအဖွဲ့ ရပ်တည်မှုစာရင်းမှာ IVE ထိပ်ဆုံးက ဆက်လက်ရပ်တည်

.

၂၀၂၆ ခုနှစ်၊ မေလ ၁၀ ရက်

.

၂၀၂၆ ခုနှစ် မေလအတွက် K-Pop မိန်းကလေးအဖွဲ့ ရပ်တည်မှုစာရင်းတွေ ထွက်လာခဲ့ပါပြီ။ Black Pink ရဲ့ အောင်မြင်မှုအရှိန်တွေ မကျသေးပေမဲ့ IVE ကိုတော့ မကျော်နိုင်ခဲ့ဘဲ ဒုတိယနေရာမှာသာ ရပ်တည်နိုင်ခဲ့ ပါတယ်။

.

.

ဒီ ရပ်တည်မှုက ဧပြီ ၁၀ ရက်ကနေ မေလ ၁၀ ရက်နေ့အထိ အချက်အလက်တွေကို အခြေခံထားတာဖြစ်ပြီး ပရိသတ်တွေရဲ့အားပေးမှု၊ မီဒီယာတွေရဲ့ အလေးပေးမှုနဲ့ အခြားစစ်တမ်းတွေအပေါ် အခြေခံထားတဲ့ အချက်တွေပါ။

.

ပြီးခဲ့တဲ့ လတုန်းက ရပ်တည်မှုအဆင့်မှာ နံပတ် ၁ ဖြစ်ခဲ့တဲ့ IVE က ဒီလမှာလည်း ထိပ်ဆုံးကနေပဲ ဆက်လက် ရပ်တည်ခဲ့ပြန်ပါတယ်။ ကျော်ကြားမှုရမှတ် ၄ သန်းကျော်ရခဲ့ပြီး အွန်လိုင်းမှာ ရှာဖွေမှုလည်း အမြင့်ဆုံး ဖြစ်ခဲ့တာပါ။ “Bang Bang” “ARCH-IVE” စတဲ့စာလုံးတွေက သူတို့ရဲ့ အပတ်သက်ဆုံး စကားလုံးတွေ ဖြစ်ခဲ့ပြီး ပရိသတ်တွေဆီကနေ အကောင်းမြင်တဲ့ တုန့်ပြန်မှု ၉၃.၄၁% အထိ ရရှိခဲ့ပါတယ်။

.

ဂျန်းနီ၊ လီဆာ၊ ရို့စ်နဲ့ ဂျီဆိုး တို့ရဲ့ Black Pink ကတော့ အမျိုးသမီးကေပေါ့ပ်လောကရဲ့ ထိပ်ပိုင်း နေရာတွေကို ဆက်လက်သိမ်းပိုက်နေဆဲပါ။ အဖွဲ့လိုက်လှုပ်ရှားမှု နည်းနေပေမဲ့ တစ်ဦးချင်းလှုပ်ရှားမှုတွေ ကနေ သူတို့ရဲ့ ပုံရိပ်ကို ဆက်လက်ထိန်းထားနိုင်ဆဲပါ။ ဒါပေမဲ့လည်း IVE ကိုတော့မကျော်ဖြတ်နိုင်ခဲ့ဘဲ ကျော်ကြားမှုရမှတ် ၄ သန်းနီးပါးသာ ရခဲ့ပါတယ်။

.

ILLIT ကတော့ ပြီးခဲ့တဲ့ လကနဲ့ နှိုင်းယှဉ်ရင် ကျော်ကြားမှုရမှတ် အများကြီးတိုးတက်လာခဲ့ပြီး ရမှတ် ၃ သန်းကျော်နဲ့ တတိယနေရာကို တက်လာခဲ့ပါတယ်။

.

စတုတ္တနေရာမှာတော့ LE SSERAFIM က ကျော်ကြားမှုရမှတ် ၃ သန်းနီးပါး ရရှိခဲ့ပြီး သူတို့ရဲ့တိုးတက်မှုကို ပြလာခဲ့ပါတယ်။ ဒါပေမဲ့ ထိပ်ဆုံးနေရာတွေကို စိန်ခေါ်နိုင်ဖို့တော့ ကြိုးစားနေရဆဲပါ။

.

၂၀၂၆ ခုနှစ်အတွင်းမှာ အဖွဲ့လိုက်သီချင်းတွေ မထွက်နိုင်သေးပေမဲ့ ကမ္ဘာအနှံ့ဖျော်ဖြေရေးပွဲတွေမှာ အောင်မြင်နေတဲ့ TWICE ကတော့ ဒီလရဲ့အဆင့် ရပ်တည်မှုမှာ အဆင့် ၅ နေရာကနေ ရပ်တည်သွားခဲ့ ပါတယ်။

.

တခြားနာမည်ကြီးအဖွဲ့တွေရဲ့ ရပ်တည်မှုတွေမှာတော့ Red Velvet က အဆင့် (၈) နေရာ၊ Apink က အဆင့် (၁၄)နေရာ၊ MAMAMOO အဆင့် (၁၈) နေရာနဲ့ Girl’s Generation က အဆင့် (၂၇) နေရာတွေမှာ အသီးသီး ရပ်တည်ခဲ့ကြပါတယ်။

.