Netflix ရဲ့ ရှိုးအသစ်မှာ လီဂွမ်ဆူနဲ့ ပြန်လက်တွဲမယ့် ယူဂျယ်ဆော့

လာမည့် မေလ ၂၆ ရက်နေ့မှာ စတင်ထုတ်လွှင့်မယ့် Netflix ရဲ့ Variety Show အသစ် “Jae Seok’s B&B Rules” မှာတော့ Running Man မှာ အတွဲညီခဲ့ကြတဲ့ ယူဂျယ်ဆော့နဲ့ လီဂွမ်ဆူ အတွဲကို ပရိသတ်တွေ ပြန်မြင်ရတော့ မှာပါ။

.

ယူဂျယ်ဆော့အတွက်တော့ သူ့ရဲ့ ဖျော်ဖြေရေးသမားဘဝမှာ ပထမဆုံးအနေနဲ့ တည်းခိုခန်းတစ်ခုကို စီမံခန့်ခွဲဖို့ လက်ခံထားတာကို မြင်တွေ့ရမှာဖြစ်ပါတယ်။

.

ယူဂျယ်ဆော့နဲ့အတူ ပါဝင်လာမယ့်အဖွဲ့ဝင်တွေအဖြစ် လီဂွမ်ဆူ၊ ဗြောင်ဝူဆော့၊ ဂျီရယ်အွန်း တို့ ပါဝင်လာကြမှာဖြစ်ပြီး တည်းခိုခန်းကို လာရောက်ကြမယ့် ဧည့်သည်တွေနဲ့ ရယ်မောစရာအချိန်တွေ၊ ရှုပ်ယှက်ခတ်နေတာတွေနဲ့ အမှတ်တရတွေကို ဖန်တီးသွားကြမှာပါ။

.

ပိုစတာပေါ်မှာတော့ “ဧည့်သည်ကဘုရင် ဆိုပေမယ့်၊ ကျွန်တော်လည်း ဘုရင်ပဲ” ဆိုတဲ့ စာသားနဲ့အတူ လာတည်းတဲ့ ဧည့်သည်တွေကို စိတ်ညစ်အောင် လုပ်မယ်ဆိုတဲ့အကြောင်း ယူဂျယ်ဆော့က ကြိုတင် အသိပေးထားလိုက်သလိုပါပဲ။

.

ရှိုးရဲ့အစီအစဉ်တွေထဲမှာတော့ မနက်အိပ်ယာနိုးတာနဲ့ စမယ့် စိန်ခေါ်မှုတွေ၊ မနက်ခင်း ယောဂအစီအစဉ်၊ ဉာဏ်စမ်းအစီအစဉ်၊ မီးပုံပွဲ၊ စွမ်းရည်ပြပွဲ၊ ပြင်ပလှုပ်ရှားမှုတွေကို ပြုလုပ်ကြရမှာဖြစ်ပါတယ်။.အချိန်ဇယားက အရမ်းပြည့်နေတဲ့အတွက် ၂ ည အိပ် ၃ ရက် အစီအစဉ်နဲ့ ရိုက်ကူးရမှာဖြစ်ပြီး လွယ်ကူတဲ့ ရှိုးတစ်ခုတော့ မဟုတ်ခဲ့ပါဘူး။

.

ဒါ့အပြင် တချိန်က နာမည်ကျော် ပေါ့ပ်ဘုရင်မ လီဟိုးရီ နဲ့ သူမရဲ့ခင်ပွန်းဖြစ်တဲ့ တေးရေးဆရာ၊ အဆိုတော် လီဆန်းဆွန်း တို့ကလည်း ရှိုးရဲ့တစ်စိတ်တစ်ဒေသအဖြစ် ပါဝင်လာဦးမှာပါ။

.

ယူဂျယ်ဆော့နဲ့ လီဂွမ်ဆူတို့ အတွဲဆိုတာနဲ့တင် ပြောစရာမလိုတော့တာမို့ မေ ၂၆ မှာ လာမယ့် ဒီ ရှိုးလေးကို ရင်ခုန်လိုက်ကြပါဦးနော်။