ဇွန်လ ၁၈ ရက်အတွက် ကမ္ဘာ့ဖလား ခန့်မှန်းချက်များ

.

၂၀၂၆ ခုနှစ်၊ ဇွန်လ ၁၈ ရက်

.

.

■ ချက် - တောင်အာဖရိက (ည ၁၀-၃၀)

.

နှစ်သင်းစလုံးက အဖွင့်ပွဲတွေမှာ ရှုံးထားခဲ့ကြလို့ ဒီပွဲမှာ ၃ မှတ်ရဖို့ ကြိုးစားကြရမှာပါ။ ချက်က တောင်ကိုရီးယားကို ရှုံးခဲ့တာဖြစ်ပြီး တောင်အာဖရိက ကတော့ မက္ကဆီကို ကို ရှုံးခဲ့တယ်။

.

နှစ်သင်းကစားပုံကို ယှဉ်ကြည့်ရင်တော့ တောင်ကိုရီးယားဆီက အမှတ်ရမလိုဖြစ်ခဲ့တဲ့ ချက် ရဲ့ ကစားပုံက တောင်အာဖရိကထက် အများကြီး ပိုကောင်းတယ်လို့ ပြောရမယ်။ ဒီနှစ်သင်း နောက်ဆုံးထိပ်တိုက် တွေ့ဆုံမှု မှာတော့ ၂ ဂိုးစီ သရေကျခဲ့ဖူးတယ်။

.

ချက် အသင်း ဒီပွဲမှာ ၃ မှတ်ရသွားဖို့များပြီး တောင်အာဖရိက ကတော့ သရေတစ်မှတ်လောက် ရရင်ပဲ ကံကောင်းတယ် ပြောရပါလိမ့်မယ်။

.

■ ဆွစ်ဇာလန် - ဘော့စနီးယား (နံနက် ၁-၃၀)

.

ဒီအုပ်စုမှာတော့ ၄ သင်းလုံး ၁ မှတ်စီပဲ ရထားကြတာမို့ အခွင့်အရေးက ဆတူရှိနေတယ်လို့တောင် ပြောရ မယ်။ ကာတာ ကို အနိုင်ရအောင် မကစားနိုင်ခဲ့တာမို့ ဆွစ်ဇာလန် တော်တော်လေး နစ်နာသွားတယ်လို့ ပြောရမှာဖြစ်ပြီး ဒီပွဲမှာ အမှတ်ရဖို့ ကြိုးစားရမယ့် အခြေအနေ ဖြစ်လာတယ်။

.

ဘော့စနီးယားကလည်း ကနေဒါ ကို နိုင်မလို အခြေအနေကနေ ပွဲပြီးခါနီး ချေပဂိုးကြောင့် တစ်မှတ်နဲ့ ကျေနပ်ခဲ့ရတယ်။

.

ဘော့စနီးယား ကစားပုံက အဆိုးကြီးမဟုတ်ပေမဲ့ ဆွစ်ဇာလန်သာ သေချာကစားရင် ဘော့စနီးယားတို့ ယှဉ်နိုင်ဖို့မလွယ်ဘူး။

.

အမ်ဘိုလို ပွဲထွက်လာမယ့် ဆွစ်ဇာလန် တိုက်စစ်မှာ ဆွစ်ဇာလန်ပဲ ၃ မှတ်ရသွားပါလိမ့်မယ်။

.

■ ကနေဒါ - ကာတာ (မနက် ၄-၃၀)

.

ကာတာရဲ့ခြေစွမ်းက ဆွစ်ဇာလန်နဲ့ပွဲမှာ အကောင်းကြီးမဟုတ်ခဲ့ပဲ နောက်ဆုံးမိနစ် Own Goal ကြောင့်သာ တစ်မှတ်ရခဲ့တာပါ။

.

အဖွင့်ပွဲကို တံကောက်ကြော ဒဏ်ရာကြောင့် လွဲခဲ့ရတဲ့ ခံစစ်က အယ်လ်ဖွန်ဆိုဒေးဗီး ပြန်ပါလာဖို့များပြီး သူသာ ပါလာမယ်ဆိုရင် ကနေဒါ နောက်တန်းက ကာတာ တိုက်စစ်ကို မှုစရာမလိုတဲ့ အခြေအနေပါ။

.

ကနေဒါရဲ့ ဆိုင်လွန် လာရင်နဲ့ ဒေးဗီးစ် တို့အတွဲကို ကာတာနောက်တန်းက ထိန်းနိုင်ဖို့ မလွယ်ပါဘူး။ ကာတာကို နိုင်ပြီး ၃ မှတ်ရထားမှသာ ကနေဒါတို့ နောက်တစ်ဆင့်တက်ဖို့ အခြေအနေကောင်းမှာမို့ ဒီပွဲက ကနေဒါ သေချာပေါက် ၃ မှတ်ရမယ့်ပွဲလို့ပဲ ပြောရမှာပါ။

.

■ မက္ကဆီကို - တောင်ကိုရီးယား (နံနက် ၇-၃၀)

.

အုပ်စု A ရဲ့ ၃ မှတ်ရထားတဲ့ အသင်းအချင်းချင်း‌ တွေ့ကြမယ့်ပွဲမို့ ဒီပွဲနိုင်တဲ့အသင်းက အုပ်စုကို ဦးဆောင်ခွင့် ရမှာပါ။

.

မက္ကဆီကိုရဲ့ ဂျီမီနက်ဇ်၊ အယ်လ်ဗာရာဒို၊ ကွင်နိုနက်စ် တို့ရဲ့တိုက်စစ်က တော်တော်လေး စွမ်းဆောင်ရည် ကောင်းပြီး ကင်မင်ဂျေး ဦးဆောင်တဲ့ တောင်ကိုရီးယား ခံစစ်ကို ဖိအားပေးနိုင်စွမ်းရှိပါတယ်။

.

တောင်ကိုရီးယားကတော့ တိုက်စစ်မှာ ဆွန်ဟောင်မင်၊ လီကန်အင် တို့ကို အားပြုကစားနေပေမဲ့ ပြီးခဲ့တဲ့ ပွဲမှာတော့ ဒီနှစ်ယောက်က တော်တော်လေး လွဲခဲ့ကြတာကို တွေ့ရတယ်။ ကွင်းလယ်က ဟွမ်အင်ဘုံး ကတော့ ပြီးခဲ့တဲ့ပွဲမှာ ခြေစွမ်းပြထားခဲ့ပြီး ဒီပွဲမှာတော့ မက္ကဆီကို ရဲ့အဓိက ကွင်းလယ်လူ အဲရစ် လီယာနဲ့ ယှဉ်ရမှာပါ။

.

တောင်ကိုရီးယားက တိုက်စစ်ကစားပုံ သွက်တယ်ဆိုပေမဲ့ အသင်းလိုက် ဟန်ချက်ညီမှု မှာတော့ မက္ကဆီကို ကို မယှဉ်နိုင်ပါဘူး။ အိမ်ရှင်ဖြစ်နေတာရယ်၊ တောင်ကိုရီးယားခံစစ်က ဂိုးပေးနေတာရယ်ကို ထည့်တွက် လိုက်ရင် ဒီပွဲမှာ မက္ကဆီကို ၃ မှတ်ရသွားနိုင်ပါတယ်။

.