ကျောက်မဲနှင့် သီပေါတွင် ဆိုင်ကယ်သူခိုးများ သောင်းကျန်းနေ

.

၂၀၂၆ ခုနှစ်၊ ဇွန်လ ၄ ရက်

.

ရှမ်းပြည်နယ်မြောက်ပိုင်း၊ ကျောက်မဲနှင့် သီပေါမြို့များတွင် ဆိုင်ကယ်သူခိုးများ သောင်းကျန်းနေပြီး ဆိုင်ကယ် ခိုးယူခံရမှုများ မကြာခဏဖြစ်ပွားနေသည်ဟု ဒေသခံများထံက သိရသည်။

.

.

သီပေါမြို့၊ ဝက်ဝံဈေးအနီးတွင် ယမန်နေ့ ဇွန်လ ၃ ရက်၊ နံနက်ပိုင်းက ဒေသခံတစ်ဦး ဆိုင်ကယ်ရပ်၍ ဈေးဝယ်နေစဉ် ၎င်း၏ MDY-58W/27789 နံပါတ်ပါ ထိုင်းနိုင်ငံထုတ် Wave အဖြူရောင်ဆိုင်ကယ် ခိုးယူခံခဲ့ရခြင်းဖြစ်ကြောင်း သိရသည်။

.

“လိုင်စင်ဘီးပါ။ သက်တမ်းမတိုးရသေးဘူး။ ယိုးဒယားဘီး၊ ရှေ့ကာ နည်းနည်း ကွဲနေတယ်။ ရဲကိုတော့ ပြောထားတယ်” ဟု ဆိုင်ကယ်ခိုးယူခံရသူက ပြောသည်။

.

အလားတူ ဇွန်လ ၂ ရက်၊ နံနက်ပိုင်းကလည်း ကျောက်မဲမြို့၊ ရပ်ကွက် (၄) တွင် Scoppy 2021 အနက်ရောင် ဆိုင်ကယ်တစ်စီး နေအိမ်အတွင်း ရပ်ထားစဉ် ဆိုင်ကယ်ခိုးယူသူ ၂ ယောက်က ဝင်ရောက်ခိုးယူသွားခဲ့ကြောင်း သိရသည်။

.

အဆိုပါ ကျောက်မဲ၊ သီပေါ အပါအဝင် ရှမ်းပြည်နယ်မြောက်ပိုင်း ဒေသတွင် ကား၊ ဆိုင်ကယ် ခိုးယူမှုများ၊ နေအိမ်ဖောက်ထွင်းခိုးယူမှုများ မကြာခဏ ဖြစ်ပွားနေလျက်ရှိကြောင်း သိရသည်။

.