အစ္စရေးနဲ့ လက်ဘနွန် အပစ်ရပ်ဖို့ သဘောတူညီချက်ရ

.

၂၀၂၆ ခုနှစ်၊ ဇွန်လ ၄ ရက်

.

အမေရိကန်ရဲ့ ကြားဝင်ညှိနှိုင်းပေးမှုနဲ့အတူ အစ္စရေးနဲ့ လက်ဘနွန်တို့ မနေ့က ဇွန်လ ၃ ရက်မှာ အပစ်အခတ်ရပ်စဲဖို့ သဘောတူညီချက် ရရှိသွားခဲ့ကြပါပြီ။ အမေရိကန် နိုင်ငံခြားရေးဝန်ကြီးဌာန က ဒီနှစ်နိုင်ငံအကြား အပစ်ရပ်သဘောတူညီချက် ရသွားပြီဆိုတဲ့အကြောင်း ကြေညာချက် ထုတ်ပေး လိုက်ပါတယ်။

.

.

ဒါပေမဲ့ ဒီသဘောတူညီချက်က အီရန်ကနေ လက်နက်ထောက်ပံ့ထားတဲ့ ဟစ်ဇ်ဘိုလာအဖွဲ့တွေ ဆက်ပြီး တိုက်၊ မတိုက် ဆိုတဲ့အပေါ်မှာ မူတည်နေပြီး သူတို့ဖက်က ပစ်ခတ်မှုတွေ ရှိလာပြီဆိုတာနဲ့ စစ်ပွဲ ပြန်စမှာ ဖြစ်သလို အပစ်ရပ်စာချုပ်လည်း အလိုလိုပျက်ပြယ်သွားမှာပါ။

.

မနေ့က မနက်ပိုင်းမှာပဲ အစ္စရေးရဲ့လေကြောင်းတိုက်ခိုက်မှုတွေကြောင့် လက်ဘနွန်တောင်ပိုင်းမှာ လူ ၉ ဦးသေဆုံးခဲ့ပြီး ဟစ်ဇ်ဘိုလာတွေကလည်း အစ္စရေးမြောက်ပိုင်းကို ဒုံံးကျည်တွေနဲ့ ပစ်ခတ်မှုတွေ ရှိနေသေး တာပါ။ ဒါပေမဲ့ ဒီနေ့မှာတော့ သဘောတူညီချက်က ချက်ချင်းဆိုသလို ဖြစ်သွားခဲ့လို့ အပစ်ရပ်စဲရေး အခြေအနေကို လူတွေ စောင့်ကြည့်ချင်စရာ ဖြစ်သွားခဲ့ကြတာပါ။

.

အမေရိကန်ရဲ့ကြေညာချက်မှာတော့ “အစ္စရေးနဲ့ လက်ဘနွန်အကြား အနာဂတ်ဆက်ဆံရေးကို အာဏာပိုင် အစိုးရနှစ်ရပ်ကသာ ဆုံးဖြတ်ရမှာဖြစ်တဲ့အကြောင်းနဲ့ ဘယ်နိုင်ငံကမှ ဓားစာခံ ဖမ်းဆီးတာမျိုး၊ တိုက်ခိုက်မှု စတင်ပြုလုပ်တာမျိုး မလုပ်ရမယ့်အကြောင်း” ပါရှိပါတယ်။

.

ဒါ့အပြင် အစ္စရေးက ထိန်းချုပ်ထားတဲ့ လက်ဘနွန်တောင်ပိုင်းဒေသ လီတာနီမြစ်ကနေ နယ်စပ်အထိ ဧရိယာအားလုံးကနေ ဟစ်ဇ်ဘိုလာ တပ်ဖွဲ့ဝင်တွေ ဆုတ်ခွာရမယ်ဆိုတဲ့အချက်ကလည်း သဘောတူညီချက် ထဲမှာ ပါနေပါသေးတယ်။

.

အစ္စရေးနဲ့ လက်ဘနွန် နိုင်ငံခေါင်းဆောင်တွေကို ဇွန်လ ၂၂ ရက်နေ့မှာ တွေ့ဆုံစေပြီး အပြီးသတ် သဘော တူညီချက် ရယူပေးဖို့ အမေရိကန်က စီစဉ်နေပေမဲ့လည်း ဟစ်ဇ်ဘိုလာ ဖက်ကတော့ တုန့်ပြန်မှုတွေမရှိဘဲ ငြိမ်သက်နေတာကို တွေ့ရပါတယ်။

.

ဒါ့အပြင် ဟစ်ဇ်ဘိုလာဖက်ကတော့ လက်ဘနွန်နဲ့ အစ္စရေး ဆွေးနွေးပွဲကနေ ထွက်ပေါ်လာတဲ့ ရလာဒ်တွေကို လိုက်နာမှာ မဟုတ်တဲ့အကြောင်း ဟစ်ဇ်ဘိုလာအဖွဲ့ရဲ့ ကောင်စီဝင် ကာမာတီက ပြောဆိုထားပါတယ်။

.

Source – BBC

.