တောင်ကြီးတွင် ဆိုင်ကယ်ခိုးယူလာသူ ၂ ဦးကို ဖမ်းမိ

.

၂၀၂၆ ခုနှစ်၊ ဇွန်လ ၁ ရက်

.

ရှမ်းပြည်နယ်မြို့တော်၊ တောင်ကြီးမြို့၊ ကံသာရပ်ကွက်တွင် ယနေ့ ဇွန်လ ၁ ရက်၊ နံနက်ပိုင်းက မော်တော်ဆိုင်ကယ် ခိုးယူလာသူ ၂ ဦးကို သက်သေခံဆိုင်ကယ်နှင့်အတူ ဖမ်းဆီးရမိခဲ့ကြောင်း သိရသည်။

.

.

တောင်ကြီးမြို့၊ ကံသာရပ်ကွက်၊ မေတ္တာရှင်လမ်းမပေါ်တွင် ရဲတပ်ဖွဲ့ဝင်များက ယနေ့ ဇွန်လ ၁ ရက်၊ နံနက် ၈ နာရီခွဲခန့်၌ ပိတ်ဆို့စစ်ဆေး ဆောင်ရွက်နေစဉ် ယင်းလမ်းအတိုင်း အမျိုးသားနှစ်ဦး မောင်းနှင်လာသည့် မသင်္ကာဖွယ်ရာ သော့မပါ ဆိုင်ကယ်တစ်စီးကို ရပ်တန့်စစ်ဆေးခဲ့ခြင်းဖြစ်ကြောင်း သိရသည်။

.

စစ်ဆေးပေါ်ပေါက်ချက်အရ ဆိုင်ကယ်မောင်းနှင်သူ ကိုကိုလတ် နှင့် နောက်မှ လိုက်ပါစီးနင်းလာသူ ကိုကိုဦး တို့သည် ဆိုင်ကယ်နှင့် ပတ်သက်သည့် ပိုင်ဆိုင်မှုအထောက်အထား တစ်စုံတစ်ရာ မပြသနိုင်ဘဲ အဆိုပါ မော်တော်ဆိုင်ကယ်အား ယမန်နေ့ မေလ ၃၁ ရက်၊ ညပိုင်းက တောင်ကြီးမြို့၊ ရေအေးကွင်းရပ်ကွက်၊ ရေထွက်ဦးလမ်းရှိ စတိုးဆိုင် တစ်ခုမှ ခိုးယူခဲ့ခြင်းဖြစ်ကြောင်း စစ်ဆေးပေါ်ပေါက်ခဲ့ခြင်းဖြစ်သည်။

.

အဆိုပါ ဆိုင်ကယ်ခိုးယူမှုနှင့် ပတ်သက်၍ ကိုကိုလတ်နှင့် ကိုကိုဦး ဆိုသူတို့ ၂ ဦးအား အမှုဖွင့်အရေးယူနိုင်ရေး စီစဉ်ဆောင်ရွက်လျက်ရှိကြောင်း သိရသည်။

.

တောင်ကြီးမြို့ပေါ်တွင် ဆိုင်ကယ်ခိုးယူခံရမှုများ မကြာခဏ ဖြစ်ပွားနေပြီး ပြန်လည်ရရှိမှုနှင့် ကျူးလွန်သူကို ဖမ်းဆီးရမိမှု နည်းပါးကြောင်း ဒေသခံများက ပြောဆိုကြသည်။

.