ဘန်ကောက်မှာ ကယ်ရီသမားတွေကို ရဲက သေနတ်နဲ့ ပစ်ခတ်လို့ တစ်ယောက် သေဆုံး

.

၂၀၂၆ ခုနှစ်၊ ဇွန်လ ၁၅ ရက်

.

ထိုင်းနိုင်ငံ၊ ဘန်ကောက်၊ ဒင်ဒါယန်းခရိုင်မှာ မနေ့ ဇွန်လ ၁၅ ရက်က အရပ်ဝတ် ရဲတစ်ယောက်နဲ့ ဆိုင်ကယ် ကယ်ရီသမားတွေ စကားများပြီး ရဲက သေနတ်ထုတ် ပစ်ခဲ့တာကြောင့် ကယ်ရီသမားတစ်ဦးသေဆုံးကာ ၂ ဦး ဒဏ်ရာရသွား ခဲ့ပါတယ်။

.

.

တနင်္ဂနွေ မနက်အစောပိုင်းမှာ ဖြစ်ခဲ့တဲ့ ဒီအမှုကို အနီးအနားနေသူတွေက သတင်းပို့တိုင်ကြားခဲ့ကြတာပါ။ အခင်းဖြစ်တဲ့နေရာကို ရဲတွေ ရောက်သွားကြချိန်မှာတော့ ဆိုင်ကယ် ကယ်ရီမောင်းသူဖြစ်တဲ့ ပူရစ် က ရင်ဘတ်နဲ့ နောက်ကျောမှာ ကျည်ထိမှန်ထားတဲ့ ဒဏ်ရာတွေနဲ့ ပက်လက်အနေအထား သေဆုံးနေတာကို တွေ့ခဲ့ရပြီး အခြားကယ်ရီသမား နှစ်ဦးဖြစ်တဲ့ ဆရီရက်နဲ့ ခူနာရက် တို့က ပေါင်မှာ သေနတ်ဒဏ်ရာတွေ ရရှိထားခဲ့တာကို တွေ့ရတာပါ။

.

မျက်မြင်သက်သေတွေရဲ့ပြောဆိုချက်အရ ပစ်ခတ်သူက အနက်ရောင် လက်ရှည်အင်္ကျီ၊ ဂျင်းဘောင်းဘီတိုနဲ့ အနက်ရောင်ပုခုံးလွယ်အိတ်ကို ဝတ်ဆင်ထားပြီး ထိုင်နေကြတဲ့ ကယ်ရီသမားအုပ်စုဆီ သွားရောက်ခဲ့တာလို့ သိရတာပါ။

.

အဲဒီနောက် ပစ်ခတ်သူနဲ့ကယ်ရီသမားတွေ စကားများ ရန်ဖြစ်ကြပြီးတဲ့နောက် အဲဒီအမျိုးသားက ပစ္စတို သေနတ်ကိုထုတ်ပြီး ကယ်ရီသမားတွေဖက်ကို အချက်ပေါင်းများစွာ ပစ်ခတ်ခဲ့တယ်လို့ မျက်မြင်သက်သေ တွေက ပြောခဲ့ကြတာပါ။

.

အဲဒီနောက်မှာတော့ ပစ်ခတ်မှုပြုလုပ်ခဲ့တဲ့ အမျိုးသားက မက်ကာဆန်ရဲစခန်းကို ကိုယ်တိုင်သွားရောက် အဖမ်းခံခဲ့ပြီး သူက နယ်ခြားစောင့်ရဲတပ်ဖွဲ့ဝင် ပေါ့ဝါတနာ ဖြစ်ကြောင်း ဝန်ခံခဲ့တာပါ။ သူကိုင်ဆောင်ခဲ့တဲ့ ၉ မီလီမီတာ SIG Sauer အမျိုးအစား သေနတ်နဲ့ ကျည်ကတ်ကိုလည်း ရဲစခန်းဆီ အပ်နှံခဲ့ပါတယ်။

.

ပေါ့ဝါတနာရဲ့ ထွက်ဆိုချက်အရတော့ ဒီပစ်ခတ်မှုက ကယ်ရီခ အငြင်းပွားရာကနေ စခဲ့ပြီး ကယ်ရီသမား တွေက အရင်ဆုံး ကိုယ်ထိလက်ရောက် တိုက်ခိုက်ခဲ့တာကြောင့် ကိုယ့်ကိုယ်ကိုယ် ကာကွယ်ဖို့အတွက် သေနတ်သုံးခဲ့ရတာဖြစ်တယ်လို့ သိရတာပါ။

.

ရဲတပ်ဖွဲ့ရဲ့ CCTV စစ်ဆေးမှုတွေမှာတော့ ပစ်ခတ်မှု မဖြစ်ပွားမီ အချိန်မှာ ကယ်ရီမောင်းသူနှစ်ဦးက ပစ်ခတ်သူ အမျိုးသားကို စတင်ရိုက်နှက်ခဲ့ကြတာကို တွေ့ခဲ့ရပါတယ်။

.

ပစ်ခတ်သူရဲ့ဆွေမျိုးတစ်ဦးကတော့ ဒီအငြင်းပွားမှုဟာ မက်ကာဆန် ဒေသမှာရှိတဲ့ သူ့အိမ်ကိုပြန်ဖို့အတွက် ကယ်ရီငှားစီးဖို့ ကြိုးစားရကနေ ကယ်ရီခမတန်တဆ တောင်းတာကြောင့် စတင်စကားများခဲ့တာဖြစ်တယ်လို့ ရဲတပ်ဖွဲ့ကိုပြောပါတယ်။

.

ဒါ့အပြင် ပစ်ခတ်သူထံမှာ စိတ်ကျန်းမာရေးဆိုင်ရာ ရောဂါလည်းရှိနေပြီး ဆရာဝန်ညွှန်ကြားထားတဲ့‌ ဆေးတွေကို ပုံမှန်သောက်နေရသူဖြစ်တယ်လို့ သူ့ရဲ့ဆွေမျိုးဖြစ်သူက ရဲတပ်ဖွဲ့ဆီ ပြောဆိုခဲ့ပါသေးတယ်။

.

Source – Bangkok Post

.