တန့်ယန်းတွင် အုတ်တံတိုင်းပြိုကျပိမိပြီး အမျိုးသမီးတစ်ဦး သေဆုံး

.

၂၀၂၆ ခုနှစ်၊ ဇွန်လ ၈ ရက်

.

ရှမ်းပြည်နယ်မြောက်ပိုင်း၊ တန့်ယန်းမြို့တွင် ယနေ့ ဇွန်လ ၈ ရက်၊ နံနက်ပိုင်းက မိုးသည်းထန်စွာ ရွာသွန်းမှု ကြောင့် နေအိမ်တစ်လုံး အုတ်တံတိုင်းပြိုကျပြီး အမျိုးသမီးတစ်ဦး ပိမိသေဆုံးခဲ့ကြောင်း သိရသည်။

.

.

တန့်ယန်းမြို့၊ ရပ်ကွက် (၆)၊ အုပ်စု (၅) ရှိ နေအိမ်တစ်လုံးအနီးတွင် ယနေ့ ဇွန်လ ၈ ရက်၊ နံနက် ၇ နာရီခန့်က မြေပြိုမှု ဖြစ်ပွားခဲ့ပြီး နေအိမ်တစ်လုံးပေါ်သို့ ပိမိနေသည့်အတွက် မီးသတ်တပ်ဖွဲ့က ရှာဖွေ ကယ်ဆယ်ရေးလုပ်ငန်းများ သွားရောက်ဆောင်ရွက်ခဲ့ရာ အမျိုးသမီးတစ်ဦး ပိမိသေဆုံးနေသည်ကို တွေ့ရှိခဲ့ရခြင်းဖြစ်ကြောင်း တန့်ယန်း ဗဟိုမီးသတ်က ထုတ်ပြန်ထားသည်။

.

ထို့အပြင် တန့်ယန်းမြို့ပေါ် ရပ်ကွက် (၅) နှင့် ရပ်ကွက် (၆) ရှိ ကမ်းပါးရံများတွင် တည်ဆောက်ထားသည့် နေအိမ်အချို့ကိုလည်း ဘေးလွတ်ရာသို့ ရွှေ့ပြောင်းပေးထားကြောင်း သိရသည်။

.

မိုးလေဝသနှင့် ဇလဗေဒညွှန်ကြားမှုဦးစီးဌာန၏ ယနေ့ ဇွန်လ ၈ ရက်၊ နံနက် ၈ နာရီအချိန် ထုတ်ပြန်ချက် များအရ ရှမ်းပြည်နယ်တွင် နေရာစိပ်စိပ် မိုးထစ်ချုန်း ရွာနိုင်ပြီး ရှမ်းပြည်နယ်မြောက်ပိုင်းတွင် မိုးတိမ်တောင် များ ဖြစ်ထွန်းနေကာ လေပြင်းတိုက်ခတ်ခြင်း ၊မိုးကြိုးပစ်ခြင်းနှင့် မိုးကြီးခြင်းများ ဖြစ်ပေါ်နိုင်ကြောင်း သတိပေးထားသည်။

.