တောင်ကြီးတွင် စက်သုံးဆီအရောင်းဆိုင်အချို့ ရောင်းချိန် လျော့လာသဖြင့် ဒေသခံများ အခက်ကြုံ

.

၂၀၂၆ ခုနှစ်၊ ဇွန်လ ၅ ရက်

.

ရှမ်းပြည်နယ်မြို့တော် တောင်ကြီးမြို့ပေါ်ရှိ စက်သုံးဆီအရောင်းဆိုင်အချို့တွင် ရောင်းချပေးသည့်အချိန် လျော့နည်းလာသည့်အတွက် ဒေသခံများ ဆီဝယ်ယူရန် ခက်ခဲလာနေရကြောင်း သိရသည်။

.

.

တောင်ကြီးမြို့ပေါ်ရှိ စက်သုံးဆီ အရောင်းဆိုင်များတွင် ယခင်က နေ့စဉ် နံနက် ၆ နာရီမှ ညနေ ၄ နာရီခွဲအထိ ယာဉ်အမျိုးအစားအလိုက် သတ်မှတ်ခွဲတမ်းဖြင့် စက်သုံးဆီ ရောင်းချပေးခဲ့သော်လည်း ယခု ဇွန်လဆန်းပိုင်းမှ စတင်၍ နေ့လယ်ပိုင်းအချိန်ထိသာ ရောင်းချပေးတော့ကြောင်း သိရသည်။

.

“တချို့ဆိုင်တွေက နေ့လယ်ပိုင်းအထိ ရောင်းတယ်။ တချို့ဆိုင်တွေဆိုရင် ခုရက်ပိုင်း မနက်ပိုင်း ခဏလေးပဲ ဖွင့်ပြီး ရောင်းတော့တယ်။ ခွဲတမ်းနဲ့ ရတဲ့ဆီတောင် ဆိုင်မဖွင့်တာနဲ့ ထုတ်လို့မရတော့ဘူး” ဟု တောင်ကြီးမြို့၊ ချမ်းသာရပ်ကွက်နေ ဒေသခံတစ်ဦးက ကမ္ဘောဇတိုင်းသို့ ပြောသည်။

.

စက်သုံးဆီ ဖြန့်ဖြူးရောင်းချပေးနေသည့် ဆိုင်များတွင် ရရှိသည့် စက်သုံးဆီခွဲတမ်း လျော့နည်းလာသည့် အတွက် ယင်းကဲ့သို့ အချိန်လျှော့ချ ရောင်းချပေးခြင်း ဖြစ်နိုင်ကြောင်း ၎င်းက ဆက်လက်ပြောဆိုခဲ့သည်။

.

“ကျောင်းဖွင့်ချိန်ရောက်မှ ဆီက ပိုတောင်ဆိုးလာသေးတယ်။ မနက်အစောပဲ ၀ယ်လို့ရတယ်။ ၁၀ နာရီ ကျော်သွားရင်တောင် ၀ယ်လို့မရတော့ဘူး။ အလုပ်အားချိန် ဆီထည့်မယ်သွားတိုင်း ဆိုင်တွေက ပိတ်နေပြီ” ဟု အခြားဒေသခံတစ်ဦးကလည်း ပြောဆိုခဲ့သည်။

.

ယခုအခါ ကျောင်းဖွင့်ရာသီ ရောက်ရှိလာပြီဖြစ်သည့်အတွက် စက်သုံးဆီနှင့် ပတ်သက်၍ ဖြေလျှော့ပေးရန် ဒေသခံများက လိုလားနေသော်လည်း ဝယ်ယူရန် ပိုမိုခက်ခဲလာနေရခြင်း ဖြစ်ကြောင်း ဒေသခံများက ပြောဆိုကြသည်။

.

ယင်းကဲ့သို့ စက်သုံးဆီ အရောင်းဆိုင်ကြီးများတွင် ခွဲတမ်းအလိုက် ရရှိသည့် ဆီကို ဝယ်ယူရန် ခက်ခဲနေ သော်လည်း ပြင်ပဈေးကွက်တွင်မူ ဈေးကြီးပေး၍ အလွယ်တကူ ဝယ်ယူရရှိနိုင်နေကြောင်း ပြောဆိုမှုများ လည်း ရှိနေသည်။

.