နမ့်ခမ်းမြို့နယ်၊ ကောင်းတပ်ကျေးရွာ ပေါက်ကွဲမှုကြောင့် သေဆုံးသွားသူများ၏ မိသားစုဝင်များကို TNLA တောင်းပန်

.

၂၀၂၆ ခုနှစ်၊ ဇွန်လ ၈ ရက်

.

ရှမ်းပြည်နယ်မြောက်ပိုင်း၊ နမ့်ခမ်းမြိုန့ယ်၊ ကောင်းတပ်ကျေးရွာတွင် ဖြစ်ပွားခဲ့သော ပေါက်ကွဲမှုကြောင့် သေဆုံးသွားသူများ၏ မိသားစုဝင်များကို PSLF/TNLA က ယနေ့ ဇွန်လ ၈ ရက်တွင် ထောက်ပံ့ငွေများ ပေးအပ်ပြီး လေးနက်စွာ တောင်းပန်ကြောင်း ဖော်ပြကာ ရက်လည်တရားနာ ပြုလုပ်ခဲ့ကြောင်း PSLF/TNLA သတင်းနှင့် ပြန်ကြားရေးက က ထုတ်ပြန်ထားသည်။

.

.

နမ့်ခမ်းမြို့နယ်၊ ကောင်းတပ်ကျေးရွာတွင် ပြီးခဲ့သည့် မေလ ၃၁ ရက်၊ နေ့လယ်ပိုင်းက ယမ်းပေါက်ကွဲမှု ကြောင့် အသက်ဆုံးရှုံးခဲ့ရသူများ၏ ကျန်ရစ်သူ မိသားစုများအား လူသားချင်း စာနာထောက်ထားမှု အကူ အညီအဖြစ် ကွယ်လွန်သူတစ်ဦးလျှင် ငွေကျပ် သိန်း ၁၀၀ စီ ထောက်ပံ့ပေးအပ်ခဲ့ကြောင်း ထုတ်ပြန်ချက်တွင် ဖော်ပြထားသည်။

.

ထို့အပြင် ပေါက်ကွဲမှုကြောင့် ထိခိုက်ဒဏ်ရာရရှိသူများ အတွက်လည်း လိုအပ်သည့် ဆေးဝါးကုသမှုများ၊ ကျန်းမာရေးစောင့်ရှောက်မှုများနှင့် အခြားလိုအပ်သည့် အကူအညီများကို ဆက်လက်ပံ့ပိုးကူညီပေးသွားမည် ဖြစ်ကြောင်း PSLF/TNLA က ဆိုသည်။

.

ရက်လည်တရားနာနှင့် ထောက်ပံ့ငွေ ပေးအပ်ပွဲတွင် PSLF/TNLA ခေါင်းဆောင်များနှင့် တာဝန်ရှိသူများက ယခုဖြစ်စဉ်ကြောင့် အသက်ဆုံးရှုံးခဲ့ရသူများ၊ ထိခိုက်ဒဏ်ရာရရှိခဲ့ရသူများနှင့် မိသားစုဝင်များအား ထပ်တူ ဝမ်းနည်းကြေကွဲရပါကြောင်း ပြောကြားခဲ့ပြီး ဖြစ်စဉ်ကြောင့် ဖြစ်ပေါ်လာသည့် နစ်နာဆုံးရှုံးမှုများအပေါ် အလေးအနက်ထား၍ တာဝန်ယူဆောင်ရွက်သွားမည်ဖြစ်ကြောင်းနှင့် ထိခိုက်နစ်နာခဲ့ရသည့် ပြည်သူများ ပြန်လည်ထူထောင်နိုင်ရေးအတွက် အစွမ်းကုန် ကူညီဆောင်ရွက်သွားမည်ဖြစ်ကြောင်း ပြောဆိုခဲ့သည်ဟု ဖော်ပြပါရှိသည်။

.

ပြန်လည်ထူထောင်ရေးလုပ်ငန်းများအတွက် ဖွဲ့စည်းထားသည့် ကောင်းတပ်ရပ်ကွက် ပြန်လည်ထူထောင်ရေး ကော်မတီ အနေဖြင့် ပြည်တွင်း၊ ပြည်ပ အနယ်နယ်အရပ်ရပ်မှ စေတနာရှင်များ၊ အဖွဲ့အစည်းများနှင့် မိဘပြည်သူများ၏ မေတ္တာ၊ စေတနာဖြင့် ပါဝင်လှူဒါန်းထားသည့် အလှူငွေများကို လက်ခံရရှိထားပြီး လက်ရှိအချိန်ထိ တရုတ်ယွမ်ငွေ ၂၀၆၄၃၅ ယွမ်နှင့် မြန်မာကျပ်ငွေ သိန်း ၉ ထောင်ကျော် လက်ခံရရှိထား ပြီးဖြစ်ကြောင်း သိရသည်။

.

အဆိုပါ အလှူငွေများကို ကောင်းတပ်ရပ်ကွက် ပြန်လည်ထူထောင်ရေး လုပ်ငန်းများအတွက်သာ သီးသန့် ထိန်းသိမ်းထားရှိပြီး ပြန်လည်ထူထောင်ရေးလုပ်ငန်းများ စတင်ဆောင်ရွက်ချိန်တွင် စနစ်တကျ စီမံခန့်ခွဲ အသုံးပြုသွားမည်ဖြစ်ကြောင်း PSLF/TNLA က ထုတ်ပြန်ထားသည်။

.