ကျောင်းအုပ်ကြီးရဲ့ အရေးပေါ်ဆုံးဖြတ်ချက်ကြောင့် ကျောင်းသား ၉၀၀ အသက်ဘေးမှ လွတ်မြောက်

.

၂၀၂၆ ခုနှစ်၊ ဩဂုတ်လ ၃၁ ရက်

.

နီပေါနိုင်ငံ နူဝါကော့ဒ်ဒေသမှာ ရေကြီးမှု မဖြစ်ပွားမီ ၁၀ မိနစ်အလို ကျောင်းသား ၉၀၀ ကို အချိန်မီ ရွှေ့ပြောင်းပေးနိုင်ခဲ့တာကြောင့် အသက်ဘေးကနေ လွတ်မြောက်ခဲ့ကြပါတယ်။

.

.

ထရိဘူဝန် ထရစ်ရှူလီ အလယ်တန်းကျောင်း ကျောင်းအုပ်ကြီး ရာဂျင်ဒရာ ဒါဝါဒီဟာ မနက် ၉ နာရီ ၁၀ မိနစ်မှာ ရေကြီးမယ့်အကြောင်း မိနစ်ပိုင်းအတွင်း ဖုန်းလေးကြိမ်ခေါ်ဆို သိတိပေးစကားရရှိပြီး နောက် ကျောင်းသားတွေကို အမြင့်ပိုင်းနေရာတွေဆီ ချက်ချင်း ရွှေ့ပြောင်းပေးခဲ့တာပါ။

.

ဒါ့အပြင် ကျောင်းထဲဝင်လာတဲ့ ကျောင်းကားတွေကိုလည်း  အန္တရာယ်လွတ်ကင်းရာနေကို ချက်ချင်း ပြန်လှည့်စေခဲ့ပါတယ်။

.

“၁၀ မိနစ်လောက် နောက်ကျခဲ့ရင် ကျောင်းသားတွေနဲ့ ကျွန်တော်ပါ ဒီနေ့ စကားပြောနိုင်တော့မှာ မဟုတ်ဘူး” လို့ ဒါဝါဒီက ပြောပါတယ်။

.

ရေကြီးမှုကြောင့် ကျောင်းအဆောက်အအုံနဲ့ အနီးအနားက အဆောင်တွေဟာ မြေကြီးနဲ့ အပျက်အစီး တွေအောက် နစ်မြုပ်သွားခဲ့ပါတယ်။

.

အသက် ၁၆ နှစ်အရွယ် ကျောင်းသူ ယူနီရှာ အမတ်ယာကတော့ သူနဲ့ သူငယ်ချင်းတွေဟာ ရေမကြီးမီ စက္ကန့်အနည်းငယ်အလိုမှာ ကျောင်းနောက်ဘက်ကနေ တောင်ကုန်းပေါ်ကို အပြေးအလွှား ထွက်ပြေးခဲ့ရ တယ်လို့ ပြောပါတယ်။

.

လမ်းတွေ ပျက်စီးပြီး သွားလာရေးပြတ်တောက်ခဲ့တာကြောင့် ကျောင်းသားနဲ့ ဆရာ၊ ဆရာမတွေဟာ အနီးအနားကျေးရွာမှာ နှစ်ညကြာ ပိတ်မိခဲ့ပြီး နောက်ပိုင်းမှာ ကယ်ဆယ်ရေးအဖွဲ့တွေက ရဟတ်ယာဉ်နဲ့ ကယ်ထုတ်ခဲ့ပါတယ်။

.

ယူနီရှာရဲ့ မိဘတွေကလည်း သမီးနဲ့ အဆက်အသွယ်မရတာကြောင့် အသက်ဆုံးရှုံးသွားပြီလို့ ထင်ခဲ့ပေမဲ့ နောက်ဆုံးမှာ ဖုန်းပြန်ဆက်သွယ်နိုင်ခဲ့ပြီး သမီးအသက်ရှင်နေကြောင်း သိခဲ့ရပါတယ်။

.

နီပေါရေကြီးမှုကြောင့် လူ ၇၉၄ ဦးထက်မနည်း သေဆုံးပြီး ၂,၄၂၆ ဦး ပျောက်ဆုံးနေပါတယ်။

.

ကျောင်းအုပ်ကြီး ဒါဝါဒီကတော့ အရေးပေါ်သတိပေးစနစ်တွေ ပိုကောင်းမွန်ခဲ့မယ်ဆိုရင် လူတွေ အန္တရာယ်ကို ပိုစောစီးစွာ တုံ့ပြန်နိုင်မယ်လို့ ပြောပါတယ်။ ဒါပေမယ့် သူ့အနေနဲ့ အချိန်မီ ဆုံးဖြတ်ပြီး ကျောင်းသားတွေကို ရွှေ့ပြောင်းပေးနိုင်ခဲ့တာကြောင့် လူရာနဲ့ချီတဲ့ အသက်တွေကို ကယ်တင်နိုင်ခဲ့တယ်လို့ ဆိုပါတယ်။

.

Ref – BBC

.