.
၂၀၂၆ ခုနှစ်၊ ဩဂုတ်လ ၄ ရက်
.
ရှမ်းပြည်နယ်တောင်ပိုင်း၊ တောင်ကြီးမြို့နယ်၊ အေးသာယာမြို့တွင်
ယမန်နေ့ ဩဂုတ်လ ၃ ရက်၊ နံနက်ပိုင်းက အမျိုးသမီးတစ်ဦးတည်း နေထိုင်သည့် နေအိမ်အား ဝင်ရောက်
အနုကြမ်းစီးမှု ဖြစ်ပွားခဲ့ ကြောင်း သိရသည်။
.
အေးသာယာမြို့၊ အမှတ် (၉) ရပ်ကွက်နေ အမျိုးသမီးတစ်ဦးသည်
ယမန်နေ့ ဩဂုတ်လ ၃ ရက်၊ နံနက် အစောပိုင်းက မျက်နှာသစ်ပြီး နေအိမ်ထဲသို့ ပြန်ဝင်လာစဉ်
မီးဖိုချောင်ခန်းအတွင်း၌ မျက်နှာအား ပုဆိုးခြုံ ထားသည့် အမျိုးသားတစ်ဦးအား တွေ့ရှိသဖြင့်
အော်ဟစ်စဉ် ၎င်းအမျိုးသားက ပါးစပ်အား လက်ဖြင့်ပိတ်ပြီး မျက်နှာကို လက်သီးဖြင့်ထိုးသဖြင့်
ရှေ့အပေါ်၊ အောက် သွားများ ကျိုးသည့် နာကျင်ဒဏ်ရာ၊ မျက်နှာဖူးရောင်ဒဏ်ရာ၊ လက်နာကျင်ဒဏ်ရာများ
ရရှိခဲ့ကြောင်း သိရသည်။
.
ထို့နောက် လုယက်သူက အမျိုးသမီး၏ လက်အား ဝါယာကြိုးဖြင့်
ချည်နှောင်ပြီး ပါးစပ်တွင် အဝတ်ထည့်၍ အော်လျှင် သတ်ပစ်မည်ဟု ခြိမ်းခြောက်ကာ နားတွင်
ဝတ်ဆင်ထားသော ရွှေခြယ် နားကပ်အပြာရောင်၊ ငွေသား ကျပ် ၂ သိန်းနှင့် လက်ကိုင်ဖုန်တို့အား
အဓမ္မ ယူဆောင် ထွက်ပြေးသွားခဲ့ကြောင်း သိရသည်။
.
“ဝင်ခိုးတာပါ။ ခိုးရင်းနဲ့ အိမ်ရှင်နဲ့
တွေ့တာပါ။ (ကျူးလွန်သူကို) စုံစမ်းနေတုန်းပါပဲ” ဟု တာဝန်ရှိသူ တစ်ဦးက ပြောသည်။
.
အဆိုပါ အမျိုးသမီးအား ထိုးကြိတ်ရိုက်နှက်ပြီး ရွှေထည်၊
ငွေသားနှင့် လက်ကိုင်ဖုန်းအား အဓမ္မ ယူဆောင်သွားသူ အမည်မသိ အမျိုးသားအား အေးသာယာ နယ်မြေရဲစခန်းတွင်
ရာဇသတ်ကြီးပုဒ်မ ၄၅၉/၃၉၂ ဖြင့် အမှုဖွင့်ပြီး ဖမ်းဆီးရမိနိုင်ရေးအတွက် ဆောင်ရွက်လျက်ရှိကြောင်း
သိရသည်။
.
No comments:
Post a Comment