ညောင်ရွှေ၌ ကလေးငယ်များ အုပ်စုဖွဲ့ ရန်ဖြစ် (ရုပ်သံ)

ရှမ်းပြည်နယ်၊ ညောင်ရွှေမြို့ရှိ အားကစားကွင်း၌ ယနေ့ ဩဂုတ်လ ၃၀ ရက်၊ နေ့လယ်ပိုင်းတွင် ကျောင်းသားအရွယ် ကလေးငယ်များ အုပ်စုဖွဲ့ ရန်ဖြစ်မှု ဖြစ်ပွားခဲ့ကြောင်း သိရသည်။

.

ကမ္ဘောဇတိုင်းက ရရှိထားသည့် ရုပ်သံဖိုင်တွင် ကလေးငယ် တစ်ဦးကို အခြား ကလေးငယ် တစ်ဦးက ပြင်းထန်စွာ ထိုးကြိတ်နေသည်ကို တွေ့မြင်ခဲ့ရပြီး တစ်ဖက်တွင်လည်း ကလေးငယ် ၂ ဦး ရန်ဖြစ်နေသည်ကို တွေ့မြင်ရကာ ရန်ပွဲအား အခြား ကလေးငယ် ၁၀ ဦးကျော်ခန့်က ကြည့်ရှုနေကြခြင်း ဖြစ်သည်။

.

“ ဒီနေ့ နေ့လယ် ၂ နာရီလောက်မှာ ဖြစ်တာပါ။ အားကစားကွင်းထဲမှာ ကလေး အချင်းချင်း အုပ်စုဖွဲ့ ဖြစ်ကြတာ၊ တွေ့လို့ မဖြစ်ဖို့ ဆူပြီး ပြန်လွှတ်လိုက်ပါတယ်။ အခုတော့ ဘာမှ မဖြစ်တော့ပါဘူး။” ဟု မြင်တွေ့သူ တစ်ဦးက ပြောသည်။

.

ကလေးငယ်များ အုပ်စုဖွဲ့ ရန်ဖြစ်မှုများ မကြာခဏ ဖြစ်ပွားလာနေသည့် အပြင် ဂိုဏ်းပုံစံဖြင့် အုပ်စုဖွဲ့ သွားလာမှုများကြောင့် မိဘများမှာ ၎င်းတို့ သားသမီးများ ပါဝင် ပတ်သက်မည်ကို စိုးရိမ်နေကြရသည်ဟုလည်း သိရသည်။

.

တောင်ကြီးမြို့တွင်လည်း လူငယ်ဂိုဏ်းများ ပေါ်ထွက်လာနေပြီး ဂိုဏ်းအဖွဲ့ဝင် လူငယ် ၈ ဦးထက် မနည်းကို ရဲတပ်ဖွဲ့က ခေါ်ယူ စစ်ဆေးမှုများ ပြုလုပ်ထားသော်လည်း ထိရောက်သည့် ပညာပေးခြင်း၊ အရေးယူခြင်းများ ရှိ/မရှိကိုမူ မသိရသေးပေ။

.

Link – https://youtu.be/zwiPJKV5iO8

.
#KBZTai #Shan #NyaungShwe  #Young