တာချီလိတ်တွင် စစ်သားအယောင်ဆောင်၍ လူငယ် ၂ ဦးကို ဖမ်းဆီးခေါ်ဆောင်ခဲ့သူများကို ဖမ်းမိ

.

၂၀၂၆ ခုနှစ်၊ ဩဂုတ်လ ၃၁ ရက်

.

ရှမ်းပြည်နယ်အရှေ့ပိုင်း တာချီလိတ်မြို့တွင် စစ်သားအယောင်ဆောင်၍ လူငယ် ၂ ဦးကို လက်ထိပ်ခတ် ဖမ်းဆီးခေါ်ဆောင်လာသူများကို ဖမ်းဆီးရမိခဲ့ကြောင်း သိရသည်။

.

.

တာချီလိတ်မြို့၊ ဖန်မင်ကျေးရွာအုပ်စု၊ မယ်ဟုတ်ကျေးရွာအနီး မယ်ဟုတ်တံတားတွင် ယမန်နေ့ ဩဂုတ် ၃၀ ရက် နံနက် ၁၂ နာရီခွဲခန့်က ရှောင်တခင် စစ်ဆေးမှုများ ပြုလုပ်နေစဉ် အနက်ရောင် Nissan X-Trail ကားတစ်စီးကို ရပ်တန့်စစ်ဆေးခဲ့ကြောင်း သိရသည်။

.

ထိုသို့ စစ်ဆေးရာတွင် ကားပေါ်တွင် ယာဉ်မောင်းနှင်သူ ဇွဲညီညီခန့်၊ ဉာဏ်လင်းထွန်းနှင့် သဲအိချိုတို့ ၃ ဦးကို တွေ့ခဲ့ရပြီး ကားနောက်ဖုံးအတွင်း လူငယ် ၂ ဦးအား လက်ထိပ်ခတ်လျက် ဖမ်းဆီး ခေါ်ဆောင်လာသည်ကို စစ်ဆေးတွေ့ရှိခဲ့ရခြင်းဖြစ်ကြောင်း သိရသည်။

.

ဖမ်းဆီးခံရသူ ၂ ဦး၏ ထွက်ဆိုချက်အရ ၎င်းတို့သည် ဩဂုတ်လ ၂၉ ရက်နှင့် ၃၀ ရက်၊ ညပိုင်းက တာချီလိတ်မြို့၊ တစ်နေရာစီတွင် “တာဝန်အရ မေးစရာရှိသည်” ဟု ဆိုကာ ဖမ်းဆီးခံရခြင်းဖြစ်ပြီး ဖမ်းဆီးသူများက ၎င်းတို့ ၂ ဦးကို လက်သီးဖြင့်ထိုးသည့်အပြင် လျှာဖြတ်မည်ဟု ခြိမ်းခြောက်ပြောဆိုကာ ကားနောက်ဖုံးအတွက် လက်ထိတ်ခတ်လျက် ခေါ်ဆောင်လာခဲ့ခြင်းဖြစ်ကြောင်း သိရသည်။

.

အဆိုပါ ကိစ္စနှင့် ပတ်သက်၍ စစ်သားအယောင်ဆောင်ကာ ပြည်သူ့စစ်မှုထမ်း တပ်သားသစ် စုဆောင်းရေး အကြောင်းပြ လူဖမ်းဆီး၊ ခြိမ်းခြောက်ခေါ်ဆောင်လာသူ ဇွဲညီညီခန့်၊ ဉာဏ်လင်းထွန်းနှင့် မသဲအိချိုတို့ ၃ ဦးကို ပူးပေါင်းအဖွဲ့က စစ်ဆေးနေပြီး ဥပဒေအရ အရေးယူသွားမည်ဖြစ်ကြောင်း သိရသည်။

.