ဂျာမနီအရှေ့ပိုင်းမှာ လျှပ်စစ်ဓာတ်အားလိုင်းအနီး ဖောက်ခွဲရေးပစ္စည်း ၂၁ ခု တွေ့ရှိ

.

၂၀၂၆ ခုနှစ်၊ စက်တင်ဘာလ ၈ ရက်

.

ဂျာမနီနိုင်ငံ အရှေ့ပိုင်း ဆက်ဆိုနီပြည်နယ်မှာ လျှပ်စစ်ဓာတ်အားလိုင်းတွေကို ဖျက်ဆီးတိုက်ခိုက်မှုတွေနဲ့ ပတ်သက်ပြီး စုံစမ်းစစ်ဆေးနေစဉ် ဖောက်ခွဲရေးပစ္စည်း စုစုပေါင်း ၂၁ ခုအထိ တွေ့ရှိထားတယ်လို့ အာဏာပိုင် တွေက ပြောပါတယ်။

.

,

ပြီးခဲ့တဲ့ သီတင်းပတ်ကုန်ကလည်း ဂေါ်လစ်ဇ်ခရိုင်၊ ဂရောက်စ်တိုင် ဓာတ်အားခွဲရုံရဲ့ တောင်ဘက်မှာရှိတဲ့ ဓာတ်အားလိုင်းမြင့်တွေ အနီးကနေ အိမ်လုပ် ဖောက်ခွဲရေးပစ္စည်း ၉ ခု ထပ်မံတွေ့ရှိခဲ့တာကြောင့် အခုအချိန် အထိ တွေ့ရှိထားတဲ့ ဖောက်ခွဲရေးပစ္စည်း စုစုပေါင်း ၂၁ ခု ရှိလာပြီလို့ ရဲတပ်ဖွဲ့နဲ့ အစိုးရရှေ့နေတွေက ပူးတွဲ ထုတ်ပြန်ပါတယ်။

.

ပြီးခဲ့တဲ့ သီတင်းပတ်အတွင်း ဂျာမနီနိုင်ငံမှာ လျှပ်စစ်ဓာတ်အားလိုင်းတွေကို ဖျက်ဆီးတိုက်ခိုက်တဲ့ ဖြစ်စဉ် တွေ ဆက်တိုက်ဖြစ်ပွားခဲ့ပြီး အရေးကြီးတဲ့ အခြေခံအဆောက်အအုံတွေ လုံခြုံရေးနဲ့ပတ်သက်ပြီး ဥရောပ တစ်ဝန်း စိုးရိမ်မှုတွေ မြင့်တက်နေပါတယ်။

.

ဂျာမနီနိုင်ငံဟာ အရေးကြီးအခြေခံအဆောက်အအုံတွေ လုံခြုံရေးအားနည်းနိုင်တဲ့အခြေအနေနဲ့ ပတ်သက်ပြီး ဥရောပမှာ အထူးစိုးရိမ်စရာ ဖြစ်လာတာပါ။ ပြီးခဲ့တဲ့ ဩဂုတ်လက လိုက်ပ်ဇစ်ဟာလေး လေဆိပ်မှာ ဒရုန်း တိုက်ခိုက်မှု ဖြစ်ပွားခဲ့ပြီးနောက် လျှပ်စစ်ဓာတ်အားလိုင်းတွေကို ဖျက်ဆီးတဲ့ ဖြစ်စဉ်တွေ ပြီးခဲ့တဲ့ သီတင်းပတ် အတွင်း ဆက်တိုက်ဖြစ်ပွားခဲ့ပါတယ်။ အဲဒီဒရုန်းတိုက်ခိုက်မှုအတွက် ရုရှားနိုင်ငံမှာ တာဝန်ရှိတယ်လို့ ဂျာမန် အစိုးရက တရားဝင် စွပ်စွဲထားပါတယ်။

.

ဂျာမန်ရဲတပ်ဖွဲ့ကလည်း ပြီးခဲ့တဲ့ သောကြာနေ့မှာ လျှပ်စစ်ဓာတ်အားလိုင်း ဖျက်ဆီးတိုက်ခိုက်မှုတွေကို သူကိုယ်တိုင် လုပ်ဆောင်ခဲ့တယ်လို့ ရေးသားထားတဲ့ စာတွေ ပေးပို့ခဲ့တဲ့ အမျိုးသားတစ်ဦးကို ရှာဖွေနေတယ် လို့ ပြောပါတယ်။

.

အဲဒီအမျိုးသားရဲ့ နေအိမ်မှာ ဖောက်ခွဲရေးပစ္စည်းလို့ ယူဆရတဲ့ ပစ္စည်းတွေကို တွေ့ရှိခဲ့တာဖြစ်ပြီး လက်ရှိ အချိန်အထိတော့ အဲဒီအမျိုးသားဟာ ထွက်ပြေးလွတ်မြောက်နေဆဲ ဖြစ်ပါတယ်။

.

တစ်ချိန်တည်းမှာပဲ ဘာလင်မြို့မှာ တနင်္လာနေ့အစောပိုင်းက မီးလောင်ခဲ့တဲ့ ထရန်စဖော်မာ ဓာတ်အားခွဲရုံနဲ့ ပတ်သက်ပြီး ကနဦးစစ်ဆေးချက်တွေအရ ဖျက်ဆီးတိုက်ခိုက်မှုကြောင့် မဟုတ်ဘဲ နည်းပညာပိုင်းဆိုင်ရာ ချို့ယွင်းမှုကြောင့် မီးလောင်ခဲ့တာဖြစ်တယ်လို့ ရဲတပ်ဖွဲ့အကြီးအကဲ ဘာဘရာ စလိုဗစ် မိုင်ဇယ် ကို ကိုးကား ပြီး သတင်းဌာနတွေက ဖော်ပြပါတယ်။

.

ဒါ့အပြင် ဂျာမနီနိုင်ငံအနောက်ပိုင်း ဗေးဇယ် မြို့မှာလည်း ထရန်စဖော်မာ ဓာတ်အားခွဲရုံတစ်ခုရဲ့ လုံခြုံရေး ခြံစည်းရိုးကို ဖြတ်တောက်ဖွင့်ထားတာ တွေ့ရှိခဲ့ပြီးနောက် ရဲတပ်ဖွဲ့က အကြီးစားစစ်ဆေးမှု တွေ ပြုလုပ် နေတယ်လို့ Bild သတင်းစာက ဖော်ပြပါတယ်။

.

Ref -Reuters

.