တိုင်ဖွန်း ဆော်ဒယ်လ် တိုက်ခတ်မှုကြောင့် တရုတ်ကမ်းရိုးတန်းဒေသများ မိုးသည်းထန်ပြီး ရေကြီးရေလျှံနေ

.

၂၀၂၆ ခုနှစ်၊ စက်တင်ဘာလ ၄ ရက်

.

 တရုတ်နိုင်ငံ တောင်ပိုင်းကမ်းရိုးတန်းပြည်နယ်တွေဖြစ်တဲ့ ဖူကျန့်နဲ့ ကွမ်တုံ ပြည်နယ်တွေမှာ တိုင်ဖွန်း ဆော်ဒယ်လ် ကြောင့် မိုးသည်းထန်စွာ ရွာသွန်းပြီး မြို့ပြနဲ့ ကျေးလက်ဒေသတွေမှာ ရေကြီးရေလျှံမှုတွေ ဖြစ်ပေါ် နေပါတယ်။

.

.

ရေကြီးမှုကြောင့် ကားတွေ ရေမြုပ်ခဲ့သလို သုံးထပ်အုတ်အဆောက်အအုံတစ်လုံးလည်း ပြိုကျခဲ့ပြီး ဒေသအများအပြားမှာ အရေးပေါ်ရေဘေးကာကွယ်ရေးလုပ်ငန်းတွေ လုပ်ဆောင်နေပါတယ်။

.

ဖူကျန့်ပြည်နယ် ဖူတင်းမြို့မှာ မိုးသည်းထန်စွာ ရွာသွန်းပြီး ရေတွေ မြင့်တက်လာတာကြောင့် မီးသတ် တပ်ဖွဲ့ဝင်တွေဟာ ခါးလောက်အထိ ရောက်တဲ့ ရေကြီးရေလျှံမှုတွေထဲ ဖြတ်သန်းပြီး သက်ကြီးရွယ်အို တွေကို ဘေးလွတ်ရာ ကယ်ဆယ်ခဲ့ကြပါတယ်။

.

တောင်တန်းတွေနဲ့ ဝန်းရံထားတဲ့ လက်ဖက်စိုက်ပျိုးရေးဒေသဖြစ်တဲ့ အနီးအနား ကျင်ရှီးရွာမှာလည်း ရေစီးအားပြင်းပြင်းနဲ့ စီးဝင်လာတာကြောင့် လူနေအဆောက်အအုံတွေ ရေမြုပ်ခဲ့ပြီး သုံးထပ်အိမ် တစ်လုံး ပြိုကျခဲ့ပါတယ်။

.

ရေကြီးရေလျှံမှုတွေကြောင့် ကမ်းရိုးတန်းဒေသအများအပြားမှာ ကျောင်းတွေ ပိတ်ထားပြီး အများပြည်သူသုံး သယ်ယူပို့ဆောင်ရေးလုပ်ငန်းတွေကိုလည်း ရပ်ဆိုင်းထားပါတယ်။

.

တိုင်ဖွန်း ဆော်ဒယ်လ်ဟာ တောင်တရုတ်ပင်လယ်ပြင်မှာ အင်အားပြန်လည်ကောင်းလာပြီးနောက် ကြာသပတေးနေ့ မနက်ပိုင်းမှာ ဖူကျန့်ကမ်းရိုးတန်းကို တတိယအကြိမ် ဝင်ရောက်တိုက်ခတ်ခဲ့ပါတယ်။

.

ဒီနှစ်အတွင်း တရုတ်နိုင်ငံကို ဝင်ရောက်တိုက်ခတ်တဲ့ တိုင်ဖွန်းမုန်တိုင်းတွေထဲမှာ ဆော်ဒယ်လ်ဟာ သတ္တမမြောက် မုန်တိုင်းဖြစ်ပါတယ်။ ဒါ့အပြင် အရှေ့ပိုင်း ကျဲ့ကျန်းပြည်နယ်၊ ယူဟွမ်မြို့ကိုလည်း နှစ်လမပြည့်ခင် တတိယအကြိမ် ဝင်ရောက်တိုက်ခတ်တဲ့ တိုင်ဖွန်းမုန်တိုင်း ဖြစ်ပါတယ်။

.

တရုတ်မိုးလေဝသဌာနကတော့ ဒီလို မုန်တိုင်းဖြစ်စဉ်တွေဟာ အလွန်ရှားပါးပြီး အယ်လ်နီညို ဖြစ်စဉ်နဲ့ ဆက်စပ်နေတယ်လို့ ပြောပါတယ်။

.

အယ်လ်နီညို ဖြစ်ပေါ်တဲ့နှစ်တွေမှာ အနောက်ပစိဖိတ်ဒေသက လေထုဖိအားမြင့်ဧရိယာဟာ ပုံမှန်ထက် ပိုအားကောင်းပြီး မြောက်ဘက်ကို ရွေ့လျားတာကြောင့် တိုင်ဖွန်းမုန်တိုင်းတွေဟာ အနောက်မြောက် ဘက်ကို ဦးတည်ကာ တရုတ်နိုင်ငံ အရှေ့ဘက်ကမ်းရိုးတန်းကို တိုက်ရိုက်ဝင်ရောက်လာနိုင်ပါတယ်။

.

ကုလသမဂ္ဂကလည်း အယ်လ်နီညိုဟာ ၂၀၂၇ ခုနှစ်အထိ ပိုမိုအားကောင်းလာနိုင်ပြီး စံချိန်တင် အားအကောင်းဆုံး အယ်လ်နီညို ဖြစ်လာနိုင်တာကြောင့် ရေရှည်ပြင်းထန်တဲ့ ရာသီဥတုဖြစ်စဉ်တွေ ဖြစ်ပေါ်နိုင်ခြေ မြင့်တက်လာမယ်လို့ သတိပေးထားပါတယ်။

.

ဩဂုတ်လကုန်ပိုင်းကတည်းက ကျဲ့ကျန်းပြည်နယ်နဲ့ အနီးအနားပြည်နယ်တွေမှာ လူပေါင်း ရာနဲ့ချီ ရွှေ့ပြောင်းပေးထားရပြီး ဖူကျန့်ပြည်နယ်တစ်ခုတည်းမှာတင် ဆော်ဒယ်လ်မုန်တိုင်းကြောင့် လူပေါင်း ၈၃,၀၀၀ ကျော် ကို ဘေးလွတ်ရာ ရွှေ့ပြောင်းပေးခဲ့ရပါတယ်။

.

ဖူကျန့်ပြည်နယ် ဖူထျန်မြို့မှာလည်း မြို့လယ်ကို ဖြတ်သန်းစီးဆင်းတဲ့ မူလန်မြစ်ရေ မြင့်တက်လာ တာကြောင့် အဓိကလမ်းမကြီးတွေမှာ ရေကျော်ဝင်ရောက်ခဲ့ပြီး တံတားအဆောက်အအုံတချို့နဲ့ လူနေအဆောက်အအုံတွေ ထိခိုက်ပျက်စီးခဲ့ပါတယ်။

.

Ref – Reuters

.