ထူးရတနာအောင်ကိုယ်ပိုင်ကျောင်း တည်ထောင်သူက ရှယ်ယာရှင်နှင့် မိဘများထံမှ ငွေကြေးလိမ်လည် ထွက်ပြေးနေ

.

၂၀၂၆ ခုနှစ်၊ နိုဝင်ဘာလ ၁၀ ရက်

.

တောင်ကြီးမြို့၊ ပြည်တော်သာရပ်ကွက်ရှိ ထူးရတနာအောင် ကိုယ်ပိုင်မူလတန်းကျောင်း တည်ထောင်သူ ဒေါ်ရွှေရည်ဝင်း (ခေါ်) ဒေါ်နွယ်နွယ်ဝင်းက ကျောင်းရှယ်ယာငွေများနှင့် ကျောင်းသားမိဘများထံမှ ငွေကြေးများကို လိမ်လည်ရယူကာ ထွက်ပြေးတိမ်းရှောင်နေကြောင်း သိရသည်။

.

.

ကျောင်းတည်ထောင်သူ ဒေါ်ရွှေရည်ဝင်း (ခေါ်) ဒေါ်နွယ်နွယ်ဝင်းက ကျောင်း ရှယ်ယာရှင်များထံမှ ရှယ်ယာငွေကြေး များကို လိမ်လည်သွား သည့်အပြင် ကျောင်းသားမိဘများအား အယုံသွင်းကာ ငွေးချေးယူထွက်ပြေးသွားခဲ့ခြင်းဖြစ်ကာ ကျောင်းတွင် တာဝန် ထမ်းဆောင်နေသည့် ဆရာ/ဆရာမများနှင့် ရုံးဝန်ထမ်းများ၏ လစာများကိုလည်း ပေးချေခြင်း မရှိသေးကြောင်း ယင်း ကျောင်းမှ ကျောင်းအုပ်ထံက သိရသည်။

.

“ကျွန်မတို့က သူ့ရဲ့ဝန်ထမ်းပါ။ လစာကတော့ အရင်လ ၁၀ လပိုင်းလစာ မရှင်းရသေးပါဘူး။ မပေးနိုင်တော့တဲ့အချိန် နည်းနည်း စကားတွေများကြသေးပါတယ်။ ကလေးမိဘတွေ ကတော့ တစ်ယောက်၊ နှစ်ယောက်လောက်ပဲ လွတ်မယ်။ အကုန်လုံးနီးပါး လိမ်သွားပါတယ်" ဟု ထူးရတနာအောင် ကိုယ်ပိုင်ကျောင်းမှ ကျောင်းအုပ်က ပြောသည်။

.

လက်ရှိ ကျောင်းသား/သူများ၏ သင်ကြားရေးနှင့် ပတ်သက်၍ ကျောင်းအုပ်နှင့် ဆရာ/ဆရာမများက ဆက်လက် ဆောင်ရွက်ပေးသွားမည်ဖြစ်ကြောင်း ၎င်းထံက သိရသည်။

.

“မနေ့က မိဘ၊ ဆရာ အစည်းအဝေး အရင်လုပ်လိုက်တယ်။ သင်ကြားရေးနဲ့ ပတ်သက်လို့ရှိရင် တီချယ်တို့က အဆုံးထိ တာဝန်ယူသွားမှာဖြစ်လို့ စိတ်မပူဖို့ ပြောခဲ့ပါတယ်။ သူ့ရဲ့ Personal နဲ့ ပတ်သက်တဲ့ ငွေကြေးကိစ္စကတော့ တီချယ်တို့နဲ့ မသက်ဆိုင်ပါဘူး။ ကျောင်းကိုတော့ ဆက်ပြီး တာဝန်ယူသွားမှာပါ” ဟု ကျောင်းအုပ်က ဆက်လက်ပြောဆိုခဲ့သည်။

.

ထူးရတနာအောင် ကိုယ်ပိုင်ကျောင်းတွင် လက်ရှိ ဆရာ/ဆရာမ ၉ ဦးနှင့် ရုံးဝန်ထမ်းတစ်ဦး စုစုပေါင်း ဝန်ထမ်း ၁၀ ဦး ရှိပြီး ကျောင်းသား၊ ကျောင်းသူ ၁၈ ဦး တက်ရောက်ပညာသင်ကြားနေလျက်ရှိကာ Pre-KG မှ Grade-5 အထိ သင်ကြား ပေးလျက်ရှိကြောင်း သိရသည်။

.

ကျောင်းတည်ထောင်သူ ဒေါ်ရွှေရည်ဝင်း (ခေါ်) ဒေါ်နွယ်နွယ်ဝင်းသည် ထူးရတနာအောင် ကိုယ်ပိုင်မူလတန်းကျောင်း အပြင် Maths World International Olympaid Mathematics Center အမည်ဖြင့် သင်တန်းကျောင်းတစ်ခု ဖွင့်လှစ် ထားပြီး လက်ရှိတွင် ယင်းသင်တန်းကျောင်းကိုလည်း ပိတ်ထားကြောင်း တွေ့ရသည်။

.

အဆိုပါကိစ္စနှင့် ပတ်သက်၍ ထူးရတနာအောင်ကိုယ်ပိုင်ကျောင်း တည်ထောင်သူ ဒေါ်ရွှေရည်ဝင်း (ခ) ဒေါ်နွယ်နွယ်ဝင်း အား ဆက်သွယ်မေးမြန်းရာတွင် ဆက်သွယ်၍ မရခဲ့ချေ။

.

ရှမ်းပြည်နယ်ပညာရေးမှူးရုံးမှ တာဝန်ရှိသူတစ်ဦးက “သိသိချင်းပဲ ကွင်းဆင်းစစ်ဆေး ခိုင်း ထားပါတယ်။ ပြီးခဲ့တဲ့ နိုဝင်ဘာ ၆ ရက်နေ့မှာ ကိုယ်ပိုင်ကျောင်း အစည်းအဝေး ဆောင်ရွက်ညွှန်ကြားချက်နဲ့ ကိုယ်ပိုင် ကျောင်းတွေ လိုက်နာဆောင်ရွက်ရမယ့် အချက်တွေကိုလည်း ပြောကြားခဲ့ပြီးဖြစ်ပါတယ်” ဟု ပြောဆိုခဲ့သည်။

.