.
“ အရင် နှစ်တုန်းကတော့ ငလျင်ကြီးကြောင့် မြန်မာ့ရိုးရာသင်္ကြန်ပွဲကို အေးသင်္ကြန်အဖြစ်ပဲ ကျင်းပခဲ့ပါတယ်။ ဒီနှစ်မှာတော့ မြန်မာ့ရိုးရာယဉ်ကျေးမှုနဲ့အညီ ယိမ်းအကပြိုင်ပွဲတွေ၊ ဒေသခံအဆိုတော်တွေရဲ့ ဖျော်ဖြေမှုတွေနဲ့ စည်ကားသိုက်မြိုက်စွာ ကျင်းပသွားမှာ ဖြစ်ပါတယ်။ တောင်ကြီးမြို့ပေါ်မှာ ဗဟိုမဏ္ဍပ် အပါအဝင် မဏ္ဍပ် ၉ ခု ဆောက်လုပ်ဖို့ စီစဉ် ဆောင်ရွက်လျက်ရှိပါတယ်” ဟု တောင်ကြီးမြို့တော် မဟာသင်္ကြန်ပွဲတော် ကျင်းပရေး ပြန်ကြားရေး၊ သတင်းထုတ်ပြန်ရေး၊ မှတ်တမ်းတင်ရေးကော်မတီ အတွင်းရေးမှူး၊ ရှမ်းပြည်နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ ညွှန်ကြားရေးမှူး ဦးစိုးညွန့်ရွှေက ပြောသည်။
.
အဆိုပါ မဏ္ဍပ်များမှာ ရှမ်းပြည်နယ်လွှတ်တော်အနီးတွင် ဗဟိုမဏ္ဍပ်၊ ပြည်နယ်လမ်းဦးစီးဌာနရှေ့၊ ဗိုလ်ချုပ်ပန်းခြံထောင့်၊ City Square ရှေ့၊ ကုန်သည်လမ်းထိပ်၊ မြို့မဈေးဆိုင်ကယ်စတန်း၊ တရုတ်ဘုံကျောင်းရှေ့၊ ပြည်နယ်စိုက်ပျိုးရေးဦးစီးဌာနရုံးရှေ့နှင့် အရှေ့ပိုင်းတိုင်းစစ်ဌာနချုပ် ရှေ့တို့တွင် ဆောက်လုပ်သွားမည် ဖြစ်ကြောင်း သိရသည်။
.
သင်္ကြန်ယိမ်းပြိုင်ပွဲကိုလည်း ထည့်သွင်း ကျင်းပသွားမည်ဖြစ်ပြီး ပြိုင်ပွဲဝင်ယိမ်းအဖွဲ့ ၂၀ ခန့် ရှိကာ ဖျော်ဖြေရေး ယိမ်းအဖွဲ့များလည်း ပါဝင်မည် ဖြစ်ကြောင်း သိရသည်။
.
မဟာသင်္ကြန်ပွဲတော်နှင့်အတူ သင်္ကြန်အကြိုနေ့မှ နှစ်ဆန်း ၃ ရက်အထိ ၇ ရက်တိုင်တိုင် အသံမစဲ ပဋ္ဌာန်း ရွတ်ဖတ်ပူဇော်ပွဲကိုလည်း ကျင်းပသွားမည် ဖြစ်ပြီး မြန်မာနှစ်ဆန်းတစ်ရက်နေ့တွင် ဇီဝိတဒါန စုပေါင်း ငါးလွှတ်ပွဲ၊ သက်ကြီးပူဇော်ပွဲ၊ အန္တရာယ်ကင်းပရိတ်တရားနာယူပွဲတို့ကို ပြုလုပ်သွားမည်ဖြစ်ကြောင်းလည်း ၎င်းက ဆိုရသည်။
.
ထို့အပြင် ထူးထူးခြားခြား အနေဖြင့် မြန်မာနိုင်ငံ၏ ဒြပ်မဲ့ယဉ်ကျေးမှု အမွေအနှစ် ဖြစ်လာစေရေးအတွက် သင်္ကြန်ပွဲတော်နှင့်အတူ သနပ်ခါး ကမ်ပိန်းအပြင် ရှမ်းပြည်နယ်ဒေသထွက် လက်ဖက်နှင့် ကော်ဖီ ကမ်ပိန်းများ၊ မြန်မာ့ရိုးရာထမနဲ ကမ်ပိန်းများကိုလည်း ထည့်သွင်း ကျင်းပသွားမည် ဖြစ်ကြောင်း သိရသည်။
No comments:
Post a Comment