အစေ့ထုတ်ပြောင်း စိုက်ပျိုးမည့် ဧရိယာများအတွင်း တောင်ယာခုတ်ထွင် မီးရှို့ခြင်း မပြုလုပ်ရန် အသိပေး တားမြစ်ထား

၂၀၂၆ ခုနှစ်၊ မတ်လ ၃၀ ရက်

.

အစေ့ထုတ်ပြောင်း (မိုး) စိုက်ပျိုးမည့် ဧရိယာများအတွင်း တောင်ယာခုတ်ထွင် မီးရှို့ခြင်း မပြုလုပ်ရန် မီးခိုးမြူ ကင်းစင်ကြောင်း ထောက်ခံချက် ထုတ်ပေးရေးလုပ်ငန်း မှတ်ပုံတင်ခြင်းဆိုင်ရာ အစိုးရ-ပုဂ္ဂလိက လုပ်ငန်းအဖွဲ့က အသိပေး တားမြစ်ထားသည်ဟု သိရသည်။

 

ထိုင်းနိုင်ငံအနေဖြင့် နယ်စပ်ဖြတ်ကျော်မီးခိုးမြူနှင့် PM2.5 လေထုညစ်ညမ်းခြင်းကို လျှော့ချနိုင်ရန် တောင်ယာခုတ်ထွင် မီးရှို့ခြင်း မပြုလုပ်သည့် ဒေသများမှ စိုက်ပျိုးထွက်ရှိသည့် အစေ့ထုတ် ပြောင်းများကိုသာ တင်သွင်းခွင့်ပြုနေသဖြင့် စိုက်ပျိုးထွက်ရှိရာ ဒေသများတွင် တောင်ယာခုတ်ထွင်မီးရှို့ခြင်း ရှိ/မရှိအား အာဆီယံမိုးလေဝသဌာန (ASEAN Specialized Meteorological Centre-ASMC) မှ ပေးပို့သည့် Fire Hotspot ဖြစ်ပေါ်တွေ့ရှိမှုများကို အခြေခံကာ နောက်ကြောင်းပြန် စိစစ်သည့် အစီအစဉ်များဖြင့် စနစ်တကျစိစစ်၍ မီးခိုးမြူကင်းစင်ကြောင်း ထောက်ခံချက်ထုတ်ပေးရေး လုပ်ငန်းမှတ်ပုံတင်ခြင်းဆိုင်ရာ အစိုးရ-ပုဂ္ဂလိက လုပ်ငန်း အဖွဲ့အနေဖြင့် ထောက်ခံချက်များအား ထုတ်ပေးလျက်ရှိကြောင်း သိရသည်။

.

သို့ဖြစ်၍ အစေ့ထုတ်ပြောင်းစိုက်ပျိုးမည့် တောင်သူများ အနေဖြင့် အစေ့ထုတ်ပြောင်း (မိုး) စိုက်ရာသီမတိုင်မီ စိုက်ပျိုးမည့် ဧရိယာများအတွင်း တောင်ယာခုတ်ထွင်မီးရှို့ခြင်းအား လုံးဝ ဆောင်ရွက်ခြင်းမပြုရန် အဆိုပါ လုပ်ငန်းအဖွဲ့က အသိပေး တားမြစ်ထားခြင်း ဖြစ်သည်။

.

ရှမ်းပြည်နယ်ရှိ ဒေသအချို့တွင် ရွေ့ပြောင်းတောင်ယာစနစ် ကျင့်သုံးခြင်း၊ စိုက်ပျိုးရေး စွန့်ပစ် အမှိုက်သရိုက်များအား မီးရှို့ခြင်းတို့ကြောင့် နှစ်စဉ် မီးခိုးမြူငွေ့များ ပျံ့နှံ့ရောက်ရှိခဲ့ပြီး လေထု ညစ်ညမ်းမှုများ ဖြစ်ပေါ်နေလျက်ရှိကြောင်း သိရသည်။

.

ထိုင်း-မြန်မာ နယ်စပ်ရှိ တာချီလိတ်မြို့တွင်လည်း လေထု အရည်အသွေးမှာ အနီရောင်အဆင့်သို့ ရောက်ရှိ နေကြောင်း တာချီလိတ်ခရိုင် ပတ်ဝန်းကျင်ထိန်းသိမ်းရေးဦးစီးဌာန၏ ထုတ်ပြန်ချက်များအရ သိရသည်။