.
၂၀၂၆ ခုနှစ်၊ မတ်လ ၂၅ ရက်
.
လတ်တလော ကြုံတွေ့နေရသည့် စက်သုံးဆီအကြပ်အတည်းကြောင့်
တောင်ကြီးမြို့ပေါ်တွင် ရေကား မှာယူသုံးစွဲရန်ပင် အခက်အခဲဖြစ်ပေါ်လာနေရကြောင်း သိရသည်။
.
တောင်ကြီးမြို့ပေါ်နေ ပြည်သူအများစုသည် သုံးစွဲရေအတွက်
ရေကားများကို မှာယူသုံးစွဲနေကြရခြင်း ဖြစ်ပြီး ယခု စက်သုံးဆီ အကြပ်အတည်းကြောင့် ရေကားမှာယူသုံးစွဲရန်ပင်
အခက်အခဲများ ဖြစ်ပေါ်နေပြီး သုံးစွဲရေ ပြတ်လပ်မှုများ ကြုံတွေ့နေရကြောင်း သိရသည်။
.
“သောက်ရေအတွက်က ရေသန့်ကားကနေ ဝယ်သုံးလို့ရနေသေးတယ်။
သုံးရေအတွက်ကြတော့ မှာချင်တိုင်း မှာလို့မရတော့ဘူး။ ဆီမရတော့ ရေကားတွေလည်း သိပ်မထွက်နိုင်တော့ဘူးထင်တယ်။
ရေရမယ်ဆိုရင် ဈေးတက်လည်း ပေး၀ယ်ရမယ့်သဘော ဖြစ်နေတယ်” ဟု တောင်ကြီးမြို့၊ ကျောင်းကြီးစုရပ်ကွက်၊
နယ်မြေ (၈) တွင် နေထိုင်သူတစ်ဦးက ကမ္ဘောဇတိုင်းသို့ ပြောသည်။
.
သုံးစွဲရေ သယ်ယူရောင်းချသည့် ရေကားများအနေဖြင့်လည်း
စက်သုံးဆီရရှိသည့်အပေါ် မူတည်၍ ပုံမှန် ဝယ်ယူသည့် ဖောက်သည်များကို ဦးစားပေး ပို့ဆောင်နေရပြီး
အခြား မှာယူသူများကို အလှည့်ကျဖြင့် ပို့ဆောင်ပေးနိုင်ရန် ဆောင်ရွက်ပေးနေရကြောင်း သိရသည်။
.
“တတ်နိုင်သလောက်တော့ အကုန်လုံးကို ရစေချင်တာပေါ့။
အခုက ပုံမှန်ဖောက်သည်ကို ဦးစားပေးနေ ရတဲ့ သဘောပေါ့။ ကြားကမှာတဲ့အိမ်တွေကိုလည်း
ကားတစ်စီးလုံးအပြည့် မရတောင် တစ်အိမ်ကို တစ်ဝက်နှုန်းနဲ့ ပို့ပေးပါတယ်။ နည်းနည်းတော့
ပိုပင်ပန်းတာပေါ့။ သုံးရေကား တစ်ဝက်လောက်ရတော့လည်း အဆင်ပြေ သွားတာပေါ့” ဟု ရေရောင်းချသူ
ကိုဂူးလေးက ပြောသည်။
.
လက်ရှိတွင် ပို့ရသည့် နေရာ အနီးအဝေးပေါ် မူတည်၍ ရေကားတစ်စီးလျှင်
၂၀၀၀၀ ကျပ် ဝန်းကျင်ခန့်ဖြင့် ပို့ဆောင်ပေးနေကြောင်း ရေကား မောင်းနှင်သူများထံက သိရသည်။
.
တောင်ကြီးမြို့သည် မြေအောက်ရေကို အဓိကထား သုံးစွဲနေရပြီး
စည်ပင်ရေပိုက်လိုင်းမှာလည်း အပြည့်အဝ လွှမ်းခြုံနိုင်ခြင်း မရှိသည့်အတွက် နွေရာသီရောက်တိုင်း
သုံးရေ ရှားပါးမှုပြဿနာကို နှစ်စဉ်ကြုံတွေ့ရ တတ်ပြီး ယခု စက်သုံးဆီအကြပ်အတည်းကြောင့်
လာမည့် နွေရာသီအတွင်း သုံးစွဲရေပြဿနာ ပိုမိုကြုံတွေ့ လာနိုင်ကြောင်း သုံးသပ်ပြောဆိုမှုများလည်း
ရှိနေသည်။
.
No comments:
Post a Comment