တာချီလိတ်တွင် လေပြင်းတိုက်ခတ်မှုကြောင့် သစ်ပင်များကျိုးကျပျက်စီး

.

၂၀၂၆ ခုနှစ်၊ ဧပြီလ ၂၇ ရက်

.

ရှမ်းပြည်နယ်အရှေ့ပိုင်း၊ တာချီလိတ်မြို့တွင် ယမန်နေ့ ဧပြီလ ၂၇ ရက်၊ ညပိုင်းက မိုးရွာသွန်းပြီး လေပြင်း တိုက်ခတ်၍ သစ်ပင်ကိုင်းအများအပြား ကျိုးကျကာ ထိခိုက်ပျက်စီးမှုများ ရှိခဲ့ကြောင်း သိရသည်။

.

.

ယမန်နေ့ ဧပြီလ ၂၇ ရက်၊ ည ၇ နာရီခွဲအချိန်ခန့်က တိုက်ခတ်သွားသော လေပြင်းနှင့် မိုးရွာသွန်းမှုကြောင့် တာချီလိတ်မြို့၊ ဆွတ်ဆိုင်ကျေးရွာ၊ ပါလျှံ (၂)၊ ဝေဠုဝန်ကျောင်းလမ်း၊ ချစ်ကြည်ရေးလမ်းမပေါ်ရှိ ရှမ်းရိုးမ ကွင်းရှေ့၊ ဆန်ဆိုင်း (က)၊ အမှတ် (၁) ချစ်ကြည်ရေးတံတား စသည့်နေရာများတွင် သစ်ပင်ကြီးများ ကျိုးကျ ပျက်စီးခဲ့ခြင်းဖြစ်ကြောင်း သိရသည်။

.

ထို့အပြင် လေပြင်းတိုက်ခတ်မှုကြောင့် ပုန်းထွန်ရပ်ကွက်၊ နမ္မလင်းရွာ၊ မယ်ဆိုင်ချောင်းအတွင်း သုံးဘီး ဆိုင်ကယ်တစ်စီး ပြုတ်ကျခဲ့ပြီး မီးသတ်တပ်ဖွဲ့မှ ဆယ်ယူပေးခဲ့ရကြောင်း သိရသည်။

.

တာချီလိတ်မြို့တွင် ဧပြီလ ၁၈ ရက်၊ ညပိုင်းကလည်း လေပြင်းတိုက်ခတ်မှု တစ်ကြိမ် ဖြစ်ပွားခဲ့ဖူးပြီး ယမန်နေ့ ဧပြီလ ၂၇ ရက်၊ ညပိုင်းတွင် ဒုတိယအကြိမ်အဖြစ် ထပ်မံတိုက်ခတ်ခြင်းဖြစ်ကြောင်း သိရသည်။

.

ယင်းကဲ့သို့ လေပြင်းတိုက်ခတ်မှုကြောင့် သစ်ပင်အချို့ ကျိုးကျပြီး ကြော်ငြာဆိုင်းဘုတ်အချို့ ပြိုလဲခြင်း၊ ဓါတ်တိုင်မီးလောင်ခြင်းများ ဖြစ်ပွားခဲ့ကာ တာချီလိတ်တစ်မြို့လုံး လျှပ်စစ်မီး ခေတ္တပြတ်တောက်ခဲ့ရသည် ဟု သိရသည်။

.

လေပြင်းတိုက်ခတ်မှုကြောင့် ဖြစ်ပေါ်ခဲ့သည့် အပျက်အစီးများကို ညတွင်းချင်း ဖယ်ရှားရှင်းလင်းနေပြီး ယနေ့ ဧပြီလ ၂၈ ရက်၊ နံနက်ပိုင်းတွင်လည်း ဆက်လက်ဖယ်ရှားရှင်းလင်းလက်ရှိကြောင်း သိရသည်။

.

ထို့အတူ မိုင်းဆတ်မြို့နယ်တွင်လည်း လေပြင်းတိုက်ခတ်မှုကြောင့် မယ်နင်ကျေးရွာအုပ်စု၊ ကာနကျေးရွာ၊ မိုင်းဆတ်-မိုင်းတုံကားလမ်းပေါ်တွင် သစ်ပင်လဲကျ၍ လမ်းပိတ်ဆို့မှု ဖြစ်ပွားခဲ့ကြောင်း သိရသည်။

.