လားရှိုးတွင် မူးယစ်ဆေးသုံးစွဲသူများကြောင့် ခိုးမှုများ မကြာခဏဖြစ်ပွားနေ

.

၂၀၂၆ ခုနှစ်၊ ဧပြီလ ၂၈ ရက်

.

ရှမ်းပြည်နယ်မြောက်ပိုင်း၊ လားရှိုးမြို့တွင် မူးယစ်ဆေးစွဲသူ များပြားနေပြီး ၎င်းတို့ကြောင့် ခိုးမှုအပါအဝင် ဒုစရိုက်မှုများ မကြာခဏဖြစ်ပွားနေသည်ဟု သိရသည်။

.

.

လားရှိုးမြို့ပေါ်တွင် မူးယစ်ဆေး သုံးစွဲသူများက လျှပ်စစ်မီးကြိုး ဖြတ်တောက်ခိုးယူခြင်း၊ ဖုန်းနှင့် အိမ်တွင်း ပစ္စည်းခိုးယူခြင်း၊ ဆိုင်ကယ်ခိုးယူခြင်းများအပြင် လုယက်မှု၊ ဓါးခုတ်မှုများကို မကြာခဏ ကျူးလွန်နေကြ သည်ဟု ဒေသခံများက ဆိုသည်။

.

“ကျွန်တော်တို့အိမ် လမ်းကြားထဲမှာလည်း ဆေးသမားတွေ နေ့ရော၊ ညရော ဖြတ်သန်းသွားလာနေကြ ပါတယ်။ ခိုးစရာတွေ့ရင် ရသမျှအကုန်ယူသွားကြတယ်။ ရပ်ကွက်ထဲမှာလည်း အဲဒီဆေးသမားတွေကြောင့် တော်တော် စိတ်အနှောင့်အယှက်ဖြစ်ရပါတယ်” ဟု လားရှိုးမြို့နေ အမျိုးသားတစ်ဦးက ပြောသည်။

.

မူးယစ်ဆေး သုံးစွဲသူများက လားရှိုးမြို့၊ ရပ်ကွက် (၄)၊ မဂ္ဂင်လမ်း၊ ကင်းတဲအနီးရှိ ယခင် သင်္ချိုင်းဟောင်း နေရာ၊ နေကြာရိုင်းတော နေရာကို အောက်ကွင်းဟူ၍လည်းကောင်း၊ ရေကန်တောင်ကို အပေါ်ကွင်း ဟူ၍ လည်းကောင်း အမည်ပေးထားပြီး ယင်းနေရာများတွင် မူးယစ်ဆေး ရောင်းဝယ်မှုများ၊ သုံးစွဲမှုများကို အများဆုံး လာရောက်လုပ်ကိုင် ကြကြောင်း သိရသည်။

.

“မီးကြိုးခိုးခံရလို့ ပြန်တပ်လိုက်တယ်။ ၄ ရက်ပဲကြာတယ်။ နောက်တစ်ခါ ထပ်အခိုးခံရပြန်တယ်ဗျ။ မူးယစ် ဆေးသမားကတော့ ခိုးလို့ရသမျှ အကုန်ခိုးနေတာပဲ။ အဲဒီ ခိုးလို့ရသမျှ ပစ္စည်းကို အပေါင်ခံနေတဲ့ သူတွေ လည်း ရှိတယ်။ သက်ဆိုင်ရာ တာဝန်ရှိသူတွေအနေနဲ့ ဒါတွေကို ဖမ်းဆီးအရေးယူဖို့ လိုပါတယ်” ဟု အခြား မြို့ခံတစ်ဦးကလည်း ပြောသည်။

.

လားရှိုးမြို့ပေါ် ရပ်ကွက်အများစုတွင် လျှပ်စစ်မီး ပြန်လည်ရရှိပြီဖြစ်သော်လည်း မီးမရသေးသည့် နေရာများ ကျန်ရှိနေသေးကာ မီးကြိုးခိုးယူမှုများလည်း ဆက်ရှိနေဆဲဖြစ်သည်ဟု ဒေသခံများက ပြောဆိုကြသည်။

.

လားရှိုးမြို့တွင် ပြီးခဲ့သည့် ဧပြီလ ၂၁ ရက်၊ ညနေပိုင်းကလည်း ကားအရောင်းအဝယ်ပြုလုပ်သူ ပွဲစား တစ်ဦးကို အမည်မသိ သေနတ်သမား  ၂ ဦးက သေနတ်ဖြင့် ပစ်သတ်၍ ကားလုယက်မှု ဖြစ်ပွားခဲ့သေးပြီး ကျူးလွန်သူကို ယနေ့အထိ ဖမ်းဆီးရမိခြင်း မရှိသေးကြောင်း သိရသည်။

.