.
၂၀၂၆ ခုနှစ်၊ ဧပြီလ ၂၈ ရက်
.
ရှမ်းပြည်နယ်မြို့တော် တောင်ကြီးမြို့တွင် ယနေ့
ဧပြီလ ၂၈ ရက်က အိမ်ခြံမြေအကျိုးဆောင်လုပ်ငန်း လုပ်ကိုင်သူ အမျိုးသမီးတစ်ဦး၏ဆိုင်ကယ်
လုယက်ခံရမှု ဖြစ်ပွားခဲ့ကြောင်း သိရသည်။
.
အမျိုးသားတစ်ဦးနှင့် အမျိုးသမီး ၂ ဦးတို့သည် အောင်ပန်းမှလာ၍
အိမ်လိုက်ကြည့်မည်ဟုဆိုကာ အိမ်ပွဲစား အမျိုးသမီးအား ချိန်းဆိုပြီး လိုက်လံပြသပေးနေစဉ်
၂၁၂ ရဲဘော်ဈေးဟောင်း အနီးတွင် လုယက်ခံခဲ့ရခြင်း ဖြစ်ကြောင်း သိရသည်။
.
“ခါတိုင်းဆိုရင် ကျွန်မက သူငယ်ချင်းအဖော်ပါမှ သွားပါတယ်။
ဒီနေ့က သူတို့က အောင်ပန်းကလာတာ။ လင်မယားနှစ်ယောက်နဲ့ သူတို့ မိန်းကလေးအဖော် တစ်ယောက်
ပါတယ်ဆိုတော့ အဲဒီမိန်းကလေးကို ကျွန်မ ဆိုင်ကယ်နောက်မှာပဲ တင်ပြီး ခေါ်လာတာပါ။ ၂၁၂
နား အရောက်မှာ ဘောင်းဘီဝယ်ဖို့ဆိုပြီး ခဏနားတဲ့ အချိန် တို့ဆေးနဲ့တို့ပြီး ခိုးမောင်းပြေးသွားတာပါ”
ဟု လုယက်ခံရသူ အမျိုးသမီးက ကမ္ဘာဇတိုင်းသို့ ပြောသည်။
.
ခိုးယူခံရသော ဆိုင်ကယ်သည် ကလစ်အမျိုးအစား လိမ္မော်ရောင်ဆိုင်ကယ်ဖြစ်ပြီး
တွေ့ရှိပါက ဆက်သွယ် အကြောင်းကြားပေးရန် အမျိုးသမီးက အသိပေးထားသည်။
.
ပြီးခဲ့သည့် ဧပြီလ ၂၀ ရက်၊ နံနက်ပိုင်းကလည်း
တောင်ကြီးမြို၊ အမျိုးသမီးနှင့် ကလေးဆေးရုံဝန်း အတွင်း၌ ရပ်ထားသည့်
အလုပ်သင်ဆရာဝန်တစ်ဦး၏ မော်တော်ဆိုင်ကယ် တစ်စီး ခိုးယူခံရမှုဖြစ်ပွားခဲ့သလို ဧပြီလ
၁၉ ရက်၊ ညပိုင်းတွင်လည်း တောင်ကြီးမြို့၊ ကံသာရပ်ကွက်၊ ပြည်တော်အေးအိမ်ရာဝင်းအတွင်း
ရပ်နားထားသည့် ဆိုင်ကယ်တစ်စီး ခိုးယူခံရမှု ဖြစ်ပွားခဲ့သေးသည်။
.
တောင်ကြီးမြို့တွင် ဆိုင်ကယ်ခိုးယူခံရမှုများ
မကြာခဏ ဖြစ်ပွားနေပြီး ခိုးယူခံရပါကလည်း ပြန်လည် ရရှိရန် မလွယ်ကူသည့်အတွက် သတိပြုရန်လိုအပ်နေကြောင်း
မြို့ခံများအကြား သတိပေးပြောဆိုမှုများ ရှိနေသည်။
.
No comments:
Post a Comment