စည်းကမ်းမဲ့သွယ်တန်းထားသည့် ဝိုင်ဖိုင်ကြိုးများကြောင့် ပြည်သူများ စိတ်အနှောင့်အယှက် ဖြစ်ပေါ်နေ

.

၂၀၂၆ ခုနှစ်၊ ဧပြီလ ၅ ရက်

.

ရှမ်းပြည်နယ်မြို့တော် တောင်ကြီးမြို့ပေါ်တွင် စည်းကမ်းမဲ့ သွယ်တန်းထားသည့် ဆက်သွယ်ရေး ကုမ္ပဏီများ၏ ဖိုင်ဘာအင်တာနက် ဝိုင်ဖိုင်ကြိုးများကြောင့် မြို့ပေါ်နေပြည်သူများ စိတ်အနှောင့်အယှက် ဖြစ်ပေါ်နေရသည်ဟု သိရသည်။

.

.

ဖိုင်ဘာအင်တာနက် ဝိုင်ဖိုင်တပ်ဆင်သည့် ကုမ္ပဏီအများစုသည် ကြိုးများ တပ်ဆင်သွယ်တန်းရာတွင် လမ်းသွားလမ်းလာ နယ်နိမိတ်အတွင်း ကျရောက်နေခြင်းနှင့် ပြတ်ကျနေသော ကြိုးများကို ပြန်လည် ရှင်းလင်းမှု မရှိခြင်းကြောင့် လမ်းအသုံးပြုသူ ပြည်သူများအတွက် အန္တရာယ် ဖြစ်ပေါ်စေနိုင်ကြောင်း ဒေသခံများက ပြောဆိုကြသည်။

.

“တချို့နေရာတွေမှာ ကြိုးတွေက လမ်းနှစ်ဖက်ကိုခွပြီး ပင့်ကူမျှင်တွေလို ဖြစ်နေတာပေါ့။ ပြတ်ကျနေတဲ့ ကြိုးတွေကိုလည်း သေချာပြန်မသိမ်းတော့ ညဖက်ဆိုရင် ထိခိုက်မိမှာ စိုးရိမ်ရတယ်။ သက်‌ဆိုင်ရာ အနေနဲ့ စိစစ်သင့်ပါတယ်” ဟု တောင်ကြီးမြို့နေ ဒေသခံတစ်ဦးက ကမ္ဘောဇတိုင်းသို့ ပြောသည်။

.

တောင်ကြီးမြို့ပေါ်တွင် ဖိုင်ဘာအင်တာနက် အသုံးပြုသူ များပြားလာသည့်အတွက် ကုမ္ပဏီများအနေဖြင့် ဈေးကွက်ရရှိစေရန် နည်းမျိုးစုံဖြင့် ဆွဲဆောင်နေကြသော်လည်း ပြတ်ကျနေသည့် ကြိုးများကိုမူ စနစ်တကျ ပြန်လည်ရှင်းလင်းခြင်းများ မရှိကြောင်း သိရသည်။

.

“ကြိုးတွေ ပြတ်ကျနေရင် သက်ဆိုင်ရာကုမ္ပဏီက အမြန်ဆုံးလာရောက်ပြီး ရှင်းပေးဖို့လိုပါတယ်။ ကျွန်တော်တို့ရပ်ကွက်ထဲမှာ ပြတ်ကျနေတဲ့ ဝိုင်ဖိုင်ကြိုးကို မမြင်ဘဲ ဆိုင်ကယ်စီးရင်း ဝင်တိုက်မိလို့ ဒဏ်ရာ ရတာမျိုးတွေ ရှိပါတယ်” ဟု တောင်ကြီးမြို့၊ ကျောင်းကြီးစုရပ်ကွက်အတွင်း နေထိုင်သူတစ်ဦးကလည်း ပြောဆိုခဲ့သည်။

.

အဆိုပါ လမ်းနယ်နမိတ်အတွင်းကျရောက်နေသည့် ဝိုင်ဖိုင်ကြိုးများသည် ကုန်တင်ယာဉ်များဖြင့် တိုက်မိကာ ပြတ်ကျမှုများ မကြာခဏ ဖြစ်ပွားတတ်သည့်အတွက် သတိပြုသွားလာရန် လိုအပ်နေကြောင်း ဒေသခံများက သတိပေး ပြောဆိုနေကြသည်။

.