တန့်ယန်းနှင့် မူဆယ်မြို့နယ်တွင် အွန်လိုင်းလိမ်လည်လောင်းကစား လုပ်ကိုင်သူများကို ဖမ်းမိ

.

၂၀၂၆ ခုနှစ်၊ ဧပြီလ ၅ ရက်

.

ရှမ်းပြည်နယ်မြောက်ပိုင်း၊ တန့်ယန်းမြို့နယ်နှင့် မူဆယ်မြို့နယ်များတွင် ယမန်နေ့ ဧပြီလ ၄ ရက်က အွန်လိုင်းလိမ်လည်လောင်းကစား လုပ်ကိုင်နေသည့် တရုတ်နိုင်ငံသားများနှင့် မြန်မာနိုင်ငံသားများကို ဖမ်းဆီးရမိခဲ့ကြောင်း သိရသည်။

.

.

လုံခြုံရေးအဖွဲ့ဝင်များပါဝင်သော ပူးပေါင်းအဖွဲ့ဝင်များသည် ယမန်နေ့ ဧပြီ ၄ ရက်နံနက်ပိုင်းက တန့်ယန်း မြို့နယ်၊ ကောင်းဆန်ကျေးရွာအနီးရှိ အဆောက်အအုံ ၁၅ လုံးအတွင်းမှ အွန်လိုင်းလိမ်လည်လောင်းကစား မှုများ လုပ်ကိုင်နေသည့် တရုတ်နိုင်ငံသား ၁၀၁ ဦး၊ မြန်မာနိုင်ငံသား ၂၀ ဦးတို့အား All in One ကွန်ပျူတာ ၂ လုံး၊ Desktop ကွန်ပျူတာ ၁ စုံ၊ Laptop ၂၁ လုံး၊ ဖုန်းမျိုးစုံ ၁၁၈ လုံး၊ Starlink ၁၆ ခု၊ Wireless Router ၁၃ လုံး၊ မီးစက် ၂ လုံးတို့နှင့်အတူဖမ်းဆီးရမိခဲ့ကြောင်း သိရသည်။

.

အလားတူ ယင်းနေ့ ညနေပိုင်းတွင် မူဆယ်မြို့၊ စွမ်စော်ရပ်ကွက်၊ မန်ဝိန်းနယ်မြေအတွင်းမှ အွန်လိုင်း လိမ်လည် လောင်းကစားလုပ်ကိုင်သူ တရုတ်နိုင်ငံသား ၇ ဦးအား ဖုန်းမျိုးစုံ ၃၆ လုံး၊ ကွန်ပျူတာ ၂၃ လုံး တို့နှင့်အတူ ထပ်မံဖမ်းဆီးရမိခဲ့ကြောင်း သိရသည်။

.

အဆိုပါ ဖမ်းဆီးရမိသူများအား လိုအပ်သည့် စစ်ဆေးမှုများဆောင်ရွက်ပြီး တည်ဆဲဥပဒေများနှင့်အညီ ထိရောက်ပြင်းထန်စွာ အရေးယူသွားမည်ဖြစ်ကာ သိမ်းဆည်းရမိခဲ့သည့် ဆက်စပ်ပစ္စည်းများကိုလည်း လုပ်ထုံးလုပ်နည်းများနှင့်အညီ ဆက်လက်ဆောင်ရွက်သွားမည်ဖြစ်ကြောင်း သိရသည်။

.