အောင်ပန်း-ကလောတွင် ထင်းရှူးဆီ ထုတ်ယူမှုကြောင့် ထင်းရှူးတောများ လျော့နည်းပျက်စီးလာနေ

.

၂၀၂၆ ခုနှစ်၊ ဧပြီလ ၂၅ ရက်

.

ရှမ်းပြည်နယ်တောင်ပိုင်း၊ အောင်ပန်း-ကလောဒေသတွင် စီးပွားဖြစ် ထင်းရှူးဆီ အလွန်အကျွံ ထုတ်ယူမှု များကြောင့် ထင်းရှူးတောများ လျော့နည်း ပျက်သုဉ်းလာနေရကြောင်း သိရသည်။

.

.

ထင်းရှူးပင်အချို့မှာ တောမီးလောင်ကျွမ်းမှုကြောင့် ပျက်စီးရပြီး အချို့က ထင်းရှူးဆီ ထုတ်ယူရန်အတွက် ထင်းရှူးပင်များကို တမင်တကာ မီးရှို့ဖျက်ဆီးကြခြင်းဖြစ်ကာ အောင်ပန်းသစ်တောကြိုးဝိုင်းနှင့် ကလော သစ်တောကြိုးဝိုင်းကြား၊ မြင်းကရွာနှင့် ရှေးဟောင်းစေတီ အနီး တောအတွင်း ထင်းရှူးပင် တစ်ရာကျော် နှစ်ရာနီးပါးခန့် ခုတ်လှဲမီးရှို့ခံထားရကြောင်း ဒေသခံများထံက သိရသည်။

.

ထင်းရှူးပင် ခုတ်ယူသူများက ဆိုင်ကယ်များဖြင့် လာရောက်ခုတ်ယူ သယ်ဆောင်ကြပြီး သစ်တောဝန်ထမ်း များမှာ အင်အားနည်းပါးသည့်အပြင် အခြားလုပ်ငန်းတာဝန်များကြောင့် ဖမ်းဆီးရန် အခက်အခဲဖြစ်ပေါ် နေရကြောင်း သိရသည်။

.

“အဓိက ကတော့ ထင်းရှူးဆီကို စီးပွားဖြစ် ထုတ်ယူတာကြောင့် ထင်းရှူးတောတွေ ပျက်သုဉ်းရတာပါ။ သစ်တောက ဖမ်းတယ်ဆိုရင်လည်း သူတို့တွေက ကလန်ကဆန်လုပ်ကြတယ်။ ပြီးတော့ သူတို့ပျိုးထောင် ထားတဲ့ စိုက်ခင်းကို မီးရှို့တာပါလို့ ပြောကြတော့ မဖမ်းရဲကြဘူး” ဟု အောင်ပန်းဒေသခံတစ်ဦးက ကမ္ဘောဇတိုင်းသို့ ပြောသည်။

.

အဆိုပါ ခုတ်ယူပြီး ထင်းရှူးဆီများကို အောင်ပန်း ပြည်သာယာဈေး ခေါ် အောက်ဈေးတွင် အများဆုံး ပြန်လည်ရောင်းချကြပြီး သီးနှံထွက်ကုန် ဝယ်ယူသူအချို့က အိတ်လိုက် ပြန်လည်ဝယ်ယူမှုများ ရှိကြောင်း သိရသည်။

.

“သစ်တောဝန်ထမ်းက အားနည်းသလို သူတို့ရဲ့ ပင်မလုပ်ငန်းဖြစ်တဲ့ စိုက်ပျိုးပြုစုတဲ့ ဟာကိုပဲ ဦးစားပေး နေရတော့ အပင်ကြီးသွားရင် သူတို့ လူအင်အားနဲ့ မစောင့်ရှောက်၊ မထိန်းသိမ်းနိုင်တော့ဘူး။ လူကြီး လာစစ်ရင် ပြနိုင်ဖို့လောက်ပဲ အလုပ်လုပ်နိုင်တာပေါ့” ဟု အခြား ဒေသခံတစ်ဦးကလည်း ပြောဆိုခဲ့သည်။

.

ထို့အပြင် စိုက်ပျိုးမြေဧက တိုးချဲ့လာမှုကြောင့် ထင်းရှူးပင်များမှာ အလိုလျောက် သင်းသတ်ခံရပြီး ပျက်စီး ရခြင်းများလည်းရှိကာ မြင်းကကျေးရွာနှင့် လွယ်အံ့ကျေးရွာ၊ ကြေးကုန်းဝန်းကျင် အနီးတွင် နေအိမ်အဆောက် အအုံ တိုးချဲ့လာမှုကြောင့်လည်း ထင်းရှူးတောများ ပျက်စီးရမှုရှိကြောင်း သိရသည်။

.

အိမ်ယာစီမံကိန်းများ ဖော်ဆောင်မှုကလည်း သဘာဝပတ်ဝန်းကျင်ကို ပျက်ဆီးစေသည့်အတွက် တာဝန်ရှိသူ များအနေဖြင့် ကြပ်မတ်ထိန်းကျောင်းကာ မလိုအပ်သည့် စီမံကိန်းများကို ပိတ်သိမ်းသည်ထိ အရေးယူရန် လိုအပ်ကြောင်း ထောက်ပြဝေဖန်မှုများလည်း ရှိနေသည်။

.

ထင်းရှူးတောများသည် ကလောမြို့၏ အထိမ်းအမှတ် သင်္ကေတတစ်ခုဖြစ်ပြီး လူဦးရေ တိုးတက်များပြားလာ သည်နှင့်အမျှ နေအိမ်နှင့် စိုက်ပျိုးမြေ ချဲ့ထွင်လာမှု၊ စီမံကိန်းလုပ်ငန်းများ တိုးချဲ့လာမှုကြောင့် လက်ရှိတွင် ထင်းရှူးတောများ နှစ်စဉ် လျော့နည်းပျောက်ကွယ်နေရခြင်းဖြစ်ကြောင်း သိရသည်။

.